التصنيف: العناية بالشعر

اكتر شكوى بنسمعها فمصر شعري بيقع اعمل ايه انقذوني النجده ادخلي قسم استشارات الشعر هتلاقي 50 % ل70% شكوى التساقط
اول سبب واهم سبب
الشامبو

شامبوهات تجاريه اتعرفتي عليها عن طريق الدعايه زي جليس/ سباركل/ صانسيلك/ بانتين/ اليف/ هيربل اسنز / تريسمي /حتى جونسون اللي معتقدينه افضل نوع عشان للاطفال بينشف الشعر جدا وبيووووقعه وخطر عالاطفال لانه بينشف الشعر فبيهييش وفيه مخدر غير امن عشان ميحرقش العين وده ضرر على عيون طفلك

تخيلي في حالة عدم توفر اقوى انواع الشامبو هو الكلارفينج اللي بنستخدمه قبل البروتين او الكيراتين عشان يشيل الدهون وبقايا التربه من الشعر تماما بنستخدم بديل ليه جونسون بس طبعا مستواه اقل لاكن بينششف الشعرايه من اي اثر للدهون ولو تلاحظي الشعر بيبهت لونه جدا

وبسسسستغرب لما الاقي متخصصه وصفاه بتاكد انها مجرد كوافيره لا تفقه فالعنايه بالشعر اي شيء

كلهم بيوقعوا الشعر بطوله اعملي تجربه استمري على غسل شعرك بالماء فقط كرريها مرتين تلاته وشوفي بيقع بنفس الطريقه لو لا يبقى فعلا الشامبو كان السبب ونوقفه فورا (( وياريت نسرح شعرنا قبل الشاور بتعنا عشان ميكلكعش ويعقد زياده ))

طيب ليه بيوقعوا بسبب الاضافات كل ما اضاف لون مميز لمعه مميزه سمك معين كل ما حسيتي شعرك رطططب ازيد وريحته احلى كللل ده ضررر بيضاف للمواد ده غير اخطر مادتين ( كلوريد الصوديوم ولوريث سلفات ) اتحداكي انك متلقيش عالشامبو مادة سلفات لوريث الصوديوم و مادة لوريل سلفات الصوديوم (SLES – SLS)
طيب بيضفوها ليه لانها رخيصه وبتعمل رغوه عاليه وانتي تفرحي كانك بتغسلي على غساله عاديه ^o^
وشعرك يقعععع وتخافي تسرحيه من كتر التساقط
طيب ايه الحل ؟؟؟

اولا حلول بسيطه
الكربوناته دوبيه فميه هيبقى محلول مركز وتغسلي بيه هيشيل الدهون من فروة الشعر بس دلكي وانتي بتغسلي بيه ومتقلقيش الكربوناته مفهوش اي ضرر
ثانيا الصابون
في بنات معندهاش مشكله ومتعوده عالصابونه بس غلط اللي فيها عطر زي كاميه ولوكس وحتى لو عاديه
الصابون اصلا غلط جدا على الشعر حتى لو كان صابون غالى وفاخر لان قلوية الصابون عالية جدااااااااااا على الشعر وتاثيره قوى ومع الوقت بيترك ترسبات صابونية بتعمل بهتان فى لون الشعراية ده كلام دكتوره نيرمين عشان نبطل خلطات الصابون

يبقى الحل الثاني
الشااااااااابمو الطبببببببببي
زي بروتي كير 25ج ( يخفف بقليل من الماء ويرج عشان يرغي كويس )

شامبو عشبي هيرباميكس 25ج

دوكراي Ducray nutricerat ميزته مش بينشف الشعر ومخصص للشعر الجاف والتالف صناعه فرنسي

طبعا الشامبو الطبي بينشف الشعر فنركز على غسل فروة الشعر مش الشعرات نفسها والحل فالتالي البلسم

شامبو لوريال في فرق كبييييييييييير بين شركة لوريال بروفشنل باريس / ولوريال باريس الاولى للمتخصصات والبيوتي سنتر فقططط ودي منتجاتهم روعه قليله عليهم زي شامبو ديليكيت وصبغه اينوا وصبغه ماجريل وووو طبعا هتستغربوا الاسماء دي لانها ممنوع تتباع فمنفذ بيع
زي لوريال باريس متوفر فكل مكان منهم ششامبو اليف بالنسبالي منتجات شعبيه وسيئه جدا جدا
ده شامبو مميز للشعر التالف والمصبوغ ولا يحتوي على sles متوفر على مواقع البيع واي بيوتي سنتر المميز فقط
شامبو ديليكيت 100ج

لو عايزه شامبو مميز وسهل الحصول عليه
نوكسي nuxe خالي من السلفات يعمل على تنظيف وتقوية وتهدئة فروة الرأس مكونات طبيعيه لا يسبب حرقان للعين ويمكن استخدامه للاطفال من سن سنتان

جلوبال بلانسنج 150ج للشعر الخفيف
لاكن لو شعرك تقيل وعيزه تنظفيه اوي الاقوى منه جلوبال موستريزنج 160ج
متوفر فالعزبي فقط فقط لانه واخد توكيله من امريكا اي صيدلليه تانيه ممكن يكون مغشوش وشفت منه كتير مغشوش
في نوع كان عليه استيكر الاصلي الكتابه عالازازه مطبوعه مش استكر
وشفت نوع تاني متخصصصه مشهوره بتيجي فالتلفزيون كانت ادت لصحبتي الافتر كير جلوبال الازازه شفاافه مش بيضا ومش اصلي ممكن كوبي وكان مسبب تساقط
ده شكللين لجلوبال الاصلي فالشركه المستورده اس ام اس

وشركة جلوبال ليها فرع فمصر وبتبيع للبيوتي سنتر فقط ممنوع للصيدليات ومحلات مستحضرات التجميل عشان يحافظوا على جودة المنتج نفس فكرة لوريال بروفشنل باريس

ثانيا البلسم
ايه لزمته بعد ماغسلتي شعرك ونظف وفتحتي مسام الشعر لااازم تقفليها وتتغلف ببلسم وتترطب بسسسس
البلسم كل مواده ملينه للشعر بيلين لدرجة انه يقععع
ومن المواد المضره فيه السيلكون بترطب جدا وموجوده فالشامبو بس الشركات الطبيه معتدله فتركيب المواد فبيحافظ على الشعر
افضل نوع جربته متوفر فالصيدليات فولتين سعره 80ج

واكرينال طبي برضه
او جلوبال بلانسنج
وبلاش جلوبال موستريزنج للشعر المتضرر مناسب للشعر الصحي
اي كاااان النوع خطر جدا يلمس فروة الشعر بيوقعه علطووول خصوصا لو نوع تجاري
طيب الحل بتقسمي شعرك بالنص يمين وشمال
وتخدي زي حبة البندقه بلسم وتدهني فايدك كانه زيت وتمسحي عالقسم اليمين وهكذا عالقسم الشمال وبراحه عشان نتجنب الجدر
ونفس الطريقه لحمام الكريم

وارجوكم بلااااااش بلسم تجاري زي الشامبوهات السيئه جدا ((بلسم سكالا برازيلي 28ج وكاريتس 50ج ومش مناسبين للشعر الضعيف خاالص ))

حمام الكريم
لترطيب الشعر فقط .. مش للتغذيه وكثرت استخدامه بيكسر الشعر غلط نستخدمه بدل البلسم كفايه مره كل 10 ايام لاكن البلسم عادي مع كل شاور طالما نوع طبي
الانواع المفضله للاسف معندناش انواع طبيعيه 100% فعالاقل لو جبناه منسبوش عالشعر ونعمل حمام كريم بيه كفايه 3 دقايق بالكتير عالشعر والا هتلاقي شعرك وقع جااامد
بس انا بحب انرجي مام زيت بملمس حمام كريم موجود فكارفور وموجود فالهرم عند اولاد عليوه شارع نصر الدين عند ترعة الزمر

وجلوبال مميز

دوكراي ماسك Ducray Nutricerat فرنسي وطبي

لوريس حلو بس في منه المستورد مش عليه ولا كلمه عربي فظهر العلبه وجرد ورقه بيضا مطبوع عليها طريقة الاستعمال بالعربي هو صناعه برازيلي ب45ج 1لتر
وبلاش فاتيكا وبيوبوينت وفاشكول وصانسيلك ماسك ومينك وكيراجانيك ماسك اي شعر ضعيف هيسببوا تساقط وهيزيد مع الوقت

طلعنا من الحمام وكل خد عليه خوخه
نيجي للدهانات
الزيت
لالالالالالالالالا غلط ليه بس ياسروره هانم
زيت يعني حمام زيت لانه تقبل بيكتم الشعر وتخرجي فالشمس ياسلام لو حجابك مش قطن كمان عارفه بالضبط
زي اللي جابت طاسه وحطت بطاطس وقلتها فالزيت النتيجه شعر مقصصصصف وهااايش
وزيه زي البلمرز ومنتجات الفازلين كريم بس في بنات الله يعينهم شعرهم صعب التعامل معاه من غيرهم بس اللي شعررها بيقع لالالا
طيب الزيت افضل الانواع زيت الزيتون بكر اصلي درجه اولى زي بروجستون
وزيت النخاع
زيت اللوز الحلو
زيت الجرجير
والزيوت الهندي زي كيشور وابانوب و ترشوب وعبدالصمد القرشي بس اقل مفعول شويه
وخليهم للفروه مش للشعره كده كده هيسيح عليها فمتغرقهاش وترجعي تهررريها غسيل بالشامبو فتتهد حيلها وتوقع

الكريمات
بفضل يكون عندك كريم تستخدميه كل اسبوع او 10 ايام او اكثر
انوعها كتير بس حبيت القي الضوء على الانواع المميزه
دوكراي نيوتريسيرات Ducray nutricerat 75ج وده مخصوص للشعر الجاف والهايش والمتقصف ميزته مش بيدهنن الشعر

كازانوفا السعودي 22ج للشعر العادي ((لاكن النوع المخصص للشعر الجاف مش حلو))) ميزته ترطيبه عالي بس بيلمع الشعر جدا الاصلي فبرطمان زجاج

بروتي كير خفيف عالشعر بيقويه ويخليه بيلمع وندلك الشعر بيه 3 دقايق تقريبا 5ج
وفيفدول كريم خفيف قاعدته مائية كريم علاجى ضد التساقط
كريم كينروزا انجليزي متوفر فاولاد عليوه فالهرم مفعوله ممتاز وياسلام لو مزجتيه بكريم بانثينول من الصيدليه مناسب للشعر المجعد والهايش بدل البالمرز والفازلين

السيرم
طيب افضل دهان السيرممممم فعلا خفيف عالشعروصحي وكله فيتامينات بسسس مش الانواع التجاريه زي اليف املا ولا زيرو فريز برضه لا
كريستال صناعه ايطالي لانه متوفر ب55ج عند سمير وليم وفبنده فالسعوديه

لوريال بروفشنل زي ماشرحت قل كده سعره 100ج تقريبا وفيه منه لكل انواع الشعر

كاريتس

جلوبال 150ج 50 ملل

سيرم تشي غني عن التعريف 100ج

وسيتري شاين ب50ج من شركة زيرو فريز بس الفرق شاسع

افضل استعمال للشعر مابين البلل والنشفان يعني بعد تنشيفه بالفوطه بعد الشاور ندهن علطول

كثرت غسيل الشعر بالشامبو بتسبب اضرار لاحصر لها والدهانات التقيله زي الزيوت والكريمات او وضع كميات كبيره من السيرم بتسبب ترسبات ف
فروة الراس حلها غشل الشعر بالشامبو
الدهون اللي بتفرزها الشعر الطبيعيه افضل من كل الدهانات فحالة انك تمشطي شعرك بالفرشاه الخشب الدهون بتنزل عالشعر تغلفه ومنحجتش دهان يومي ولا غسيل كتير
الشامبو يفضل استعماله في حالات الشعر الجاف مره كل 10 ايام واخري على قد ماتقدري للشعر العادي مره بالاسبوع الدهني بقى الله يعينه هو وقوة تحمله على الدهون
غير كده نغسل الشعر بماء فقط وبلسم للاطراف وقللليل من السيرم للاطراف نتجنب فروة الراس عشان متدهنش ونضطر نغسل شامبو كتييير

نيجي للسيونات
لسيون الو بانثينول وبانثينول بينبت الشعر بس بينشفه نحطه في قطاره صغيره افضل عشان ميجيش عالشعر ندلك الفروه بيه بس
لسيون ليندو ممتاز ومش بينشف الشعر
لسيون روزالينا يحتوي على زيوت وسيلكون ترطيبه عالي للشعر

الكبسولات
فيتامين e ملل1000 الشريط ب5ج
فرغي محتواها وخففيها بلسيون زي بانثينول او بسيرم لانها تقيله زي العسل النحل ودلكي شعرك بعد كل شاااور وهي مهمه جدا
اغلب السيرم والكريمات بتحتوي عالفيتامينات دي كله

الادويه اشهرهم هيرتون وبانتوجار بس ارجوكي باستشارة الطبيب لانهم بيزودا شعر الجسم
لاكن نيتورا وكبد الحوت والزنك والخميره مفيش مشكله منهم

اما الامبولات اشهرهم فولتين اناستيم اكرينال وبانثينول
ولالازم تستمري عليهم من 3 ل6 شهور مش تبداي وتوقفي لان لو مخدتيش الكورس كاامل مش هتخدي نتيجه وتندمي على اللي ادفع وهيرجع يتساقط تاني

ولو بتستعملي حنه او خلطات للشعر متسبهاش فتره طويله
واهمم حاجه التغذيه كلي جرجيييييييير على قد ماتقدري واهتمي بنسبة الحديد فالجسم

لو اخترتي نوع من كل منتج واستمريتي عليه هتنسي التساقط خالص واخيرا الفرشاه الخشب صحيه جدا جدا يمكن افضل من المشط لانه اسنانه حاده
الفرشه متوفره عند سمير وليم وفالصيدليات
ممتازه فعلا وبتعمل مساج للشعر وبتوزع الدهون من الفروة للشعر بطريقه جيده