مساء الخير يا حبيباتى كلكم
انا النهاردة حاعمل معاكم ساندويتشات شكلها تحفة و سهلة جدا تنفع طبعا للحفلات و للمدرسة و لرحلات المدرسة حاتعمل سوكسيه جاااااااامد جدا لاولادكم . ينفع كمان تعمليها باى حجم الكبير و الوسط و كمان الصغير خالص اللى بيتحشى بالنقانق [ السوسيس الصغير ]
الاول اوريكم صورة الاغراء بتاعة كل مرة
مقادير الخبز :
3 كوب دقيق
1 كوب لبن
1 1/2 معلقة كبيرة زبدة / 1 1/2 معلقة كبيرة خميرة فورية / 2 معلقة كبيرة سكر / 1 معلقة كبيرة ملح / صفار بيضة
[1 صفار بيضة +1/2 معلقة نسكافيه + 2 معلقة لبن + ملح و فلفل ] لدهان الوجه
سوسيس كبير او وسط اوصغير للحشو حسب الحجم اللى حاتعمليه / جبن شيدر او جودة او بيضاء او رومى اللى اولادك بيحبوها كاتشب و مسطردة و مايونيز
الاول ندفىء اللبن و نسيح الزبدة و نخلطهم فى بولة سوا و نضيف الملح و السكر و صفارة البيض و الخميرة و نقلبهم كويس
و بعدين نلم العجينة بباقى الدقيق
و نخرجها من البولة و نعجنها كويس بايدينا
و نحط العجينة فى البولة تانى و نغطيها بكيس بلاستيك و نسيبها ترتاح حوالى عشر دقايق
نقسم العجينة ل 8 اقسام [ حايعملوا 8 ساندويتشات وسط ]
نعملهم كور و نرصهم فى صينية و نغطيهم بكيس بلاستيك و نسيبها ترتاح تانى 10 دقايق
ناخد كورة و نعملها على شكل بيضوى بس من غير بوز و نقطع الحرفين بالورب بسكينة زى الصورة
و نرصهم فى صاج الفرن على ورق زبدة مدهون زيت و نحط مكان العين و الفم فاصوليا سوداء او قطع زيتون اسود [ انا مستعملة فاصوليا سوداء ] و ندهنهم بخليط صفار البيض و النسكافيه
و نغطيهم بكيس نايلون و نسيبهم يخمروا بصوا ماشاء الله خمروا ازاى
و ندخلهم فرن 200 درجة الاول لمدة 5 دقايق و بعدين 180 درجة لمدة 10 دقايق او لحد ما يحمر بسيط من تحت و من فوق
و نسيبهم يبردوا خالص قبل ما نحشيهم [ بصوا بقوا كلاب بيج قمر ازاى ]
و نشق الساندويتش من عند بق الكلب بسكينة مشرشرة و نوصل لحد الودان نشقها برضه علشان حانحشيها و نحط جوه العيش الجبنة و على حرف بق الكلب نحط السوسيسة بحالها و ممكن نحط مايونيز و كاتشب و مسطردة للى بيحبهم
و تقدميه لابنك او بنتك كده مع الخيار و الطماطم و الفلفل الرومى [ سلطة يعنى ]
و علشان بقى نبقى اكلنا و حلينا اتفضلو الطبق ده يا حلوين
خلاص بقى اكلنا و حلينا اسيبكم فى رعاية الله يصبحوا على خيييييييييييييير مواضيع هذا القسم برعاية
شاي ساده شاي ساده 849519_1.gif فتكات ست الكل Fatakat 849519 القاهرة – مصر