سلام عليكن يا فتوكاتى
ازيكوا … يارب تكونوا بخير
كنت عايزة اوريكوا اخر اختراعاتى فى مطبخى لأ ومش اى اختراعات دى اختراعات عشان عيد ميلاد زوجى
فشديت الهمة بقى ودخلت مطبخى أعك قصدى اطبخ هههههههههه
تعالوا نشوف مع بعض عملت ايه
………………………………………….. ………………..
عملت مكرونة بالوايت صوص " لازم تعوجى لسانك وانتى بتقولى وايت صوص ههههههههههههه"
وعملت شيش طاووق
شوربة شعرية
نشوف الصور
دى المكرونة
الطريقة سهلة خالص مالص
سلقت المكرونة وجيت حطيت حتة زبدة صفرا وعليها فصين توم الونهم اصفر مش يتحرقوااااااااا عشان مش عايزنهم يبانوا وبعدين حطيت معلقتين دقيق كبار وقلبت وكنت غليت كوب ونص لبن وصبيته ع الدقيق وقلبت وبعدين ملحت والزعتر بقى اللى هايعمل احلى شغل والفلفل الاسمر
وقلبى ع نار هادية لحد ما تتماسك وتكون لينة برده فى نفس الوقت ازاى بقى ما اعرفش هى كده وخلاص ههههههههههه
خلاص بقت برفيكت ابشرى عليها جزر وقطعى فلفل رومى وممكن مشروم بس احنا غلابة وعلى قدنا ههههههههههه
وحطى المكرونة ع الصوص وقلبى وما عليكى الا انك تاكلى بقى
………………….
الشيش طاووق بقى
معلش الصورة مهزوزة شوية
الطريقة برده سهلة وصحية للدايت يا مزز
قطعى صدور الفراخ مكعبات كبيرة شوية وحطى عليها ربع كوب لبن ومعلقة صلصة او ابشرى طماطم هاتبقى حلوة برده وحطى فص توم مفروم وملح وفلفل وبهاراتك بقى
وقلبى وحطى فى التلاجة لمدة يوووووووووووم
وبعدين بقى جيبى الاسياخ الخشب وحطى قطعة بصل وفلفل رومى وقوطة وحوطى مكعبات الفراخ وهكذااااااا لحد ما السيخ يخلص
التسوية بقى يا تحطيها فى الفرن على شبكة وتحتها صينية فيها مية
يا تحطيها فى الشواية اللى ع البوتوجاز لكى كامل الاختيار
اهم حاجة تستوى بس كده شوفتوا سهلة ازاى
………………………………………….. .
شوربة الشعرية بالطماطم
دى بقى وااااااااااااااااااااو
سهلة جدااااا حمرى الشعرية وبعدين حطى مية ومكعب ماجى وملح وصلصة طماطم وقلبى ووطى النار وسبيها تستوى وياااااه بقى ع الجمال
……………….
تيجوا تشوفوا الترابيزة وهى محطوطة عليها الأكل
لما الشموع ولعناها بقى اه صحيح ايه رأيكوا فى القارورة اللى فى النص دى حلوة ولا شكلها رخم ؟؟
سيبكوا من الكيس البيلاتسك اللى ع جمب ده هههههههههههه ده دخيل فى الصورة معلش
ايه رايكوا ؟؟ بس نسيت اصب العصير ههههههههههه
………………………………..
عملت تورتة انا اصلى منشكحة اوى لانى اول مرة اعمل تورتة او الاصح اول مرة اعمل كيكة اصلا ههههههههههه
هى اه طلعت عينى بس اهه الحمد لله احسن من مافيش ياعنى
وفى برده اخطاء حصلت منى بس حاولت بقدر الامكان اتفاداها عشان ما اتوترش ياعنى …اول حاجة غلطت فيها انى صبيت خليط التورتة كله فى الصينية والصينية طلعت صغيرة
وكمان كنت خايفة تبوظ منى فبذكائى بقى فتحت الفرن فطبعاااااا هبطت شوية
وكمان الغلطة اللى خلت التزويق ما يطلعش زى ما كنت متخيالاه ان النور قطع وحسبى الله ونعم الوكيل خلى الشيكولاتة بدل ما تبرد فى التلاجة تسيح هههههههههه
فكنت بزوق بشيكولاتة سايحة تخيلوا المنظر بقى
حتى لدرجة ان الشيكولاتة من كتر ما هى سايحة كنت بزوق نفسى بيها هههههههههههههههه
زى ما بقولكوا كده كنت عبارة عن قطعة شيكولاتة متحركة هههههههههههه كلى شيكولاتة الترننج شيكولاتة ورجلى وايدى لدرجة انه وصل لودانى ازاى مش عارفة ههههههههههههه
والمطبخ برده كان مطبخ بالشيكولاته ههههههههههه
المهم نشوف الصور الأول
دى لسة كانت فى التلاجة زوقتها من الجناب ببندق وفول سودانى وجوز هند عشان الجناب ما كانش شكلها عاجبنى ايه رأيكوا ؟؟
على فكرة الشريط الاحمر ده على الصينية اللى كنت عامله فيها الكيكة قلبتها وحطيت التورتة وبعدين حطيت الشريطة لزوم التزويق
طريقة التورتة اهه
https://fatakat.univanet.com/#2679852
كمان انا عملت جناش الشيكولاتة مش بشيكولاتة خام عملته بشيكولاتة كادبرى كانت حلوة اوى الصراحة
هاوريكوا المشاركة الجاية الديكوريشنز
استنووووووووونى
مواضيع هذا القسم برعاية
eltawam eltawam 357130_3.gif Fatakat 357130 القاهرة – مصر