السلام عليكم ورحمة الله وبركاته
ازيكم يا فتوكات يارب تكونوا بخير النهاردة جايبلكم طريقة الكريب باللحمة المفرومة أصلى بحب الكريب أوووى
ندخل بقى عالمقادير :
كوب كبير دقيق
بيضتين
ربع كوب زيت
رشة ملح
رشة سكر
كوب كبير لبن
المقادير دى بتعمل 10 كريبات
والحشو لحمة مفرومة معصجة بالطريقة بتاعتك اللى بتحبيها ومش شرط لحمة مفرومة أى حشوة تعجبك أعمليها
أول حاجة هنعمل الكريب ونخلط المقادير بتاعته مع بعض وبعدين نصفيه ونسيبه يرتاح فى التلاجة نص ساعة وبعدين نعمله
ده هيبقى شكلها أول ما صبيتها فى الطاسة
وده لما قلبتها الناحية التانية
وهكذا لغاية أما نخلص كل الخليط وبعدين نحضر الحشوة بتاعتنا أنا عملت اللحمة المفرومة وحطيت عليها بصل وفلفل الوان وزيتون اسود بيبقى حلو مع الكريب وشوية جبنة رومى
أول حاجة هنجيب واحدة الكريب وندهنها بصوص أنا عملت صوص مستردة على كاتشب وده شكلها لما دهنتها بالصوص
وبعدين نحط الحشو زى كده
ونبتدى نقفلها على شكل مثلث أول حاجة هنتنيها بالنص
وبعدين ناخد الناحية الفاضية اللى مفيهاش حشو و نقفلها هتبقى على شكل مثلث كده
وهنعمل كل الكريبات التانيين بنفس الطريقة لغاية أما نخلص وبعدين نرصهم فى صينية علشان ندخلهم الفرن ينشفوا شوية ويبقى زى بتاع بره
وفى الاخر ده هايبقى شكله ساعة التقديم
ودى صورة أقرب
ودى طريقة تقديم تانية
كده انا خلصت ان شاء الله تجربوه ويعجبكم على ضمانتى ولو الموضوع عجبكم ياريت تقيموه علشان يتثبت مواضيع هذا القسم برعاية
مونة حبيبة هيما مونة حبيبة هيما images/avatars/pinkflower.jpg فتكات هايلة Fatakat 363931 السويس – مصر
سبحان الله و بحمده