ازيكم حبيباتي وحشتوني كتيييييييييييييير
النهرده هعلمكم تعملوا بيتزا احلى من
بيتزا هت بجد
وتحدددددددددددددددي
بجد لو جربيتها مش هتصدقي انها معموله في البيت
قبل ما ابدأ احب انوه عن اهم اساسايات العجين
اولا : الدقيق يكون نوعه ممتاز ونضيف
ثانيا : الخميره تكون جديده
ثالثا : مقاديرك تكون مضبوطه وكله بكوب واحد
وياريت يكون تستخدمي الكوب المعير خصوصا
للمعجنات والكيك
رابعا : العجن , كل ما تخدمي العجينه تخدمك وتطلع
زي الفل , بس لو ما اتعجنتش كويس وخدت وقتها
اللي هو 10 دقايق تقريبا مش هتبقى حلوه معاك
يلا نبدأ على بركه الله
بالمقادير:
4 كوب دقيق
1 و ثلث او 1 ونص كوب ماء دافئ ((على حسب نوع الدقيق ))
ربع كوب لبن بودر
2 ملعقه كبيره زيت زيتون
1 معلقه صغيره سكر
نص معلقه صغيره ملح
3 معالق صغار خميره جافه
الحشو :
فلفل رومي الوان ((اخضر و اصفر و احمر ))
جبنه شيدر و موزاريلا و رومي ((مبشورين))
زيتون اسود وا خضر شرايح
طماطم مكعبات
اي نوع لحوم تفضليه :
((مفروم معصج/سوسيس/قطع فراخ مشويه/سلامي/ تونه/قطع برجر مشوي))
الصوص:
**اذا تحبي تعمليها بعصير الطماطم :
هتشوحي بصله مفرومه ناعم صغيره
مع فصين توم مفرومين لحد ما يصفروا
في معلقه زيت زيتون
وبعدين تضيفي عصير الطماطم وشويه ملح
وسكر واوريجانو ((الزعتر البري)) وريحان
ورشه فلفل اسود
وسبيها تتسبك شويه .
**اذا تحبي تعمليها بالصلصه :
هتاخدي علبه صلصه وتخفيفيها بشويه ميه
وبعدين حطي معلقه صغيره خل ورشه
ملح وسكر و اوريجانو وريحان وفص ثوم مفروم
ومعلقه زيت زيتون صغيره .
ندخل على الطرييييقه:
نخلط الخميره والسكر والملح واللبن البودر مع بعض
وبعدين نحط الماء الدافئ (( الكوب وثلث )) ونقلب
وبعدين نحط الزيت ونقلب
بعد كده هنحط 2 كوب دقيق بس ونخلط
بعد كده هنضيف ال 2 كوب دقيق التانيين
ونعجن 5 دقايق اذا حسيتي انها مش راضيه
تاخد كميه الدقيق كلها ولسه مفروله هنضيف
شويه ميه خفاف ((2 ملعقه بالكتير)) عشان تتلم
ونفضل نعجن ونعجن 10 دقايق مش اقل من كده
لحد ما تبقى كده
شوفها شكلها ازاي ناعمه وتحفه وملمومه
بعد كده تتساب تخمر لمده نص ساعه
بس ادهني وشها بقليل من زيت الزيتون
((حطي نقطتين في راحه ايدك وادهنيها))
عشان ما تشققش
معلش نسيت اصور التخمير
بعد ما تخمر خديها وقسميها 3
الكميه ده تعملك 3 صواني وسط
وكميه كويسه من الميني بيتزا
انا اخدت جزئين عملتهم ميني
وجزء عملته صنيه كبيره
نولع الفرن على 200
وبعدين
نبدأ نفرد العجين على قليل من الدقيق
بالسمك اللي تحبيه بس خدي بالك انها لسه هتعلا في الفرن
يعني هترققيها لسمك اقل من اللي انت عايزاه
يعني لو عايزاها نص سم يبقى هتفرديها ربع سم
عشان بعد ما تتخبز هتبقى نص
بعد كده حطي الصلصه وبعدين رشه جبنه خفيفه
من انواع الجبن اللي عندك وبعدين حطي بقه
الطماطم والفلفل واللحوم اللي تحبيها والزيتون
واخيرا رشي رشه جبنه حلوه
وبعدين اخبزيها في الفرن الحامي اللي شغلناه قبل كده
((لو فرنك حلو وحامي مش هتاخد معاك اكتر من 5 دقايق
وياريتك تفضلي جنبها وهتحطيها على اخر رف ))
((لو فرنك حرارته وسط خليها 10 دقايق لحد ما تبقى
دهبي فاتح من تحت وبرضه على الرف اللي تحت ))
هنا بعد ما طلعت
شوفي كده :
هنا الميني فردتها وقطعتها دواير ودهنت الصلصه
وشيت الجبنه وحطيت الحشو زيتون وفلفل واجبان مشكله
وبعد كده خبزتها
وده الشكل النهائي
وده اقرب :
اظن الصور بتتكلم
الطعم خطير مالوش مثيل
ومحدش هيصدق انك انت اللي عملاها
ياااااااااااااااارب تكون عجبتكم ونالت رضاكم
اشوفكم على خييييييير مواضيع هذا القسم برعاية
روبي صلاح الدين روبي صلاح الدين 100206_1.gif فتكات ست الكل Fatakat 100206 جده – السعوديه