إزيكم يا قمرات …. يا أحلى فتوكات …. يالي في طبخ شيفات
بدون مجاملات …. و دي حقيقة و عن تجربات ….
إستفدت كتير من الموضوعات …. اللي بتكلم عن الأكلات
نخش بقى في الموضوع و كفاية مقدمات ….
انا ست بيت عادية جدا بعرف أعمل حاجات و حاجات تانية لأ
بس بصراحة كانت هناك مشكلة تؤرقني
وهيه اني مش بعرف أعمل محشي الكرنب
طب إزاي ست بيت مصرية مبتعرفش تعمل محشي الكرنب
بصراحة كنت بتكسف أقول مشكلتي و بضايق لما ألاقي زوجي
نفسه ياكل المحشي و انا مش قادرة آعمله له
مع أني شاطرة في المعجنات و أكلات تانية كتيير
بس حاسة ان في حاجة ناقصني
دورت في النت على طريقة عمل المحشي لاقيت كله مكرر ووخدين
من موضوع واحد المهم قلت لا أدور في فتكات أحسن
وجوجل سيرش اللى عملوه فوق سهل الوصول للي إنتي
عايزه لا قيت موضوعات حلوة لفتوكات هايلة
قريت أغلبهم و ركزت على النقط المهمة من هنا و هنا
لغاية ماستجمعت قويا و قررت أخطر قرار في التاريخ هههههه
اني أعمل محشي الكرنب و كمان ركزت على الأخطاء اللي
كنت بقع فيها قبل كده و مخليني عازفة عن فكرة عمل المحشي
الطريقة :
المقادير : كرنبة كبيرة
خلطة المحشي بقدونيس ، شبت ، كوزبرة
سمن
بصلة كبيرة
6 كوبيات رز
طماطم لعمل صلصة الرز
فحم صغير
الطريقة :
يتم تقطيع الكرنبة إلى ورق كبير و غسلة برقة حتى لا يتقطع
املي حلة ماء و اغليه مع وضع معلقة كمون
اسقطي فيه ورق الكرنب ورقة ورقة احرصي على عدم وضعها كتير في الماء يدوب نص دقيقة عشان لما تلفي متتقطعش منك ( أحد أخطائي السابقة )
و سأكمل باقي الخطوات تحت الصور ….
اما الخلطة : شوحي البصلة المقطعة و ضعي عليها عصير الطماطم
اتركيها تتسبك ثم ضعي خلطة و الرز و اتركيهم حتى الغليان اغلقي النار
اشعلي فحمة و ضعيها في فنجان به سمن أو زبدة و ضعيه بداخل الخلطة و احكمي غطاء الحلة و حتى لا يتسرب الدخان من الجوانب غطيه بفوطة ( أحد تكات الفتوكات ) بس ايه جامدة أخر حاجة
كررى عملية الفحمة مرتين او ثلاثة
اترككم مع الصور المصحوبة بالشرح
ده البصل المتقطع و الخضرة خلطة المحشي
سلق ورق الكرنب لا تضعي الورق أكثر من نص دقيقة في الحلة
شيلى العنق من الورقة و ابرميها بالطول
قطعي بشكل ده
إفردي كل واحدة و قطعيها مربعات زى كده و كده بقت جاهزة للحشو كررى العملية الى ان تنتهي من كل اوراق الكرنبة
وده شكله بعد ماتحشى و رصيته فيى الحلة قبل ماترصى حطى ورق كرنب كفرشة من تحت عشان ميتلسعش منك بعد كده جيبى مقدار كازرولة الا ربع شوربة و لو مش عندك شوربة ممكن مية و عليها معلقة سمنه و مرقة دجاج ماجي و معلقة ملح خليهم يغلو الاول و بعد كده حطيهم على حلة المحشي اصبرى عليهم لغاية ما يغلو و بعدين وطي النار و لو عندك شياطة حطيها من تحت عشان تبقى مطمنه هاتي طبق و حطيه على المحشي من فوق عشان يكبس
على المحشي و الورق و الرز ما يخرجش بره و يبقى شكله حلو زي ماحشتيه يفضل شكله متماسك للأخر
و ده بعد ما استوى يا جماله يا جماله
فاض شوية رز عملت بيهم محشي فلفل و بما ان الشعب يريد تقديم الاطباق اهوه اتفضلوا بالهنا و الشفا
يا ريت تقييم يا فتوكات مش عشان هو محشي كرنب بس عشان تشجعوني و ان التجربة نجحت و أصبحت من واحدة مش عارفة
إلى محترفة و ده بشهادة اللي داقوه و الفضل كله يرجع لله
ثم الفتوكات القمرات
بحبكم في الله
مواضيع هذا القسم برعاية
دانة الاسلام 10 دانة الاسلام 10 219828_11.gif سوبر فتكات Fatakat 219828 الجيزة – مصر