السلام عليكم يا قمرات
من فترة كده كنت زهقانة جدا و قررت فجأة انى هاعمل لجوزى أكل هندى
أهو اعمل مفاجعة و تغيير بقى
و طلعت حلوة اوى و تغيير كمان فعلا
فا قلت أنزلها لاحلى أصحاب و اخوات ليّه
بس يارب الموضوع ينزل فى الجديد و الا هتجيلى صدمة نفسية و عصبية من كتر ما مواضيعى مش بتنزل فى الجديد
هاندخل على المهم بقى و ابطل رغى حاضر
بسم الله
المقادير :
نص كيلو صدور فراخ متقطعة شرايح
معلقة كبيرة توم مفروم
حبة فلفل حار متقطعة شرايح صغيرة ( انا حطيت فلفل رومى و قطعت شرايح طويلة )
بصلة متقطعة صغير
معلقة كبيرة زنجبيل طازج مبشور
معلقة كبيرة من بهارات الجراماسالا
معلقة كبيرة كارى
نص معلقة صغيرة كركم
نص معلقة صغيرة كمون
ملح و فلفل
شطة ( اختيارى )
( انا محتطش شطة لان الجراماسالا اصلا سبايسى فا قلت كفاية كده بس جوزى بيحط على طبقة لوحده شطة برضه )
نص كوباية كزبرة خضرا
كوباية حليب جوز الهند
3/4 كوباية مرق او شوربة فراخ
نص كوباية كريمة ( اختيارى )
و دى صورة اقرب للمقادير بدون الفراخ
اول حاجة هنتبل الفراخ بنص كمية البهارات اللى فاتت
( يعنى من كل نوع بار ناخد نصه نتبل بيه الفراخ و النص التانى نسيبه شوية )
و نسيبها نص ساعة فى التتبيلة
نحط شوية زيت على النار اول ما يسخن نحط البصل و شوية ملح و فلفل و نشوحهم
و بعدين نضيف التوم و الزنجبيل
و بعدين الفلفل الأخضر ( طبعا المفروض يبقى فلفل سبايسى بس انا جبانة و بخاف من الشطة )
و بعدين نحط باقى البهارات كلها
و بعدين نحط الفراخ المتبلة
نحمرها لحد ما تتحمر و تستوى تقريبا
( معلش الصورة عندها حول شوية )
نضيف المرق او الشوربة
و بعدين نضيف لبن جوز الهند
نهدى النار و نسيب الفراخ تشرب شوية من المرق و اللبن
لما نلاقى الصوص قل شوية
( انا مش بحب تكون غرقانة فى الصوص بحب يكون فيه صوص اه بس مش كتير يعنى)
نحط الكزبرة الخضرا( حطى تلت ارباع المقدار اللى عندك عشان الباقى هانزين بيه الفراخ )
اول ما الكزبرة دبلت ضيفت عليها الكريمة
( ده سبب انى بحب الصوص قليل عشان الصوص بعد اضافة الكريمة ما يبقاش سايح كده لا يبقى وسط)
تابعونى المشاركة اللى جاية مواضيع هذا القسم برعاية
zatoona magnoona zatoona magnoona 479996_3.gif سوبر فتكات Fatakat 479996 jeddah – saudi arabia