وحشتونى يا فتوكات
النهاردة حنعمل دجاج تكا والعيش البورى
اللى بيتقدم فى المطاعم باسهل طريقة
واحلى طعم ان شاء الله
دى صورة الفراخ
وده العيش البورى
المقادير
4 صدور فراخ مش مخلية بعظمها
وممكن انتى تستخدمى فرخة كاملة
(بس تقطيعها 8 او اكتر حسب حجم الفرخة)
لبن رايب او زبادى
كل البهارات اللى متوفرة عندك
م صغيرة كارى او كركم
م ص صلصة طماطم
م.ص كاتشب
م.ص زعتر
معلقة كبيرة توم بودرة
2معلقة زيت كبيرة
عصير ليمونة
م.ص جنزبيل
ملح وفلفل وشطة
م.ص بابريكا
م.ص حبهان مطحون
م.ص كسبرة
م.ص كمون
الطريقة
نخلط كل المقادير مع بعضها
نجهز الصدور انا شيلت الجلد ممكن تسيبيه بس كده احسن بيشرب من التتبيلة
وبيبقى اخف علشان اللى عاملين دايت ميقولش انى حبوظ الريجيم
ننقعها فى التتبيلة ليلة كاملة فى التلاجة
ودى بعد النقع
بالنسبة للتسوية
نسخن الفرن ونخليه على 200
ونحط الفراخ على الشبكة
وتحتها صينية الفرن
مينفعش نحطها فى صينية علطول
واللى تحتها دى صينية فيها بقية التتبيبلة وحطيت فيها مية
علشان تطلع بخار على الفراخ تسويها بسرعة ومتنشفش
اذا نشفت المية زودى تانى مفيش مشاكل
طبعا بتقلبيها كل شوية علشان تستوى من الناحيتين كويس
بعد ساعة تقريبا
ودى بعد ما استوت
طبعا لو حد خد باله ان الصدور بعد ما كانوا 4 بقوا تلاتة
وده لان بنوتى عجبها شكل الفراخ فى الفرن
وخدتها قبل ما اصورها
انا عملت نصف كوباية دقيق
عليهم نصف معلقة زيت
وربع معلقة بيكنج بودر
ورشة ملح
ومية للعجن
المقدار ده طلع رغيفين
لو حتزودى حتعملى كوباية دقيق يبقى عليها معلقة زيت
ونصف معلقة بيكنج بودر
نعجن العجينة ونسيبها ترتاح
وكل ما ترتاح حتحسى بالفرق فى ملمس وشكل العجينة
شوفوا ده شكلها اول ما عجنتها
وده بعد ما ارتاحت
قسمتها جزءين
بنقليها فى زيت غزير فى حلة مش حينفع طاسة
وتخلى بالك لانه بيستوى بسرعة
يعنى افردى العيش كله وخليه جاهز
وخدى من الزيت وحطى على وش العيش عشان يقب معاكى
العيش ده بيتاكل سخن يعنى اعملى على الاد
وكمان مش بيشرب زيت خالص ودى ميزة جميلة فيه
يارب الموضوع يكون عجبكم
والوصفة تكون سهلة واكون افدتكم ولو بمعلومة بسيطة
فى امان الله يا بنات ومتنسوش التقييم
مواضيع هذا القسم برعاية
فتاة المهمات الصعبة فتاة المهمات الصعبة 190913_15.gif Fatakat 190913 الرياض – السعودية