حبايبي الحلوين
وحشتوني كلكو
وخصوصا شله الملاحيس باباعتهلم سلام خاص ملحوسه ملحوسه
يلا نشوف كفته نوسه الكفته المهووسه
نص كيلو لحم مفروم به نسبه من الدهن
بصله كبيره -ربع معلقه توم مفروم -بقدونس- فلفل رومي وقرن واحد حامي- نص معلقه صعيره من بهارات وتوابل الكفته ملح وفلفل اسود وقرفه
نشوح البصل لحد ماللون يصفر
نحط توم وملح وفلفل وبهارات وقرفه علي البصل ونقلبه كويس
ونضيفهم للحمه والبقدونس المفروم والفلفل وباقي التوابل ونعجن الكل جيدا
نسيبها ترتاح شويه في التلاجه
نصبعها باي شكل نحبه او نعمل اشكال متنوعه
تدخل الفرن لحد ماتستوي كويس وميتها تنشف
نولع فحمه كبيره ونحطها في بوله فيها زيت ونقفل عليها
تزين وتقدم
وده طبق تاني
والان مع تكات نوسه التكات المدروسه 
1- تشويح البصل مهم جدا لان ده اللي بيدي طعم مسكر وطراوه للكفته
لان البصل وهو ني ليه طعم لاذع ومش لطيف لكن لما بيتسوي شويه بيبقي طعمه مسكر وجميل وطبعا بيفرق في الطعم النهائي للكفته
2- التوم هنا اختياري لكن انا باحب طعمه في الكفته اللي مش بحبه مش لازم
3- ناس كتير بتضيف بقسماط للكفته وده اللي بيخليها ناشفه قوي وتقيله
طيب ليه اصلا بتضيفوا بقسماط
علشان البصل المبشور بينزل ميه البقسماط المفروض اه بيمتص الميه دي علشان الكفته متفكش تمام
احنا هنا مشوحين البصل يعني مافيهوش اي ميه وبالتالي مالوش داعي خالص البقسماط
4- لو هانعمل حواوشي نكتر البصل ونخلي شويه علي جنب ندعك بيهم الرعيف من جوه قبل مانحط اللحمه هايبقي زي الجاهز بالظبط
5- القرفه من التوابل اللي بتمشي حلو قوي مع اللحمه يعني كفته كباب حله او اي نوع من اللحوم يفضل نحطله قرفه
6-يفضل اننا نصبع الكفته علي ايد معلقه خشب او اي شئ مشابه علشان يكون قلبها فاضي ومتاخدش سوا كتير
7- ينفع قوي ننقل الكفته علي الشوايه بعد متشرب ميتها علشان تتحمر من بره وتاخد علامات الشوي
8- لو مافيش شوايه هانعمل خطوه الفحمه وهي
نجيب فحمه كبيره قوي او فحم كتير نحطه علي النار ولما نتاكد انه كله ولع كويس نحطه في بوله او قالب كريم كرامل ونحط الفحم كله في البوله ونحطها في حله
نحط الكفته حوالين بوله الفحم ونحط شويه زيت فوق الفحم ونقفل فورا علشان تحتفظ بالدخان
ملحوظه : عملتها قبل كده بفحمه عاديه متوسطه ماخدتش وقت وانطفت وبالتالي الريحه مامستكش كويس في الكفته
لكن المره دي كترت الفحم قوي وكان الدخان كتير وعمل طعم جميييييييييييييييييييييييل
اذن كتروا الفحم علشان طعم الشوي يبقي واضح وظاهر قوي
واخيرا
باحبكو كلكو
والي لقاء اخر مع اكله جديده من اكلات نوسه
ورمضان كريم قوي مع نوسه
ده كمان رابط رز الريزو وطبعا مع وصفه جديده
اتمني يعجبكو
رز الريزو …..الوصفه الاصليه
مواضيع هذا القسم برعاية
نوسه الملحوسه نوسه الملحوسه فتكات غالية قوي Fatakat 269320 التجمع الخامس – مصر