ازيكم يا احلى فتوكات وحشتونى كتير بقالى كتير منزلتش مواضيع
وان شاء الله النهارده هانزل موضوع سهل جدا وعلى فكره
حلوه جدا الافكار دى فى اى عزومه ندخل على المفيد
بصوره تجويعيه
الكوردن بلو او رولات الفراخ المحشيه
وطبعا الحشو متروك ليكى انتى وطبعا حسب المتوفر والسهل
صدورفيليه وياريت تكون شرائح عريضه انا اكتشفت
ان الشرائح بتاعتى مش عريضه بس برده عملتها هههههههه
انا لاقيت ان الشرائح اللى جايا من عند الراجل تنفع بانيه
ودا اخرها بس حاولت ارقق القطع اللى موجوده عندى واستخدمتها
برده ……
المقادير
نص كيلو صدور فيليه او بانيه
ودا شكلها بعد ما رققتها وطلعت اللى مش هينفع يتعمل رولات
عشان اعمله بانيه ودا شكلهم
التتبيله عباره عن (مية بصل وملح وفلفل وبهارات لحمه وملعقة
مسطرده وملعقة كاتشاب وصويا صوص وذرة قرفه وليمونه وخل )
ودا شكلها
وطبعا نمسك قطعه قطعه ونحطها تحط كيس وندقها كويس
عشان تكون رقيقه وتنفع تتلف رول كده
وكده حطيتهم فى التتبيله ولو من بليل يكون افضل واطعم
وجهزت الحشوه انا عملتها بالبيف وجبنه موتزريلا
وشوحت بالبيف الاول عشان يفك من بعضه
ودا شكلهم
وجبت شريحه وحطيتها كده وحطيت شويه من الحشوه والفها
ومن غير ما احط اى حاجه مش هتفك يعنى ولا دوباره ولا
خيط ولا خله كده
والفها واحطها الاول فى دقيق وبعدين بيض ولبن مضروبين مع بعض
وبعدين بقسماط كده
وبعدين فى زيت غزير واقلى الرولات كده
وعملت من الشرائح اللى عندى اللى مش تنفع تتلف
عملتها بانيه عادى وقسمت الكميه عندى على يومين
ودا اللى انا عملته
وبعدين انا قدمت اكلة النهارده مع مكرونه بشاميل وسمبوسه
ثانيا ::الحلو صينيه بسيمه
وبصراحه انا واخده فكرتها من عمرنا ومراميرو جزاهم الله كل خير
المقادير
2كوب جوز هند
نص كوب دقيق
نص كوب سمن
نص ملعقة بيكنج باودر
نص كوب سكر
كوب الا ربع لبن (استخدمت لبن نيدو)
ضربت السكر واللبن والسمن والبيكنج باودر فى الخلاط
ودا شكلهم بعد المزج
وبعدين حطيت الدقيق وجوز الهند ويادوب بس تقلبتين
يمتزجوا ببعض مش اكتر عشان الترميله متروحش
ودا شكلهم
واكون ساعتها بجهز الشربات
انا عملت نص كوب سكر مع كوب ماء ولما يغلى احط
عصير ليمونه وقبل ما انزله من على النار احط رشة فانيليا
وبعدين جبت صينيه دهنتها سمنه ورصيت الخليط كده
وقطعتها وحطيت لوز مقشر حطيت اللوز فى ميا مغليه عشان
انزع القشر منه ودخلتها الفرن بتاخد تلت ساعه من فوق
ومن تحت كله على بعضه يعنى
وكده خرجت من الفرن وعلى طول نزلت عليها بالشربات
كان سخن على فكره وماشاء الله شربت الشربات كله على طول
ودا من عوامل نجاحها
وطبعا نسيبها تبرد خالص عشان مش تتهرى مننا نسيبها
ساعتين ولا اكتر عشان القطعه تطلع سليمه مش مهريه
كده
وكده الحمد لله خلصت وياريت الدعوه الحلوه والتقييم
وان شاء الله الموضوع يعجبكم
مواضيع هذا القسم برعاية
mero_sh mero_sh 326490_4.gif فتكات غالية قوي Fatakat 326490 الدقهليه – القاهره