السلام عليكم ورحمة الله وبركاته
اسمحولي اكتب طريقة ماما في محشي الخرشوف … طعمه رهييب .. ده غير قيمته الغذائيه
نبدأ بسم الله
الاول بتجيبي الخرشوف وتنظفيه (طريقة التنظيف في اخر الموضوع)
وتحطيه في ميه فيها ملح وليمون ومعلقتين دقيق علشان مش يسود
بعد ما تخلصي تنظيف الكميه كلها صفيه من الميه واغسليه كويس
رصيهم جنب بعض في حله واسعه او صينيه لها غطا
وزودي عليه شوية ميه اوشوربه مغليه صغيرين خالص وعصير ليمون كتير ورشة ملح علشان مش يسود
وكل ما يحتاج ميه زودي له علشان مش يفقد القيمه الغذائيه بتاعته
لحد لما يستوي وميته تنشف (لما تدخلي فيه الشوكه تدخل بسهوله) وبدون ما يتهري .. وسيبيه يبرد على جنب
جهزي حشوة لحمه معصجه
بصل مفروم ولحمه مفرومه وفصين ثوم مفرومين وتقلبيهم على نار عاليه لحد لما تستوي اللحمه والبصل وتظبطي الملح والبهارات والفلفل
احشي وحدات الخرشوف باللحمه المفرومه واضغطي عليها كويس
ليها طريقتين
1- الطريقه الاولي في الفرن(مناسبه للعزومات)
ترصي الوحدات المحشيه في صينيه
وتعملي لها تسبيكة طماطم
في حله تحمري فصين ثوم وتضيفي عصير طماطم ومعلقتين صلصه وتظبطي الملح وتسيبيها تتسبك
وبعدين تغطي كل واحدة خرشوف بالصلصه دي وترشي عليهم رشة جبنه موتزاريلا ورومي
وتدخليهم الفرن تحت الشوايه علشان الجبنه تسيح … بيبقى جميل جدا
او ممكن تغطيها بالبشاميل والجبنه بدل الصلصه
او تخلطي مع الحشوه صلصة طماطم ويتغطى بالبشاميل والجبنات
وبنفس الطريقه بنعمل معاها بطاطس محشيه (بطاطس صغيره تقوريها وتسلقيها ثلاث ارباع سوا وتعمليها بنفس الطريقه)
2- الطريقه التانيه مقلي
بس لازم تحطيهم في الثلاجه بعد ما تحشيهم علشان تتماسك الحشوه مع الخرشوف وماتفكش في الزيت
وبعدين تغطيها ببيض وبقسماط من الناحيتين
وتقليها في زيت غزير … الاول بتنزلي الوحدات في الزيت على وجهها يعني الجزء اللي فيه اللحمه لتحت علشان يتماسك الوجه الاول وبعدين تقلبيها
وتتقدم مع رز وسلطه او مع مكرونه بشاميل
وبالف هنا وشفا
نيجي بقى للهدايا
ازاي تختاري وحدات الخرشوف المناسبه للحشو
في المشاركه دي
https://forums.fatakat.com/showpost.p…0&postcount=13
طريقة تنظيف الخرشوف (الصور من موقع اجنبي للتوضيح)
——————
1- تشيلي الورق الاخضر الخارجي .. تقطمي واحده واحده بايدك علشان يتشال بدون ما يشيل معه جزء من اللحم
لحد لما توصلي لورق رفيع ابيض في بنفسجي .. خلي بالك لانه بيبقى بيشوك
بالسكينه اقطعيه بالعرض قريب من القرص
2- هتحصلي على القرص بدون ورق … بسكينه حاده جدا قشري القرص من الخارج علشان تشيلي الاجزاء الخضراء الباقيه من الورق لحد لما يبقى لونه ابيض من الخارج
3- باستخدام طرف السكينه المدبب او بمعلقه.. ابدئي اكحتي القرص من الداخل لازالة الشعيرات الموجوده وتنظيفه جيدا وبالسكينه ساوي حواف القرص من فوق
حطيه بسرعه في ميه وعصير ليمون كتيير ومعلقتين دقيق وملح علشان مش يسود
وكملي باقي الكميه
طريقة التخزين
————
اغلي ميه على النار وضيفي لها ملح ليمون(رشه خفيفه) او عصير ليمون كتييير
صفي الخرشوف المتنظف من الميه بالليمون … واغسليه جيدا
سقطيه في الميه المغليه بالليمون وسيبيه 3 دقايق بعد ما الميه تغلي
صفيه وعبيه في اكياس حسب الوجبه واحفظيه في الفريزر
اترككم في رعاية الله
اتمنى تجربوه ويعجبكم مواضيع هذا القسم برعاية
مرسم مرسم 138950_1.gif فتكات ست الكل Fatakat 138950 الاسكندريه – مصر