ازيكو يافتافيك
ايه رايكو فى حلة ورق العنب دى؟
https://files2.fatakat.com/2016/6/13400259508088.jpg
النهاردة صحيت من النوم كده نفسى اكل حاجة جديدة وقلت يابت بقا بقالك سنتين بتدخلى فتكات ومش عارفة تعملى حاجة جديدة ….. قلت مابدهاش بقا …………. اتجهت على طول على الفريزر وقلت باسم الله وفتحته لقيت كيسين مقابلنى واحد فيه ورق عنب والتانى فيه نص كيلو لحمة مفرومة قلت يابت اعملى حاجة جديدة وقد كان
محشى ورق العنب باللحمة المفرومة
جبت شوية ورق العنب الى عندى وقلت نصه هحشيه بربع كيلو لحمة بس والربع التانى هحطه على خلطة الرز واقلبهم واهو برده تغيير
وعملت خلطتين
اول خلطة الى هى اللحمة السادة
خلطت على ربع كيلو اللحمة 3 معالق بقسماط مطحون
وبصلة كبـــــــــــــــــــــــــيرة وبقدونس وكزبرة وشبت
وكمان بيضة صغننة ومعلقة صلصة ( مش عاوزين مية كتير)
حطيت ملح وفلفل ومعلقة بهارات ونص معلقة قرفة مطحونة
قلبتهم كلهم سوا وبعدين بقيت احشى ورق العنب بالظبط زى ابو رز ورصيته لوحده فى حلة صغيرة
وسقيته بالشوربة مع عصير ليمونتين ومعلقة صلصة
هتقوليلى ماهو فيه لحمة هو لازم شوربة ؟
هقولك الشوربة بالليمون لما تقصر وتعقد وتركز كده بتديكى طعم ينسى الدنيا وعموما انا جربتها بالمية وبالشوربة وطبعا بالشوربة احلى
هتقوليلى طيب هحط مرقة دجاج واهى تدى نفس النتيجة
هقولك اوعـــــــــــــــــــــــــــــــــــــــــــــــ ـــــــــــــــى انا بروح للجزار وبشترى (مواسير) يعنى العضم بتاع الدبيحة وبعامله زى اللحمة وبسلقه وباخد احلى شوربة وكمان العضم بيبقا مليان قراقيش زى الكوارع والشوربة بتبقى مليانة جيلاتين وده مهم جدا للاعصاب والمفاصل وكمان العضم مليا ن نخاع وده بقا كله غذا
وكمان انا باخد شوية من النخاع ( اسيحه على حمام مية واصفيه واحط عليه مجموعة زيوت للشعر وزيت عطرى وباستخدمه كفازلين للشعر هتقوليلى يع ده يبقى زفر اقولك والله ابدا ابدا مالوش اى ريحة
واحدة شاطرة هتقولى بتشترى قد ايه عضم بقا ؟
انا بروح للجزار واجيب 3 مواسير وبقوله يكسرلى الواحدة على 3 قطع علشان الحلة بتاعتى صغيرة والماسورة الواحدة ب 2 جنيه ونص
والماسورة الواحدة بتكفينى 3 مرات اطبخ بيها ولو عاوزة تستعمليها كلها مرة واحدة انتى حرة والشوربة ماتفرقيهاش عن اللحمة وبلا مرقة بلا قرف منال العالم ومحمد فوزى واسامة السيد حذروا منها وقالوا انها فيها بلااااااااااااااااااااوى
المهم خلاص سقينا الحلة وحطيناها على عين نار هادية
هتقوليلى اللحمة هتستوى؟ هقولك اه هتستوى وهتمسك فى بعضها ومش هتطلع من ورق العنب زى الرز
بس تخليها تاخد غلوة على نار متوسطة الاول وبعدين تهدى عليها النار وبعد نص ساعة كلى احلى ورق عنب بالكفتة
تانى جزء الى بالرز عملته كالاتى
حمرت البصلة والتومة فى زيت (انا بحط السمن على وش الحلة فى الأخر) وحطيت عصير طماطم ومعلقة صلصة وسيبتهم لما اتسبكوا شوية مش اوى
حطيت الرز والكمون والكزبرة والفلفل الاسود والنعناع والبهارات المشكلة ولو عاوزة تحطى عصير ليمون اوك انا اوقات بيبقى عندى دبس رمان بحطه كمان ولو عندك منقوع تمر هندى مركز وطبعا من غير سكر يعنى معلقتين كده اهو اى حاجة بتدى مزازة وحموضة بتخلى ورق العنب تحففففففففففة
انا مش بكتر الرز وبخليه مش باين فى الخلطة على فكرة وتحطى كمان الخضرة بتاعتك يعنى لو عاوزة بقدونس او كزبرة او شبت او كرفس اى حاجة
وفى تكة كده كنت اخترعتها ولقيت فتوكة كمان مخترعاها زيي وبتدى طعم حلو اوى
انا بحمر نص البصل فى الزيت وبقية البصل بفركه فى الملح والفلفل زى رز حشو الطيور وبضيفه على الخلطة على البارد كده
انا الحلل بتاعتى استانلس يعنى بتحتفظ بالحرارة اوى وبتنطر الرز من ورق العنب فاكتشفت انى لما احط طبق على وش المحشى برده بيستوى بس الفرق انه بيبقى له شخصية
تقدرى تفرشى ارضية الحلة بطرنشات بصل او بطاطس او طماطم او وراك فراخ وبين الطبقات ارمى فصوص توم مش مقشرة بس مغسولة طبعا ودوقى احلى ورق عنب واحلى توم مستوى على البخار يم يم يم يم
يارب تعجبكوا اكلتى وجربوها وعلى الله تعجبكوا
وفى النهاية احب احلكم كام صورة لورق العنب طبعا مش من تصويرى ولكن حاجة تفتح النفس
https://files2.fatakat.com/2016/6/13400261017998.
ودى والمحشى بيتدلع فى الحلة
https://files2.fatakat.com/2016/6/13400261451042.jpg
ودى فكرة عجبتنى وممكن تعملوها فى بوفيه عزومة ولا خطوبة هتبقى حلوة اوى
https://files2.fatakat.com/2016/6/13400261977171.jpg مواضيع هذا القسم برعاية
كيكة شيكولاتة كيكة شيكولاتة 337732_1.gif فتكات هايلة Fatakat 337732 قاهرة المعز – مصر اجمل بلاد الله
