الأكلة دي ميزتها انها اقتصادية وموفرة لمصروف البيت مفهاش لحمه مفرومة وفي نفس الوقت تحتوي على جميع العناصر الغذائية لأن فيها بروتين من اللبن وفيها خضار (كوسا وجزر) وتبقى احلى لو عملتيها بالشوربة بس مش لازم
المقادير: لعمل صينية بايركس متوسطة هنحتاج :-
كيلو ونصف كوسا مجزعة (مقشرة) مقطعة شرائح بطول اصبع اليد الصغير وعرض اصبعين صغيرين
بصلة مبشورة
جزرتين كبار شويه او جزرة كبيرة اوي مقطعة اصغر بكتير وارفع من الكوسا
كوب الا ربع دقيق
2 م ك مملوءة سمن
ملح وفلفل
لبن
بيضه وممكن تستغني عنها
شوربة وممكن تستغني عنها
نصف مكعب ماجي ممكن تستغني عنه
الطريقة:
الاول هنحضر الخضار نشوح البصلة عالنار اول ماتبدأ تصفر نضيف ليها الجزر وبعده الكوسا ونضيفله شوية ميا عشان يستوي فيها وملح وفلفل
ونحضر البشاميل نشوح الماجي وبعدين الدقيق في السمن ونضيف لبن سائل بالتدريج عشان ميكلكعش ولو كلكع اضربيه في الخلاط
وممكن تضربي من الاول كمية الدقيق مع نصف لتر لبن وتحطيع عالنار عالسمن والماجي ولو عندك شوربة هتنقصي اللبن شوية وتضيفي الشوربة وفي الحالتين ضيفيله مغرفة مليانه او مغرفتين من ماية غلي الكوسا بتاعتنا ثم اضيفي بيضه قبل ماتطفي بشويه وضيفي الملح والفلفل وهتكوني مولعة نار هادية وبتقلبي لغاية ما يتقل ويبقى سميك .. هتجيبي الخضار اللي عملناه وتحطيه في الصنية وتقلبي عليه نصف مقدار البشاميل والنصف الثاني صبيه عالوش وممكن تدهني الوجه سمن وترشي بقسماط مطحون بسيط كده لزوم القرمشة وتولعي من تحت شوية ومن فوق شوية صغيرين .. يعني ممكن ربع ساعة من تحت و5 او 10 دقايق من فوق حسب فرنك وحسب سمك البشاميل اللي وصلتيله والمده اللي عملتيه فيها عالنار وفي جميع الاحوال هيبقى زي الفل ان شاء الله ومش هيفشل اهم حاجة يبقى سايح شويه قبل ما تحطيه في الفرن
وبالهنا والشفا
نسيت اقولكم انها من افتكاسي بس هايله هايلة هايلة واسئلوا جوزي وعلى ضمانتي مواضيع هذا القسم برعاية
بنت الحور بنت الحور فتكات رائعة Fatakat 63376 المدينة الفاضلة 🙂 – مصر