السلام عليكم و رحمة الله و بركاته
ازيكم يا أحلى فتوكات فى الدنيا ؟
انا لاحظت ان كتير منكم بيسأل عن الطبخ فى الميكرويف
و ان أغلبكم بيستخدمه فى التسخين و فك التجميد بس
بينى و بينكم انا كمان كده هههههههه بس بصراحة لو على التسخين و فك التجميد بس يبقى كفى و وفى و يستاهل 100 بوسة كمان
بس قلت زى ما بيريحنا كده ف التسخين يبقى اكيد هيريحنا ف الطبخ كتير
و رحت دعبست و دورت ع النت لحد ما طلعتلكم بالمفيد
و اكتشفت انه طلع اختراااع يا كوتش
يلا نبدأ ..
————————————————————————-
أولا : البطاطس الشيبسى
" و دى جربتها شخصيا و طلعت حلوة اوى فعلا "
الصورة مالهاش علاقة بالفيديو بس عجبتنى قلت اوريهالكم
الطريقة :
بتقطعى البطاطس شرائح شيبسى
تغسلى الطبق الازاز الدوار اللى هو بتاع الميكرويف اصلا ده
ترشى عليه اى زيت بسبراى ولو مش عندك ادهنيه خفيف
افرشى شرائح الشيبسى عليه و رشى عليها الملح و اى نكهة تحبيها
حطيه ف الميكرويف و اظبطيه على الhigh power لمدة خمس دقايق
و استمتعى بأحلى طعم و قرمشة
و وداعا للقلى و الزيت و الطرطشة
كده وفرنا وقت و جهد و زيت و مواعين
و ده الفيديو اللى بيوضح الطريقة
https://www.youtube.com/watch?v=MJZby…eature=related
————————————————————
ثانيا : بسكويت سريع جداااا
الطريقة :
اضربى بياض بيضة مع 300 جرام سكر بودرة
و لو حابة تحطى فانيليا او اى نكهات بتحبيها حطى
هاتعمل عجينة .. اعمليها كور و رصيها ف صينية بيركس او بورسلين
و خلى بالك سيبى بينهم مسافة كبيرة عشان بينفش
و دخليها الميكرويف و اظبطى على دقيقة واحدة
و استمتعى بالبسكويت المقرمش … فى اسهل من كده ؟؟
اعتقد ده هيعجب الاطفال اوى
————————————————————
ثالثا : طريقة بديلة لسلق الكرنب
الطريقة :
هاتجيبى الكرنبة و تقطعى الراس بتاعتها بحيث تسيب حفرة كده ف الكرنبة
لان دى اللى هايتبخر منها الماية و تسوى الكرنبة
و تغطيها بمناديل المطبخ و تبلى المناديل دى بالماية بردو
و تدخليها الميكرويف لو صغيرة بتاخد من 7-9 دقايق و لو كبيرة بتاخد لحد ربع ساعة
و وداعا لسلق الكرنب و الروايح الجميلة اللى بنشمها ههههههه
و فى طريقة تانية من غير مايكرويف قالها الشيف بردو
و هو انك تقطعى راسها و تحطيها ف كيس و تدخليها الفريزر
و طلعيها تانى يوم هاتلاقيها بعد ما تفك سهل الورق بتاعها يتلف و يتحشى على طول
و ده الفيديو اللى فيه الوصفتين اللى فاتو
https://www.youtube.com/watch?v=qa0Dyj2_mC0
————————————————————
رابعا : الارز الابيض
كوب و ربع رز ابيض مغسول و متنشف
بتحطى عليه 3 كوبايات مية عادية مش سخنة
و معلقة صغيرة زيت و معلقة صغيرة ملح
و تحطيه ف الميكرويف 14 دقيقة
و استمتعى بأحلى رز ابيض مفلفل
و وداعا للرز اللى بيشيط و بيلزق ف الحلة و اللى بيطلع معجن
عادى عادى احنا ستر و غطا على بعض
و ده الفيديو اللى بيوضح الطريقة
https://www.youtube.com/watch?v=SQBw5n7FN-Q
—————————————————————-
خامسا : البطاطس المهروسة
الطريقة :
هاتى اربع بطاطسيات متوسطات حلوين كده
و اغسليهم كويس بس ماتقشريهمش
القشرة دى هاتشتغل زى الساونا كده تحفظ الحرارة جواها فتسوى البطاطس كويس
حطيهم زى ماهم كده فى العلبة الخاصة بالميكرويف بس خرمى كل واحدة بشوكة من 5 – 10 مرات كده
و اظبطى الميكرويف على الhigh power لمدة 8 دقايق
طلعيها .. سيبيها شوية تهدى .. اهرسيها او قطعيها مكعبات براحتك .. و حطى الاضافات اللى تحبيها
هو هنا حط ملح و فلفل و زبدة و لبن
البطاطس المهروسة احلى وجبة للاطفال و الكبار
ده الفيديو اللى بيوضح الطريقة
https://www.youtube.com/watch?v=jOrtZBQd6CY
—————————————————————
سادسا : البيض
" سهلة و مناسبة للاطفال يعملوها بنفسهم "
الطريقة :
اكسرى البيض ف ماج او سلطانية
حطى عليه شوية لبن
و ملح و فلفل
و قلبيه و غطيه
حطيه ف الميكرويف لمدة 45 ثانية
طلعيه قلبيه تقليبه كده
و حطيه لمدة 45 ثانية كمان
و استمتعى بأحلى بيض من غير سمنة ولا زيت
ده الفيديو اللى بيوضح الطريقة
https://www.youtube.com/watch?v=evqKB…eature=related
—————————————————————
سابعا : البودينج
" شبه الكريم كراميل او الكاسترد كده "
" الصورة دى من مطبخى بس مكنتش عاملاه ف الميكرويف ساعتها "
الطريقة :
هانعمل الاول صوص الكراميل
هاتحطى معلة صغيرة سكر مع معلقة صغيرة ماية و قلبيهم كويس
و دخليهم الميكرويف و اظبطى على 500W لمده 2-3 دقايق هايتحول لونهم بنى
بعد ماتخرجيهم ضيفى عليهم معلقة صغيرة ماية سخنة و قلبيهم كويس
بعدين حطى الصوص ف الاطباق اللى هاتحطى فيها البودينج
دلوقت هانحضر البودينج
اكسرى بيضة مع معلقة كبيرة سكر و قلبيهم كويس
بعدين ضيفى 150سم لبن
و حبة فانيليا لو عندك
و قلبيهم كويس بعدين صفيهم بمصفاة رفيعة
صبيهم ف الاطباق فوق الكراميل
هاتى طبق غويط و حطى فيه ماية و حطى فيه اطباق البودينج و غطيهم بالبلاستيك الشفاف
و دخليهم الميكرويف و اظبطيه عند 500W لمدة 5-7 دقايق
و بعد ما يخلص ما تشيليهوش على طول سيبيه خمس دقايق كده بعدين افتحى الميكرويف و خديه
اقلبى الطبق بأة ف طبق مسطح بحيث يبقى الكراميل من فوق
و استمتعى بأحلى بودينج
ده الفيديو اللى بيوضح الوصفة
https://www.youtube.com/watch?v=pqL0K7W3lqA
يلا نكمل شوية وصفات كمان من تجميعى
—————————————————–
ثامنا : خبز الذرة
الطريقة :
هاتخلطى كل المكونات اللى هاقول عليها دى كلها فى صينية بتدخل الميكرويف
نص كوب دقيق + نص كوب دقيق ذرة + معلقتين كبار سكر + معلقتين صغيرين بيكنج بودر + ربع معلقة صغيرة ملح + بيضة واحدة + نص كوب لبن + معلقتين كبار زيت نباتى
هايطلع الخليط بالشكل ده
دخليه الميكرويف و اظبطى على ال high power لمدة 3 دقايق
و اختبريه بالسكينة انك تدخليها و تطلع نضيفه
لو محتاج سوى كمان زودى دقيقة او دقيقتين مثلا
و ف الاخر قطعيه و قدميه بشكل حلو على السفرة
—————————————————————
تاسعا : القرنبيط بالجبنة و الصوص
الطريقة :
هانجيب قرنبيطاية و نقطعها وردات صغيرة و نغسلها و نصفيها من المية
بعدين نحطها ف طبق غويط و نغطيه ببلاستيك شفاف و نعمل فيه شوية خرم بالسكينة عشان نسمح للبخار يطلع
و ندخله الميكرويف و نظبط على الhigh power لمدة من 5- 7 دقايق لحد ما يستوى
و بعدين ف سلطانية تانية صغيرة هاتخلطى نص كوباية مايونيز مع ربع كوب ماسترد و نصب الخليط على القرنبيط
و نرش على الوش نص كوب جبنة شيدر مبشورة
و نرجعهم تانى الميكرويف مدة دقيقتين لحد ما الجبنة تسيح ع الوش
بس كده و قدميها مع اى حاجة تحبيها بالهنا و الشفا
————————————————————-
عاشرا : الفشااااار حبيبى
الطريقة :
لو هاتستخدمى علبة ميكرويف بلاستيك يستحسن تفرشيها ورق مناديل عشان حرارة الدرة ماتسيحهاش
لو بيركس او بورسلين عادى مفيش مشاكل
المهم
هاتحطى الذرة ف الطبق فى ناس بتحط عليه معلقة زيت و فى ناس بتعمله من غير حاجة
و تغطيه بس تخلى الغطا مهوى شوية
و تحطيه ف الميكرويف لحد ما صوت الفرقعة يبقى بطىء بمعدل فرقعة كل ثانيتين كده ولا حاجة
هياخد تقريبا دقيقتين او حسب الكمية اللى انتى حطاها
بس و تطلعيه بس خدى بالك الطبق ممكن يكون سخن
و بعدين ترشى عليه الملح او النكهة اللى تحبيها و بالهنا و الشفا
——————————————————————
وصفة رقم 11 : كيكة سريعة فى ماج
الطريقة :
هاتى ماج واسع
حطى 8 معالق كبيرة ممسوحة دقيق
و 4 معالق كبيرة سكر
و نص معلقة صغيرة بيكنج بودر
و لو عايزاها بالفانيليا حطى نص معلقة و لو عايزاها بالشيكولاتة حطى كاكاو براحتك
و قلبى المكونات دى بالمعلقة
بعدين ضيفى تلات معالق كبيرة زيت نباتى
و عشر معالق كبيرة ماية
و قلبى المكونات لحد ما يبقى عندك عجينة لينة و حلوة
حطيها ف الميكرويف و اظبطى على دقيقتين
و استمتعى بأحلى كيكة
و ده الفيديو اللى بيوضح الطريقة
https://www.youtube.com/watch?v=0PVZbVz8CdI
——————————————————-
————————————————————————-
" يتبع ان شاء الله "
كل ما اجمع كام وصفة كده هانزلها هنا ف مشاركة و اعمل عليها تنويه ف الموضوع نفسه عشان اللى تدخل تشوف كل الوصفات بسهولة
و كل اللى جربت وصفة فى الميكرويف تقولها هنا و انا ان شاء الله بردو اجمعهم ف مشاركة واحدة و اعمل عليها تنويه
بس تشرحها بالتفصيل زى اللى فوق كده يعنى بتظبط على كام و قوة أد ايه و هكذا
عايزين الموضوع ده يبقى أكبر موسوعة لوصفات الطبخ فى الميكرويف ان شاء الله
وصفة رقم 11 : كيكة سريعة فى ماج
الطريقة :
هاتى ماج واسع
حطى 8 معالق كبيرة ممسوحة دقيق
و 4 معالق كبيرة سكر
و نص معلقة صغيرة بيكنج بودر
و لو عايزاها بالفانيليا حطى نص معلقة و لو عايزاها بالشيكولاتة حطى كاكاو براحتك
و قلبى المكونات دى بالمعلقة
بعدين ضيفى تلات معالق كبيرة زيت نباتى
و عشر معالق كبيرة ماية
و قلبى المكونات لحد ما يبقى عندك عجينة لينة و حلوة
حطيها ف الميكرويف و اظبطى على دقيقتين
و استمتعى بأحلى كيكة
و ده الفيديو اللى بيوضح الطريقة
https://www.youtube.com/watch?v=0PVZbVz8CdI
أشوفكم على خير يا حبايبى
دعواتكم
منقووول للامانة
مواضيع هذا القسم برعاية
أم عمروأبوبكر أم عمروأبوبكر 515333_5.gif فتكات حبوبة Fatakat 515333 الشرقية – مصر