السلام عليكم ورحمة الله وبركاته
صباحكم سكر يا احلى فتوكات في الدنيا والشبكة العنكبوتية
انا قريت مرة رد لعضوة هنا ربنا يصبحها بالخير يارب ويبارك لها انها بتعمل خميرة الفايش بالشطة والفلفل الاسود
بصراحة خفت وقلت ازاي ؟
لكن تشجعت وقلت اجرب وانا عمري ما عملت خميرة الفايش اصلا ودايما حماتي بتخلي حد يعملهالنا
بس قلت كفاية اوي لحد كدا لازم اعتمد على نفسي واتعلم واحاول ثم احاول والا ما ابقاش فتوكة
جبت بقا 3 قرون شطة وحبة فلفل اسود حبوب حوالي ربع معلقة صغيرة وحطيتهم في برطمان ازاز بتاع مربى
بعد ما غسلته وجففته كويس وعقمته على النار من بعيد
وغليت اللبن واول ما فار مش الفار اللي بيقرقض لا ، اللبن هو اللي فار
حطيته في البرطمان وغطيته بكيس وبعدين بالغطا بتاعه وحطيته في قلب الردة السخنة في الحلة وغطيته كويس
وكلفته عشان ما يسقعش الكلام ده كان يوم التلات بالليل الساعة عشرة ونص ،،
الصبح بقا امبارح اللي هو الاربع حطيته في الشمس لحد آخر النهار وبعدين جبته بعد ما الشمس غابت
لقيت الحلة لسة دافية فشلته في فرن البوتاجاز من غير ما ادفيه ولا اي حاجة
جيت بالليل بقا قلت اعمل خميرة تاني بالسمسم احسن اللي بالشطة ما تخمرش
وبعد ما عملت التانية وغطيتها ببص في الاولانية لقيتها ماااااااااااالية البرطمان ،، وكانت المية من تحت واللبن
من فوق هو وقرون الشطة وحبات الفلفل وعامل زي الزبادي
فرحت اوووووووي وجوزي فرح اوووووي اوووووووووي لأنه بيحب الفايش موت
رحت جبت 5 معالق دقيق وصفيت الخميرة وشلت منها الفلفل والشطة وخلطتهم ببعض وسبتهم ساعتين خمروا
وعملت الخميرة الكبيرة بقا من ساعة وقربت تخمر
انا بحبكم اووووووي اووووووووي وبموت في المدونة ده لأني اتعلمت ولسة هتعلم منكم حاجات كتير
ربنا يباركلكم ويخليكم وما يحرمني منكم ابدا ولا يحرمكم من حبايبكم يارب
في امان الله حبيباتي
مواضيع هذا القسم برعاية
@زهرة الوادى@ @زهرة الوادى@ 700804_1.gif فتكات متميزة Fatakat 700804 اسيوط – مصر