السلام عليكم
انا عندي مشكلة محتاجة افضفض فيها كتير
بس حاولو يكون عندكو سعة صدر تقرو الكلام لأني هتكلم كتير
انا مشكلتي بدأت من حوالى 7 سنين كان بعد التخرج من الكلية
وكانت اول تجربة حب ف حياتي
الاول عاوزة احكي عن حياتي قبل التجربة دي
كنت لحد ماتخرجت من الكلية بنت برييييئة جدااااااااااا وشي بيحمر من اقل حاجه من الكسوف
مش عندي صداقات مع ولاد ولا الكلام ده
اقل حاجه بتحصلى ف الكلية لو مثلا ولد جه خد منى ورق او العكس كنت بحكي لبابا وباخد رأيه
كنت تقريبا بنت مثاليه
لحد ما الشخص ده دخل حياتي
بدأت اخبي على بابا
بدأ الشخص ده يشدني ليه باهتمامه الزايد
وبدأ يجرأني
الكسوف والحياء والبراءه بدأت تقل تدريجيا
واحده بوحده
كان بيعلمنى ازاى اقول كلمة "وحشتنى" لأنى ماكنتش اقدر اقولها وبعتبرها كلمة عيب
فضل حوالى 6 شهور بيعلمنى بس اقول الكلمة دي واتعود عليها
وبعد كلمة وحشتنى
طبعا كلمة "بحبك" وهكذا
دواليج
ف الكلام
الشخص ده فضل يحاول يجرأني حوالي سنة
وف نهاية السنة دي كنت بدأت ابقى جريئة شوية ف الكلام
بعدها الجراءة اللى بنسبة تعتبر صغيرة
بدأت تزيد
وتتحول لحاجة تانية مش لاقيالها مسمى
الشخص ده كان بيتكلم معايا كتير ف التليفون
وطبعا مع مشاعر الحب والتعود
بقيت متعوده عليه قوي واتعلقت بيه لدرجة كبيرة قوي
حمدت ربنا انه مكانش ف بلد قريبه منى وماكنتش بشوفه الا قليل قوي كان زمان الجرأه دي اتحولت لغلط اكبر بكتير
اتعودت عليه
بقيت بعمله حساب ف كل حاجه
وفضلنا على كلامنا كده حوالى سنتين او اكتر
اتجرأت ف مره واتكلمت معاه ف موضوع الارتباط
واتسرعت وحكيت لأهلى عنه من قبل ماعرف هو تفكيره ايه ف موضوع الارتباط
وكانت الصدمة
لما عرفت ان رأيه اننا ماننفعش نكمل
وعشان انا كنت "زي مابيقولو الأولاد على البنات اللى من النوع ده" بنت خام او ساذجة
فانا اتمسكت بيه
وتخيلت من هبلى انه كلامه ده اكيد بسبب ظروف وحشه قدامه تمنعه من الارتباط ولازم اقف جنبه لحد مالظروف تتحسن
ماكنتش مصدقة انها النهاية
وعيشت ف أوهام اننا لبعض
فضلت بتكلم معاه من غير ماجيب سيرة الارتباط
وكنت بحاول بطريقة غير مباشره اعرف ظروفه
المهم انى ف النهاية اخيرا فوقت وعرفت انى كنت عايشة وهم كبييييييييييير
حاولت ابعد عنه
اول مره ماعرفتش ورجعت بعد حوالى اسبوع بس
تانى مره رجعت بعد حوالى 10 ايام او اكتر
وفضلت على كده اقرر ابعد وماعرفش
وارجع
وده لأنه كان مالى حياتي وباعدني حتى عن صحابي وأهلى فعودني ان هو كل حياتي فمكانش سهل ابعد
المهم ف الآخر عرفت ابعد حوالى 6 شهور
ال6 شهور دول كان بيجيلى فيهم حالات انهيار ربنا مايوريها لحد
كنت ساعات اقفل على نفسي الاوضه وامسك الموبايل اكتب رقمه اللى انا حافظاه وافضل باصاله وعاوزة اتصل
واتخنق قوي من نفسي
وارزع الموبايل ف الأرض واقعد اعيط
مكانش عياط طبيعي كنت ببكي كأني طفلة أمها سابتها تايهه كنت بعيط بصوت عالى ومقهور
المهم بعد ال6 شهور دول
كنت قاعده نت لاقيته باعتلى يسأل عني
وشي احمر وحسيت كأن ال6 شهور كانو 6 ساعات وهو راجعلى عشان يقولى مش هسيبك
فرحت انه كلمنى
ورجعت لنفس الدوامة والأوهام تانى
رجعنا نتكلم بس مش زي الأول
الكلام اللى بحكيه ده عدي عليه من دلوقتى حوالى 4 سنين
وف خلال الاربع سنين اللى فاتو دول
كانت حياتي متدمرة
دخلت ف حوالى 5 علاقات
كنت كل حد افتكر انى بحبه واعيش الوهم
عشان انسى الوهم الكبير اللى هو الأستاذ اللى غيرني 180 درجة من بنت ف منتهى الأخلاق والحياء لبنت مستهتره
وكنت كل مره بقف مع نفسي واقول انا ليه بدمر نفسي ولازم ارجع زي الانسانه اللى انا اعرفها لأنى كنت حاسه انى فقدت نفسي ومش لاقياها
كنت بطلع من كل علاقة مش هاممنى لأنى اساسا ماكنتش ببقى حابه الشخص اللى بكلمه وكان بيبقى مجرد تعود
لأنى كنت اتعودت ان يكون ف حياتي حد بيهتم بيا
وكنت بعوض الاحساس ده بطريقة غلط
وف خلال العلاقات والتجارب دي كلامي مانقطعش مع الشخص الأولاني ده
كل فتره كنت بتكلم معاه
وحتى كنت ساعات احكيله عن الشخص التانى اللى كنت متوهمه انى بحبه
اخر تجربه كانت خطوبة بجد بقى وكانو أهله بيحبوني قوي وفضلنا مخطوبين حوالى 6 شهور
والشخص اللى اتخطبتله ده طلع بيكدب ف حاجات كتير
وطلع شخص مستهتر
وفسخنا الخطوبة
وكان قراره هو ان نفسخ الخطوبة
بصراحة فرحت مازعلتش عليه لأنى كنت شايفه فيه عيوب ماحدش يستحملها وكنت ساكته عشان أهلى ومش عاوزة احس انى ظلمت واتبطرت على
حد
بعد الخطوبة رجعت للشخص اللى بقى (ثابت ف حياتي) , بقيت اتكلم معاه وانا جوايا احساسين عكس بعض تماما
احساس انى فعلا بحبه قوي ونفسي يتغير ويبقى انسان كويس ونكمل ف حلال ربنا
واحساس انى مش مسامحاه وجوايا سواد كبير ناحيته وبتمنى ربنا يخلص منه اللى عمله فيا لأن هو سبب ف كل اللى وصلتله ده
دلوقتى بعد ماحكيت حكايتي هلخص استفساري واللى محتاجاكو تساعدوني فيه
اولا: ازاى اتخلص من الاحساسين اللى عكس بعض اللى جوايا دول , انا مش عاوزة ولا احبه ولا اكرهه لأن الاتنين بيعذبوني انا مش
عاوزاه يفرق معايا خالص
ثانيا: بقى عندي عقده ناحية الخطوبة والارتباط
انا بيتقدملى ناس كتير
وف كل مره بيبقى جوايا خنقه كبيره ومابعرفش افكر بسببها صح
لدرجة ان ف مره كان واحد جايلنا البيت يتقدملى وانا فجأه سيبت القعده كلها وسيبتهم ودخلت اوضتي انفجرت ف البكى
كنت قاعده وانا متخيله الشخص التانى هو اللى مكان اللى جاى يتقدملى ده ودي حاجه انا مستغرباها لأنى عارفه ان ده مش هيحصل وكمان انا
مش مسامحاه , ازاى عاوزاه هو وبس؟؟
بقيت حاسه كأنى عاوزة انتقم منه
مابقيتش عارفه اثق
بقيت بخاف من اى حد غريب ماعرفوش
بقيت حاسه ان الاولاد كلهم شبه بعض وكلهم بيعرفو البنت عشان يستغلوها ويسيبوها
حتى اللى كان خاطبني ده كنت عارفه انه ف يوم هيسيبني والاحساس ده مكانش بيفارقني وكنت دايما اقول لنفسي وافكر انه هيغدر بيا ف يوم
انا نفسي قوي ارمي كل اللى فات ورا ضهري وابدأ حياه جديدة صح
بس كل مابدأ برجع تانى
انا بقالى حوالى 4 سنين ف الدايرة المغلقة دي ونفسيتي وحشه جداا
كل مابدأ صح وابعد عن الكل وعن الغلط
برجع تانى
بقت عندي مشكله كبيره
انى مابقتش عارفه اعيش من غير مايكون حد ف حياتي بيهتم بيا
حتى وانا عارفه ان كلامه معايا غلط
انا عارفه انى طولت عليكو
بعتذر ليكو جدا
انا معاكو ف المدونة من فتره كبيره وحبيتكو وحبيت صحبتكو
وعملت الاكونت ده بإسم مستعار عشان الحرج عشان محتاجاكو جنبي تساعدوني بعد ربنا طبعا
مستنيه ردودكو بس بالله عليكو من غير تجريح ف الكلام ومن غير ماتقولولى انى غلط انا عارفه ان حاجات كتير قوي ف اللى حكيتها غلط
وحرام
انا عاوزة حلول عملية ونفسي قوي بجد ارجع الانسانه اللى انا بحبها لأنى بقيت بجد بكره نفسي
دعواتكو
حكاوي العيون حكاوي العيون فتكات جديدة Fatakat 1205240 طنطا – مصر