انا لسة والدة من 20 يوم وولدت طبيعى وطبعا كنت محتارة اولد فى مستشفى اية ؟ ودى اول ولادة لية واهم حاجة تكون مستشفى نضيفة وتمرضها يكون كويس ونضيف فالدكتور بتاعى رشحلى كذا مستشفى من ضمنهم مستشفى الندى للولادة اللى فى المنيل فقولت بدل هى مستشفى متخصصة فى الولادة اكيد هتبقى نضيفة وكويسة والدكتور كمان رشحهالى وقالى دى مستشفى هايلة وسالت ناس كتير قالولى دى من انضف مستشفبات الولادة فى مصر فقولت اتكل على اللة واولد فيها وفعلا ولدت فيها يوم 16-12-2016 وولدت طبيعى بابرة الظهر الابيدورال وطلع عينى فى الطلق عقبال ما الدكتورة جاءت من بيتها وادتهالى وكل شوية اصرخ والممرضات تقولى الدكتورة جاية فى السكة ويمشوا ويسبونى وشوية ماما وجوزى يصرخوا فيهم ويقولولهم جاية خلاص فى السكة ومن كثر الزن والصريخ بتاعى ضحكوا علينا وقالوا الدكتورة وصلت وبتركن فى الجراج واخدونى ونزلونى فى غرفة العمليات تحت وسابونى لوحدى فى الاوضة اصرخ وقعدوا يهزروا برة الاوضة وطبعا مامتى وجوزى فاكرين انى باخد ابرة الظهر فى الاوضة تحت وانا مش عارفة اوصلهم او اقولهم وبعد فترة وصلت الهانم الدكتورة وادتنى حقنة الظهر وطبعا الكمية بتاعت البنج كانت قليلة فحسيت بالم الولادة وقولتلهم انا حاسة برجلى وهما يقولولى لا بيتهيالك وانا اقولهم انا حاسة يقولولى طب ارفعى رجلك فارفعها فيقولولى طب حركى صوابع رجلك احركها فيسكوتوا وبعدين طلعونى الاوضة تانى وكل شوية مساعد الدكتور يجى يبص على الرحم فتح قد اية ؟ ولما فتح 9سم كلم الدكتور والدكتور شافنى وقالى لازم نفضى المية بتاعت البيبى عشان عايزين الرحم يفتح 10 سم وجاب حاجة طويلة ورفيعة ودخلها وحسيت بمية سخنة نزلت عليا وبعدين قالهم نزلوها حجرة العمليات وطلع عينى لان الحقنة كان بنجها قليل وحسيت بوجع الولادة ومعرفتش ادفع البيبى فالدكتور ادانى حقنة نايمتنى وفتح او شق العجان وخرج البيبى وخيط وبعدين صحيت وانا خارجة من حجرة العمليات يعنى نمت 15 دقيقة وبعدين طلعت الغرفة وجاءت الممرضات وحطتلى قسطرة بولية لان حقنة الظهر هتخلينى ما احسش بالبول وهو بينزل فحطوهالى لمدة يوم ونص وانا خارجة من المستشفى شالوهالى وبعد ما روحت حسيت بورم تحت وفسافس ومش عارفة اتحكم فى نزول البول يعنى بحس انى عايزة ادخل الحمام وعلى ما اروح اكون غرقت نفسى واحاول امسك البول مش عارفة وبينزل منى وانا مش عارفة اتحكم فية وبعدين حسيت بحرقان جامد وقت نزول البول فعملت مزرعة بول وكانت النتيجة ان جالى ميكروب اسمة كليبسيلا ودة ميكروب منتشر فى المستشفيات اللى مش نضيفة ويودى الى التهاب المسالك البولية والمشكلة الكبرى ان المضادات الحيوية اللى بتموتة ما تنفعش مع الرضاعة الطبيعية فمش عارفة اعمل اية ؟ وانا بنتى عندها عشرين يوم
حسبى اللة ونعم الوكيل
والدكتور الحمار يقولى خدى مضاد حيوى اسمة سيبروباى 500 ولما جوزى قراة النشرة لقى مكتوب انة لا ينفع مع الحوامل والمرضعات ويسبب نقص فى نمو عظام الرضيع ولا ياخذ الا بعد سن 18 سنة شفتوا الطب عندنا والتمريض وصل لدرجة اية
lamita loly lamita loly فتكات متميزة Fatakat 566642 الجيزة – القاهرة