ازيكم يافتوكات
انا بعمل الموضوع دة علشان افيد كل فتوكة هتعمل المنظار وقلقانة منة ومش عارفة هو عبارة عن اية
لانة قبل معملة كنت بدور عالنت وللاسف مكنتش بلاقى حد يفهمنى كل حاجة
فانا هقولكوا على كل حاجة من اول مدخلت المستشفى لعلة فى ميزان حسناتى وتدعولى بالذرية الصالحة
اولا المنظار دة اخر حل بيلجا لية الدكاترة بعد العلاج بالمنشطات اللى مبتجبش نتيجة مع معظم البنات وبيتاخروا برضة فالحمل
انا اخدت منشطات لمدة سنة ونص وبرضة محملتش والحمد لله على كل شيئ
وعملت اشعة الصبغة والحمد لله وفالاخر اضطريت الجا للمنظار وهو منظار البطن لكى التكيسات
شنطة العملية(اندر وير _عباية واسعة وسهلى فاللبس-بنطلون ترنج واسع- مناديل مبللة بتاعة الاطفال علشان مامتك تبقى تمسحلك بيها وشك وكدة -كوفرتة)
الدكتور طلب منى تحاليل دم وبول قبل العملية وعملتها
يوم العملية:
رحت المستشفى الصبح ولازم تكونى صايمة وهيدوكى زى قميص كدة بتلبسية بعد كتقلعى كل هدومك وبتلبسى زى كيس كدة على راسك وبتقلعى اى حاجة لبسها زى توك او دهب او حتة الدبلة
دخلت اوضت العمليات وكنت مرعوبة جدا ونيمونى عالسرير وكانوا مغطينى
جة دكتور البنج ودعيت ربنا فسيرى وادانى حقنة فذراعى وبعد كدة ادانى البينج ونمت محستش باى حاجة خالص
وعدت ساعة (ماما طبعا اللى قالتلى انى اخدت ساعة فالعملية)
فوقت من البينج شوية بنسبة 30%وكنت لسة مدروخة طبعا والحمد لله محستش باى الم فبطنى اللى تعبنى شوية بس البنج لانى حسيت لمافقت انى مش عارفة اخد نفسى شوية وقلت للدكتور نفسى نفسى قام حطلى اكسجين كدة على مناخيرى والحمد لله بادات اخد نفسى
نقلونى فالاوضة وكنت سقعانة جدا وغطونى بالبطانية ونمت وكل شوية افوق وارجع انام تانى من تاثير البنج وكل لما كنت بفوق كنت بحمد ربنا طبعا
وجة الدكتور ادانى حقنة مسكنة فالعضل وركبولى محلول كدة وفضلت نايمة
وبعدها بساعة كدة ابتديت افوق وتاثير البنج يروح والدكتور كتبلى انى اشرب عصير بس بعد 6 ساعات من العملية
وبعد مشربت العصير حسيت انى عايزة ارجع بس الممرضة اديتنى حقنة مكان المحلول علشان مرجعش والحمد لله احساس الترجيع راح
وبعد كدة الدكتور جة وشافنى ولاقانى سخنة شوية وقالى دة عادى لازم هتسخنى شوية وهتطلعى ريح عادى
وبعدها بساعتين كنت كويسة الحمد لله وحاولت اقوم وماما ساعدتنى وشطفتنى كدة بس مجبتش ماية عالجرح واستنيت لحد ماابقى كويسة والدكتور كتبلى على خروج وروحت الحمد لله
ياريت تدعولى ربنا يرزقنى بالحمل السليم المعافى قريب يارب
ياحى ياقيوم برحمتك استغيث ياحى ياقيوم برحمتك استغيث 274877_3.gif فتكات رائعة Fatakat 274877 فى رحاب الله – مصر