سلام عليكم ورحمة الله
انا بقالي سنه متجوزة وماحصلش حمل
عارفه انها فتره بسيطه بالنسبه لناس كتير بس اللي خلاني ابدأ اتحرك واجري هنا وهناك ان سني مش صغير رحت لدكاترة كتير
واحسن واغلى دكاترة واخدت حقن تنشيط بالرغم من انهم قالولي تبويضك الحمد لله ممتاز بس دي حاجه بس تساعد عالحمل
المهم حسيت ان كل شهر عمال جوزي يصرف عالدكاترة فلوس في الارض ومافيش جديد
روحت بالصدفه لدكتور سمعت انه كويس دخلت قلتله كلمتين ورد غطاهم.. انا بقالي سنه ومفيش حمل واخدت منشطات
قاللي تنزلي دلوقت تعملي اشعه بالصبغه
المهم ماكدبتش خبر روحت عملتها في مستشفى التأمين عند زوجي ورفضوا هناك ان يعملوهالي ببنج.. مش قادرة اوصف قد
ايه الموضوع كان في شدة الألم بالنسبالي.. لدرجة حسيت الدكتور اتلبخ وبقى يزعق ويقوللي انا ممكن اكبر دماغي واقولك
ان الانابيب عندك مسدوده .. لكن صابر عليكي يا ريت تبطلي تشدي اعصابك عشان هما غالبا مقفولين من عصبيتك
حاولت لكن في الاخر مافيش حاجه وكتب التقرير انهم مقفولين
روحت بيهم للدكتور بتاعي قاللي لازم عملية منظار واشوف بنفسي فيهم ايه واحقن الانابيب واشوفها سالكه وللا مسدودة
لحد هنا كنت عادي قلقانه بس عادي .. ماكنتش فاهمه يعني ايه انابيب ومسدودة والكلام ده .. لحد ماروحت البيت وقعدت
على فتكات وعلى جوجل اعمل سيرش عالموضوع .. فووووووووجئت ان بنات كتير حصلهم كده وللأسف عملية المنظار اللي
لاحظته انها غير مجديه .. يعني فيه بنات حملت عليها بس اللي بعدها بسنه ونص واللي بعدها بسنتين واللي من 2024
ومازالت منتظرة فرج ربنا.. طبعا جالي احباط من الدرجة الاولى .. انا عارفه انه اختبار كبير من ربنا .. وبدعي ربنا اني اكون قد
الاختبار ده واعدي منه على خير ويرزقني من حيث لا احتسب
مش قادرة اتخيل اني بدل ما اجي القسم زي كل شهر اقول اعراضي ايه وحاسه بإيه .. لأ جايه وانا فاقده الامل ومش عارفه
احس اني ممكن اكون حامل قريب .. اللهم لا اعتراض على حكمك يا رب اللهم اني استغفرك واتوب اليك اللهم ارفع عني
البلاء وفوقني من الكابوس اللي انا فيه
دلوقت انا طالبه منكم اللي ليها تجربه حلوة مع عملية المنظار تقوللي… نفسي افرح .. نفسي اتفائل واحس ان فيه امل
انه على الله ليس بعسير.. ياريت كل اللي مرت بتجربتي تحكيلي وتطمنني يا رب يطمنكم يا رب
وادعولي بظهر الغيب ربنا يفك كربي ويشفيني انا وزوجي ويرزقنا بالذرية الصالحه ياااااااا رب عاجل وليس اجلا يا رب انا وكل
زوجة محرومة يا رب
LoOoly LoOoly 549548_3.gif فتكات هايلة Fatakat 549548 Alb 7abibi 🙂 – مصر حبيبتي