ازيكم يا فتوكاتى يا حبايب قلبى وكل عام هجرى وأنتم بخير وفى طاعة دايما للرحمان
انا محتاجة مساعدتكم جدا جدا جدا فووووووووووووووووق ما تتخيلوا ويا رب ما تخذلونى
انا متزوجة من 9 سنوات ولم يحدث انجاب خالص وكان زوجى فى الاول بيتعالج وانا من النوع الا بيطنش كتير يعنى مش بحب اتنطط من دكتور للتانى ولما قالوا المشكلة عنده فوضت امرى لله
وبعد 6 سنوات سمعت عن الدكتور عادل فاروق فروحتله وشاف تحاليلى الجديدة وتحاليل زوجى وكانت المفاجأة إنه قالى تحليل زوجك كويس مفهوش حاجة هو انتوا كنتوا متخيلين ان الراجل ده هو السبب فى التأخير كل السنوات دى يعنى مفيش شهر اخد علاج ويحصل حمل
انا بلمت وقلتله الدكاترة الا قالوا كدة
بصلى اوى وقالى ضيعتوا 6 سنيين على الفاضى
المهم تحاليل الهرمونات بتاعتك كويسة وسألنى عملت صبغة للانابيب ؟ قلتله : لأ , قالى : لازم نعملها , وعملتها والحمد لله طلعت كويسة
قالى نخش بقه على الخطوة الاخيرة منظار البطن وعملته وطلع عندى مرض البطانة المهاجرة
ومشانى على خطة علاج يمكن كتير هنا عارفها
ولما جيبنا وقت الجد وهبتدى انفذ الخطة وفعلا أخدت عشر حقن للتنشيط والمفروض يحدث لقاء بينى وبين زوجى
تخيلوا يحصل ايه ؟؟؟؟؟؟؟
زوجى اعتقل وفضل محبوس سنتين حسبى الله ونعمة الوكيل
طبعا كل حاجة وقفت
والحمد لله زوجى خرج بعد الثورة بسنة ومن ساعتها لدلوقتى مش قادرة افتحه فى موضوع الحقن المجهرى علشان هو من ساعة ما خرج
وهو عمال يسد فى التزامات كانت علينا الفترة الا اتحبس فيها
لكن كنت لما بدخل هنا واسمع عن الاخوات الا بيعملوا حقن مجهرى كنت بدعلهم من قلبى ربنا يفرح قلوبهم ويكملهم على خير
وادعى ربنا انه ييسرها علينا من عنده انا دلوقتى عندى 32سنة
لما اخيرا أخو زوجى فكر إنه يعطينا قرض نعمل بيه الحقن ان شاء الله واحنا جيلنا مال بس لسه قدامه يجى سنه كدة نبقى نرجعله ماله
ومن ساعة ما سمعت منه الخبر دة وانا فرحانه بس خايفة أوى
طيب هو أخو زوجى عمل الا عليه وإنتم بقه فين دوركم
زوجى سألنى هنعملها فين ؟؟؟؟تنحت وقلتله مش عارفة
فقلت الا بإذن الله هيساعدنا هو إنتم طيب إزاى
أنا أولا زى ما قلتلكم مليش كتير فى المعلومات الخاصة بالدكاترة والمراكز ومش عايزة كلام نت وخلاص انا عايزة الناس الا جربت بجد
فيا رب يكرمكم والا معندهاش يعطيها والا عندها يباركلها فيهم انا عايزة كل أخت عملت حقن مجهرى أو ليها حد قريب منها جدا عمله سواء نجح أو فشل
تقولى عملته فين وبكام وأسباب الفشل بما يرضى الله ومتبخلوش عليا بالرد ربنا يرضى عنكم يا رب والا حتى معندهاش معلومات
وقرأت موضوعى تدعيلى من قلبها علشان يجى يوم تلاقى الا يدعيلك
انا مليش إخوات وربنا يعلم بعتبركم كلكم إخواتى الا عيونى لم تراهم
وبتمنى من الادارة انها تثبت الموضوع علشان كل أخت فى مثل ظروفى ومحتارة تلاقى الا يمد ايده ويساعدها حتى لو بكلمة واحدة
أو دعوة بظهر الغيب يقال لك ولك بالمثل
واترككم فى حفظ الله
حنين الروح والقلب حنين الروح والقلب 706345_1.gif فتكات رائعة Fatakat 706345 القاهرة – مصر