السلام عليكم ورحمة الله
يارب ارزقنا جميعا الذرية الصالحة عاجلا ياربى
ربى لا تذرنى فردا وأنت خير الوارثين
يارحيم لاتكتبنى عقيم
ربى هب لى من لدنك ذرية طيبة انك سميع الدعاء
يارب أسألك بحق اسمك الاعظم الذى اذا دعيت به اجبت وأذا سئلت به أعطيت
أن توفقنى فى عملية الارجاع وترزقنى منها بتوأم صحيح سليم معافى صالح
وتقر عينى بهم يارب أنا وكل مشتاقة
بصوا بقى يا بنات انا ان شاء الله هعمل ارجاع أجنة مجمدة
ونفسى ألاقى حد يدلنى ويشجعنى ونكون مجموعة نحفز بعضونستفيد من بعض
وياريت اللى رجعت قبل كده مجمد تفيدنا ربنا يجازيها كل خير
وتدينا بشرة و أمل
ياريت تقوليلنا انتى رجعتى فريش قبل كده ولا لا؟
ورجعتى مجمد قبل كده ولا لا؟
وايه اللى حصل ؟ ربنا وفقك ولا مأجلهالك ؟
واخذتى أدوية ايه؟ كلكسان،هوستاكورتين ،انترالبيد،فيتامين بى ،سى،اي؟
ورجعتى اليوم الكام؟
عملتى تحاليل تانى قبل الارجاع ولا لا؟فيروسات،اجسام مضاده،نسبة التجلط،غدة درقية؟
عملتى دوبلر قبل الارجاع ولا لا؟
وعملتى ايه فى فترة الانتظار بالظبط؟
انا هبدء بنفسى
انا بدأت خطوات الحقن المجهرى فى شهر 7 ولانى مريضة تكييس حصلى فرط تنشيط
فجمدت كل الأجنة وعملت ارجاع فى شهر 8 (واقر انى استعجلت لان الدكتور قالى استنى كمان شهر
بس اتسرعت الحمدلله ع كل حال )
ووقتها كنت فكولى 4 اجنة تلف واحد
وواحد درجة تالته منقلتهوش ونقلت 2 واحد منهم درجة اولى والتانى درجة تانيه
وبعد النقل قومت علطول من السرير وحجزت اوضه وروحت لها مشى على رجلى وريحت فيها حوالى ساعه ونص
ودخلت الحمام بعد نص ساعه من النقل لان بطنى كانت هتنفجر
وقومت مشيت فى عربية زوجى بس هى ع ادها شويه ههههههههههه
يعنى مش مريحة اووى وكنت حاسه بالمطبات والاسفلت وكأنى راكبة مرجيحة
(هو اصلا لو سمعنى هيزعل اووى لانه بيحب العربية جدااااااا مش عارفه ع ايه)
المهم بعدها ارتحت اول يوم بس ع ضهرى ودخلت الحمام مرتين تقريبا وصليت فى السرير
وبعدها طول الاسبوعين كنت بتنقل من الاوضه للصاله للحمام وانام ع ضهرى شويه
واقعد شويه واصلى وانا قاعده
بس وحللت اليوم 14 دم طلع سلبى
استنيت يومين وحللت رقمى لاقيته 9 وكنت أجهدت نفسى جااااااااامد فى الشقه ونزل ومكملش
الحمدلله اللهم أجرنى فى مصيبتى واخلف لى خيرا منها
الأخطاء اللى وقعت فيها انى عرفت ان ممكن يتأخر تحليل الحمل يعنى مش لازم احلل اليوم ال 14
ممكن نستنى يوم او 2 كمان
وانى اجهدت نفسى فى شغل البيت جاااااااااااااامد اول ماعرفت انه سلبى
وانى عملته الاول دم عاجى من غير رقمى
وانى اتسرعت طبعااااااااااااااا بعد فرط التنشيط ومسمعتش كلام دكتورى
وطبعا ده قدر وكل شىء بايد ربنا
دلوقتى فات حوالى شهرين وان شاء الله هعمل ارجاع مجمد
الدكتور قالى اخد سايكلوبرجينوفا 2 يوميا
الاسبوسيد
الفوليك اسيد
السيدوفاج
وانا باخد هوستاكورتين منى لنفسى خوفا من وجود اجسام مضاده
اللى طلباه منكم ياحلويين
اللى بتمر بنفس التجربة تيجى تشاركنى
وان كل واحده تدخل تدعيلى بالله عليكم تدعولى
ان ربنا يوفقنى ويرزقنى الذرية الصالحة السليمة المعافاة من اى سوء عاجلا
ويريح بالى ويعوضنى خير انا ولاء
وردة زوجى وردة زوجى 878101_1.gif فتكات رائعة Fatakat 878101 الجيزة – مصر