الحقيقة انا مش عارفة ابدأ الموضوع منين بس زي ما العنوان بيقول النهاردة كان المفروض عيد ميلاد ابني بلال
كان زمانه عنده سنة المهم انا كنت حامل و طول الحمل كان كل شيء تمام ، وكنت في زيارة عند الدكتور في
نص الشهر الثامن ، قالي كل شيء تمام المية و المشيمة وكل حاجة ، بس قالي اني البيبي حجمه قليل
( 1700 ) جرام وكتبلي على مكمل غذائي يزود وزن البيبي وقالي اشوفك بعد أسبوعين .
والله يا بنات روحت البيت و بدأ يجيلي مغص المهم انا مهتمتش و قلت شوية مغص و هيروحوا الكلام ده كان
الساعة 8 بالليل ، وبعدين بدأ المغص يجي ويروح و طبعا المافة بين كل مغصة و التانية بقت قريبة جدا ،
و اتاري ده الطلق و انا طبعا علشان دي اول مرة فمعرفش حاجة و كمان محدش حواليا كان حله كده ،
قعدت بقى ماسكة نفسي لحد لما جوزي اتصل بحماتي ع الساعة 3 الفجر وقالها ع الاعراض اللي عندي،
وعلى فكرة انا امي متوفية و مليش اي اقارب هنا ، فامه قالتله دي اعراض ولادة ، قالها ازاي دي لسة بدري.
المهم اتصلت بالدكتور الساعة 6 الصبح و قالي خدي لبوس بروفينيد لو مغص عادي هيقف لو طلق اللبوس مش
هيأثر ، اخدت اللبوس من هنا و الطلق اشتغل اكتر من الاول ، المهم الدكتور قالي تعاليلي العيادة ع الساعة 10
لما روحت العيادة كان الدكتور لسة مجاش فالممرضة اتصلت بيه قالها اديلها حقنة بروفين اخدتها الطلق اشتد
أكتر ، ولما الممرضة كلمته تاني قالها اكشفي عليها نسا عشان اعرف الرحم فاتح ولا لأ ، كشفت عليا وقالتلي
دي و لادة لاني الرحم فاتح .
المهم الدكتور البارد جيه و كشف عليا تاني وقالي الرحم فاتح 6 سم و عملي سونار وقالي غالبا البيبي
هيحتاج حضانة ، وطبعا الافندي مكنش مديني حقن الرئة بحجة اني بكرية وانه مستبعد الولادة المبكرة ، على
الرغم والله العظيم اني كنت على طول بقوله انا حاسة اني هولد بدري لدرجة اني كنت مجهزة شنطتي من
السابع ، و ده لاني مدرسة و عارفة المجهود اللي كنت بعمله .
المهم قالي هو ينفع تولدي طبيعي بس القيصري احسن عشان البيبي ضعيف مش هيستحمل ، المهم زي
الهبلة دخلت اوضة العمليات عنده في العيادة وو لدت ، وده أكبر غلط اني ولدت في العيادة .
بعد ما فوقت من البنج قالولي الولد كويس و طلبت اني اشوفه بس كنت دروخت تاني ملحقتش اشوف الا
البطانية بتاعته ، و لما فوقت تاني عرفت انهم نقلوه الحضانة ، وقالولي هتسميه ايه قلتلهم بلال .
انا روحت البيت تاني يوم و ابني قعد في الحضانة 14 يوم كان بيتحسن فيهم ، لحد قبل ما يموت بيوم اصريت
اني اروح اشوفه ودي كان اول مرة اشوفه فيها والله العظيم كان زي القمر و الكتور طمنا و قالنا هو بقي كويس
بس مش هتخدوه الا لما يتحسن خالص .
طبعا روحت وانا فرحانة بس طول الليل و انا نايمة كان قلبي مقبوض و صدري وجعني ، المهم صحينا علي
اتصال من الحضانة الساعة 7 الصبح ، قالولنا انه حصله نزيف في الرئة ، و انهم بيعملوله اللازم ، والله العظيم
أول لما التليفون رن عرفت اني دي الحضانة رغم انهم كانوا اول مرة يتصلوا بينا .
نزلت انا و جوزي روحنا الحضانة مرضيوش يوروهولنا و قالولنا ادعوله ، المهم اتصلوا بجوزي الساعة 8 بالليل
وقالولوا اني امر ربنا نفذ ، بس جوزي مقليش غير ع الفجر ، و كان كل شوية يقولي تعالي نامي في حضني
ولو حصل حاجة مش عايزك تزعلي احنا اللي بنجيب العيال المهم صحتك .
انا حسيت من كلامه قولتله يعني هو خلاص و لا لسة ، قالي خلاص ، قولتله الحمد لله ، والله العظيم دي اول
كلمة طلعت مني اول لما عرفت ، ولما الساعة بقت 8 الصبح جوزي راح خلص الاجراءات وروحنا دفناه ، انا كان
نفسي اشيله و اخده في حضني بس مرضتش لانه كان طاهر و انا بينزل علي دم النفاس .
طبعا انا اسفة جدا على التطويل بس دي حكايتي اللي عايزة كل واحدة تتعلم منها انها متسكتش على اي
حاجة مهما كانت بسيطة ، وكمان لازم تولدي في مستشفي مجهزة لاستقبال الطفل .
بعد ما نكدت عليكو بالقصة دي عايزة اقولكو اني ربنا كبير و اني دلوقتي حامل في اخر اسبوع في التامن
ادعولي يكمل على خير ، وعلى فكرة انا حامل في بنوتة و ان شاء الله هسميها حور .
وانا بقي نفسي اطلب من الدكتور انه يولدني يوم 16 / 12 علشان ده اليوم اللي بلال مات فيه ، عشان اليوم
اللي قلبي وجعني فيه على فراق ابني يكون هو نفس اليوم اللي ربنا يفرح قلبي فيه ببنتي .
قرة العين2015 قرة العين2015 فتكات حبوبة Fatakat 1007484 القاهرة – مصر