السلام عليكم ورحمة الله وبركاته
ازيكو يا حوامل
ربنا يقومكو بالسلامة ان شاء الله
هحكي تجربتي عشان تستفيدو منها واديكو نصايح من خلال اللي مريت بيه
اولا انا ولدت طبيعي ولادة بدون الم وبطلق صناعي لان الطلق كان ضعيف
انا مش عارفه احكي واكتب موضوع من قلة النوم اللي انا فيها حاليا
بس عايزة اطمنكو بجد متقلقوش من حاجه اسمها ولادة
الناس بتهول جامد وبتخضكو ويبالغو في وصف الألم بطريقة مش طبيعية
لكن الموضوع ببساطة بتكون لحظات الم وبتقدرو تستحملوها من عند ربنا متعرفوش ازاي وكلها ساعتين زمان وبتخلص الولادة وتفحو بأحلي نونو في الدنيا بس اهم حاجه تفائلو وبطلو خوف وقلق ومتسمعوش من حد بيبالغ في الالم
قصتي ان انا كان الطلق بيجي بس مكانش راضي يكون حامي ، بمعني ان المفروض عشان يكون طلق ولادة فعلا يكون كل 3 دقايق او 4 ، بس اللي كان معايا اني كل شوية الطلق يجي ويستمر فترة طويلة ويجي كل 8 او 10 دقايق وفي الاخر يهدي
ويحصل كزا يوم علي فترات ، لدرجة اني نفس اولد قيصري وارتاح بالرغم ان وضع الجنين كان ولادة طبيعي ونازل في الحوض وكلو تمام بس الطلق بارد ومش متقارب ابدا والرحم مقفول
في الاخر الدكتورة ادتني طلق صناعي ولما الوضع اتحسن اكتر ادوني حقنة التخدير وارتاحت بعدها اوي ومحستش بأي حاجه نهائي لدرجة اني كنت بولد وبحكلهم حكايات واقلهم نكت واهزر وحاجه مش طبيعي مع واحده بتولد طبيعي اصلا
عيب التخدير ده ان الواحده مش حاسه بأي حاجه في منطقة الحوض ، مفيش احساس نهااااائي ، هي الدكتورة بتقولك يلا في طلق زوقي بشدة وانتي تشدي نفسك وتزقي الجنين ، لكن بسبب عدم الاحساس انتي مش عارفه هو طلع ولا دخل ولا ايه بالظبط ، بتكوني معتمدة علي توجيهات الدكتورة
وبسبب كده انا كنت مرتاحه جدا لاني ارتاحات من وجع الطلق وهمه وفي نفس الوقت ابني كان هيتخنق من كتر ما انا مش عارفه اطلعه اصلا لاني مش حاسه بيه …….والدكتورة جت في الاخر قالت شكلنا كده هنفتح قيصري ، بس جت من عند ربنا ان الولادة تمت علي خير
وكان اهم حاجه عندي كمان ان الفريق كلو يكون ستات واكون متغطية بالملاية وكنت كمان لابسه بنطلون الولادة
خلاصته خلوها علي الله وادعو ربنا كتير اوي بالتسهيل ومتشيلوش هم الولادة وعليكو بالتغذية ثم التغذية ثم التغذية اوعو تهملو فيها لاني اهملت فيها وجيت في يوم الولادة كنت تعبانه وهلكانه ومش قادرة اولد اصلا وحاليا وانا في فترة الرضاعه تعبانه وعضمي بينشر عليه من قلة الكالسيوم ، فخدو بالكو كويس وربنا معانا جميعا
وانا اسفه اني طولت بس فعلا مش عارفه اركز واكتب الموضوع كويس
`~`(eman)`~` `~`(eman)`~` سوبر فتكات Fatakat 71455 الاسماعيلية – مصر