صباحكو قشطة بالعسل يا فتوكات
ولا هاتولى حاجة مملحة أحسن حاسة بهبوط جامد ع الصبح كدة
ربنا يهون عليا أنا وكل الحوامل يارب ونقوم بالسلامة ويرزقنا بأطفال معافين من كل سوء
المهم أول حاجة مطلوبة منك فى الموضوع دة دعوة لكل واحدة حبيبتنا ولا صاحبتنا ولا حتى منعرفهاش … وتكون مشتاقة للإنجاب ان ربنا يرزقها ويقر عينيها بالذرية الصالحة عن قريب يااااااااااااااارب ويجبر بخواطرهم ويفرحنا بيهم ان شاء الله
ثانيا بقى .. نبطل رغى وندخل فى المفيد
النهاردة واحدة صاحبتنا بتحكى معايا فى شات مغتربات السعودية وبتقول ان قريبتها بتقول لجوزها أنا حامل .. قال لها يبقى لازم نلحق ندارى الفضيحة قبل ما يطخونا ويدارو عارنا
على طول افتكرت الأفندى بتاعى الصعيدى ولا مؤاخذة … كان عليه حتة رد فعل .. مش هنساهوله طول عمره الراجل دة
ونقول من الأول بالتفاصيل المملة علشان تفهمو ملابسات الموضوع
أنا اتجوزت فى مصر يادوب اسبوعين وهو سافر .. وعلى ماخلصت أوراقى وحصلته كان فات علينا شهرين وكانت حالتنا بؤس يا حرام
المهم جيت له السعودية ومن أول ما جيت وأحوالى ملخبطة كدة بشكل غير مفهوم
أنا جيت فى الطريق وعندى البريود … يعنى مفيش غير سلامات زى بتوع الأصحاب وأكتر من كدة مفيش .. وكل واحد يحترم نفسه على ما اليومين دول يعدو على خير .. احنا قلنا أهو
قعدت أربع أيام والأخت خلصت … يلا مع السلامه بقى علشان فيه ناس أعرفهم كانو قربو ينحرفو وهيفضحونا
بعدها بخمس أيام بالظبط لقيت بقعة دم مجهولة المصدر … مين دة ؟؟؟؟؟؟؟؟ إزاى يعنى ؟؟ دى البتاعه لسه خلصانه بقالها 5 أيام يادوب .. امال دة جيه منين
وفضلت على الحاله دى 3 ايام وبعدين روحت للدكتورة .. قالت يابنتى متقلقيش .. كل الحكاية انكم اتنين مناحيس .. تقريبا الراجل دة معمول له عمل
أه وربنا قالت لى كدة .. طيب ياستى ايه دة ؟؟ قالت لى لخبطة هرمونات .. انتو تقريبا تعتبرو لسه عرسان .. متشغليش بالك
وفعلا خلص الموضوع دة ومشيت الحياة طبيعى .. وعدى الشهر واستنيت ستو الحاجة تيجى .. مجتش فى ميعادها .. عملنا تحليل منزلى فى نفس اليوم ومظهرش فيه حاجة
قلت يمكن هتغير مواعيدها وتيجى بعد 5 أيام زى ما اتلخبطت معايا الشهر اللى فات
وبينى وبينكم أنا فى الفترة دى أصلا مكنتش مركزة ولا بحسب فات كام يوم ولا حاجة
كنت حاسة انى سرحانه وتايهة ودايخة وعاملة زى المدمنين ومش مركزة فى أى حاجة خالص .. لدرجة انى اتكلم مع جوزى ألخبط فى الكلام
ولو وقفت على غفله أقع فى مكانى تانى .. ومش حاسبة أى تواريخ خالص .. لغاية ما فاتو عشر أيام وأنا وهو فى الطراوة .. بس حاسة ان كل جسمى ملخبط
قلت له ياعم الحاج شكلنا كدة عملناها وهنتفضح .. قال لى عملنا ايه ؟؟ من أول شهر كدة .. لأ مش ممكن طبعا
يحسسنى انه ملمسنيش ابن الحلال دة … مش عارفة أقول ايه والله
المهم بالمصادفة البحته روحت أعمل بطاقة الإقامة السعودية .. حولونى للكشف الطبى … وكان تحليل الحمل أول واحد فيهم وطلعو الشرطتين فى شريط الإختبار
وهو طبعا كان شاف الشريط دة فى البيت وعارفه … خدت الشريط من الدكتورة وقلت أطلع أفاجأه .. قلت له شوف ياحبيبى
قال لى مين دة ؟؟ وعمال يقلب فيه يمين وشمال .. قلت له تيست حمل وفيه شرطتين .. قال مالهم الشرطتين ؟؟
قلت ياراجل مش فاكر التحليل اللى جيبناه فى البيت وطلع شرطة واحدة ؟؟؟ قال لى يعنى ايه ؟؟ كنت ناوية ارتكب جريمة بس قلت صحتى مش هتسمح
قلت له يعنى أنا حامل … وكأنى قلت له الساعه كام مثلا
لقيته قال لى حامل ايه ياشيخة بس .. ده تحليل بايظ .. اشمعنى اللى فى البيت مطلعش فيه حاجة ؟
بقيت مش عارفة أقول له ايه … كملنا التحاليل ودفع الفلوس وخرجنا وأنا ساكته .. ويادوب بيطلع مفاتيح العربية من جيبه .. وفجأه تنح
وكأنه لسه سامع الخبر دلوقتى حالا … يعنى انتى كدة حامل ؟؟؟؟؟؟؟؟؟؟؟؟؟؟
مسكت لسانى بالعافية .. قلت لأ بتبلى عليك
قال لى بجد ؟؟؟ طيب إزاااااااااااااااااااى …. سامحونى بقى .. لحد هنا ومعرفتش أمسك نفسى ورقعت بالصوت فى الشارع
إزاى ؟؟ هو ايه اللى إزاى ؟؟ مش عارف أنا حامل إزاى ؟؟؟
الراجل فاكر نفسه لسه خطيبى وبيسألنى إزااااااااااااااى
قلت له كلمة واحدة تانية وأحدفك من العربية وهى ماشية … قال إزاى قال … السؤال المنطقى بقى بعد سؤالك دة .. انك تقول لى حامل من مين
قعد يناقش فيا .. قلت يابن الناس سيبنى بس شوية انشكح وأفرح بالخبر وبعدين ارفع ضغط دمى زى ما انت عاوز .. ماهى شكلها ليله مش فايته
مشينا يا جماعه وهو مذهول لدرجة انى قلت الراجل اتجنن .. وفجأه قلت له … هو انت قبل كدة حد قال لك انت مبتخلفش مثلا ودلوقتى مصدوم ولا ايه ؟؟؟
برضو مش مقتنع .. أصل اصحابه كانو مفهمينه ان الحكاية صعبة ومحتاجة وقت ومجهود وطقوس عجيبة كدة
وهو مش مصدق ان دة يحصل عادى كدة من اول شهر .. طبعا دة من فضل ربنا علينا والحمد لله
فى الأخر قبل ما نوصل البيت كنت اتصلت بأخواته .. راحت الكبيرة مسكاه مبهدلاه شوية .. وتقوللى سيبك منه دة ساذج
وتخيلو اننا مروحناش نتابع الحمل مع دكتورة غير بعد الشهر التانى ؟؟ الراجل كأنه برضو مش مصدق !!!!!!
*****************
يا خراشى على الرغى
بس هو أنا كدة أول ما بتفتح مبعرفش أوقف ولازم كل التفاصيل المملة
والنهاردة افتكرت الموقف اللى لايمكن أنساه .. وقلت أكيد هلاقى عندكم مواقف اكتر من كدة .. وأهو نتسلى سوا لغاية ما ربنا يفرجها عليا وأولد بنت الصعيدى اللى مكسحانى دى
يا خوفى يوم ما أولدها يقول لى جيبتيها منين دى .. صعيدى ويعملها بغض النظر عن الكرش اللى ساحباه قدامى فى كل حته
يلا بقى يا حلوين ايدكم على الدعوتين الحلوين .. فاكرينهم ولا نسيتو ؟؟
نقول كمان
دعوة لكل مشتاقة ان ربنا يمن عليها بالذرية الصالحة الطيبة عن قريب ان شاء الله
ودعوة تانية ليا أنا والغلابة أمثالى ربنا يقومنا بالسلامة ويرزقنا ولادة سهله وأطففال سليمين معافين من كل سوء
وطبعا التقييم مفروغ منه بعد الموضوع اللى يشل دة
وسلاااااااااااااااااااااااااام مؤقت يا حلوين لغاية ما أدخل لكم القسم دة مرة تانية وأقول لكم انى فقست بالسلامة
ثومه حمدى ثومه حمدى 276742_1.gif فتكات ست الكل Fatakat 276742 حائل – السعودية – مصر