سلام عليكم
اولا يا بنات انا عاوزه اقولكم انا كنت تخيييينه اوى وكان وزنى 162 وكان كل الى يشوفنى ميدنيش سنى والى فى الشارع يقولى يا حجه والى يقولى يا مدام وكنت حطيت نفسى جوه الاسدال لان مكنتش بلاقى مقاسى ومكنتش اعرف ان فى محلات المقاسات الخاصه لحد ما فى مره كنت بشترى حاجات من محل لقيت واحده بتقولى انا كنت فى وزنك واكتر بصتلها لقيتها حوالى تعمل 60 كيلو استغربت قولتلها طيب انتى عملتى ايه لقيتها بتقولى انا عملت تدبيس معده اول ما قالت الكلمه اتصدمت لانها كانت فكره بعيده عنى وكنت عارف ان البيت عندى هيرفض المهم سألتها على اسم الدكتور وعنوانو ومشيت ولقيت الموضوع بدأ خلاص يدخل دماغى لما شوفت البنت وفضلت افكر ولما روحت قولت لماما لقيتها قالتلى اسكتى عمليات ايه وزفت ايه ابقى روحى لدكتور وانا طبعا جربت كل الدكاتره وكل الرجيم لى ممكن تتخيلوه وكنت اعملو اسبوعين وازهق وابطل المهم حاولت كل المحاولات لحد ما اقنعتهم واللى انا هقولو ده اقسم بالله انو بالتفصيل
روحت للدكتور المستشفى بتاعتو الخاصه لقيتو بيقولى هتعمليها هنا ب 19 الف طبعا تنحت وكنت عاوزه اشتمو
لقيتو قالى طبعا مش هتقدرى طيب تجيلى يوم السبت مستشفى احمد ماهر المهم مكدبتش خبر وروحت وقتها حسيت ان مصر كلها تخان مفيش حد رفييييع من كتر الزحمه المهم هو جه وابدينا ندخل واحده ورا التانيه
قالى اطلع للسكرتيره بتاعتو طلعت قالتلى عاوزه تعمليها الاسبوع ده ب 11 الف عاوزه تحجزى وتعمليها بعد 3 شهور ب 8 الاف عاوزه تحجزى وتعمليها بعد سنه ب 5 الاف فا انا قولتلها انا مملكش اى حاجه من دول طيب بصى احجزيلى بعد سنه وانا لو جهزت قبل كده هقولك المهم راحت كتبتبلى المعاد على الكشف
ومشيت وانا كلى حزن وفضلت فى خلال 3 شهور بتنطط عشان اجمع 8 الاف لانى مكنتش قادرها ستنى لسنه جايه كمان وكان وزنى هيبقى الضعف طبعا
لحد ما ربنا كرمنى وكملت ال 8 الاف وروحت فعلا ادتنى ورقه بالتحاليل سألت عنها فى المختبر لقيتها ب 480 جنيه طبعا دى تكلفه تانيه مش محسوبلها قولتلها انا لو عملتها فى احمد ماهر فيها مشكله قالتلى لا طبعا النتيجه واحده المهم سألت عليها فى المستشفى لقيتها ب 210 طبعا جريت عملتها على طول وطلعت وديتها للدكتور قالتلى تيجى يوم السبت الجاى الساعه 6 الصبح لان الدكتور بيبدأ بدى بالظبط يا جماعه والله انا اعدت فى غرفه العمليات ربع ساعه ونص ساعه افاقه وربع ساعه تخدير وطلعت اتحجزت فى الاوضه ولما فوقت الدكتور المتابع قالى قومى اتمشى لو مقومتيش هتبقى زى واحد فى الاوضه الى جنبك عملها ومخرجش بقالو اسبوعين طبعا قومت زى المجنونه امشى برغم انى مكنتش قادره بالنسبه للجرح هو عباره عن فتحه من تحت الصدر مباشره لحد قبل الصوره بشويه والى هتقولى طيب شكلها ولا مش مشكلها هقولها اسكتى يختى وكنت عاجبك شكلك وانتى شبه التلاجه ال 18 قدم؟ وعلى فكره يا بنات انا مكنتش متجوزه ولحد دلوقتى انا بنوته ومخوفتش من شكلها ولا من جوزى الى هيشوفنى لانى اكيد هقولو وهكون فخوره بنفسى جدا بعد كده لانى قويه ومخوفتش ومستسلمتش وانا حاليا مخطوبه وعموما انا اقولت افيدكم بتجربتى الشخصيه واى اسأله انا تحت امركم
ومتنسونيش بقى بالدعوه الحلوه لو استفدتم ادعولى بالهدايه
وادعولى ربنا يسعدنى مع خطيبى ويبعد عننا اى حاجه وحشه
نونا فتوكه نونا فتوكه فتكات نشيطة Fatakat 952141 شبرا مصر – القاهره