صباح الخير يااحلى فتوكات
اولا انا حبيت اشكركم لمتابعتكم لى فى الموضوع اللى فات والنهاردة انا حبيت اسرد ليكم قصتى للعمليه اللى عملتها امبارح
انا زى مانتو عارفين قعدت ادور وابحث عن العمليه واقرأ مواضيع وادخل على يوتيوبات اجنبيه وعربيه للى عملوها وقررت اعملها فعلا… رحت اخدت الرقم من موقع كان منشور ع الفيس بوك لاستشارى جهاز هضمى واستاذ سمنه وبدأت اتصل بيهم واستفتسر وزى مانتو عرفين لقيت تكلفه العمليه 16 الف جنيه ودا رقم كبير الحقيقه على الاقل بالنسبه لى بعد صلاه الاستحارة والمشاورة قررت اعملها وحجزت امس الساعه 8 مساء
وبما انى من كفر الشيخ الدكتور خلانى اول واحدة علشان الحق اروح وبالفعل طلعت انا وامى واخويا الساعه 4 العصر وصلنا المستشفى التخصصى ومش عارفه هنا تقريبا اكتب اسم المستشفى او الدكتور ابقو عرفونى ولو عادى هبلغكم بالعنوان .. هو دكتور مشهور اوى وبييجى بقنوات كتير.. ودخلت المستشفى كانت نظيفه اوى وراقيه اوى واستقبلونى استقبال كويس وقعدت ف الريسبشن لانى اتاخرت نص ساعه بسبب الطريق والزحمة فكان فى حاله قبلىدخلوها ولقيت ناس باه جايه تشيل البالونه بعد انتهاء ال6 اشهرقلت بأه اقعد اسالهم زيادة اطمئنان فلقيت واحدة جمبها واحد طخين اوى وهى رفيعه اوى قلت اكيد جاى يعمل فوجات ان هى جايه تشيل لانها حملت ونزلت من 92 الى 68 كيلو وبصراحة قلت فى نفسى ياسلام لو بقيت كدا دنا ازغرط واطلع ارقص بلدى هههههههههههههه المهم شويه وجا ولد وامه وابوه والثلاثه عاملين البالونه الام نحفت اوووى على الصور اللى فرجتهالى والولد محتاج بالونه كمان لانه كان 165 ونزل الى 119والاب معتدل بس هما قررو ميعملوهاش للولد تانى حاليا الا لما يرتاح على الاقل 3 شهور المهم دقت ساعه الصفر ونادتلى النيرس ودخلت قابلت الدكتور حد مهذب اوووى وقعد يهزر معانا الاول وقعدت اكتر من ساعه معانا يتكلم بس يعنى اى مريض سمنه وان مهما الانسان نزل من وزن لازم يعرف انه مريض سمنهوالرياضه مهمة المشى يوميا دا اهم شىء وفوائد الخضار والفاكهه والاكل الصحى… وايه هى البالونه وازاى بتشتغل واى هى عيوبها ومميزاتها وانا هقولكم كل حاجة بأمانه طبعا مميزاتها معروفه انها بتنزل الوزن فى خلال 6 شهور فى اول شهر اللى فوق ال100 كيلو بكتير بينزل حوالى 12 الى 20 كيلو… اللى اقل بينزل اقل طبعا حسب استجابه الجسم بعد كدا الدكتور بيمشيك على نظام غذائى ينزلك 5 كيلو او اكتر فى الشهر … بحيث ان على اخر ال6 شهور تكون فقدت متوسط 35 الى 45 كيلو دا للاحجام الوسط وكل ما كان اكتر كل ما كان اكبر… طب هتسالونى ماهو احنا ممكن نعمل ريجيم ونفقد اكتر من كدا فى الشهر اقولكم اه صح وانا كنت بنزل اكتر من كدا بس الميزة الذهبيه فى البالونه انها بتعود الجسم غصب عنه انه ينتقى اكله ويتعود على مقدار معين وبسييط جدا للحياه .. وان اكلتى اكتر غصبا عنك بترجعى الاكل دا لان البالونه بتقولك لا انا مش هسمح باكتر من كدا… طب مانا ممكن اكل شيكولاه وحلويات واضحك عليها .. اه صح بس ساعتها تبقى فشلتى فى انتقاء الاكل لان كدا انتى بتبوظى عمليه ونظام للحياه فغصب عنك بتاكلى المفيد للجسم خضار فاكهه بروتين وحلويات بردو بس كميات بسسسسسسسسسسسسسسسسيطة اووووووى وهشرحهالكم بعدين… المهم بعد ماخلص الدكتور طلب مننا الانتظار 5 دقايق والممرضه هتودينا غرفه المنظار فضلنا قاعدين ربع ساعه كدا وجت الممرضه نادلتى اطلع الدور الخامس وطلعت انا وامى واخويا بالاسانسير ودخلت مكان جميل اشبه بالفنادق بردو وقعدتنا 5 دقايق بالظبط وطلبت منى الدخول لقيت 3 اطباء من ضمنهم الدكتور وممرضه وماما طلبت تدخل معايا فقالها ماشى قلعنا الشوز ودخل وزنى لقيت نفسى 101 كيلو وسالنى عن اسمى بالكامل وعنوانى ورقم تليفونى وعمرى ونيمنى على الشازلونج زى سرير عمليات كدا ولبسونى يونى فورم للعمليات فوق لبسى ودكتور التخدير زووووق جدا هو طبعا مش بخدرك هو بيدكى ابرة تنيمك 10 دقايق علشان مرجعش وهما بيدخلو المنظار وركبلى كانولا وطلب منى الاسترخاء وعدم القلق والخوف نهائى ملحوظة .. هما طلبو منى اروح صايمة وكنت جعانه باه جدا … حتى بقول لامى ماتيجى نضرب بيتزا قبل العمليه علشان هتحرم من الاكل وقعدنا نضحك… المهم طلب منى الدكتور اردد سورة الاخلاص وبعدين لقيت نفسى بنام غصب عنى محستش الا وانا فى غرفه تانيه خالص وماما واخويا قدامى وانا عماله اخترف واقول ايه… محمد مرسى مش ماشى .. محمد مرسى قاعد … وهما عمالين يضحكو … الراجل جابلى هس هس فى دماغى هههههههه من كتر ما انا متابعه سياسه ههههه المهم لقيتهم بيقوللوى حمد الله ع السلامة وكدا ولقيت ممرضة امورة اوى ماسكة ايدى بتقولى انتى كويسة حاسة بحاجة اااه نسيت دنا دخلت العمليات اه حاسة بمغص وعايزة ارجع .. ماما بتقولى جعانه ؟؟؟؟ جعانه ايه انا حاسة انى ضاربه خروف مش جعانه اطلاقا… وحاسة انى اكلت زيادة عن اللزوم ومش طايقه اى كلام عن الاكل وفعلا بدأت احس انى هرجع فعلا ومغص بقا قالتلى انتى مش هترجعى لاننا اعطيناكى ابر للمغص والترجيع… فاكرين باه الست اللى كانت مع ابنها جتنى وانا نايمة قالتلى انصحك نصيحة خلال الثلاث الايام الاولى هترجعى وهتتبهدلى شويه هما هيألولك اشربى وكلى اياكى لانك كل ما تاكلى كل ما ترجعى لما جانى الدكتور ادانى 2 كارت واحد السيريل نمبر بتاع البالونه ودا ضرورى جدا ومكتوب بالانجلش وكرت بتاعه وقالى اتصل بيه فى اى وقت ان شالله الفجر .. وادانى ورق لفترة بعد البالون مباشرة لمدة اسبوعين وبعدين اخر اسبوعين وبعدين النظام الشهرى قالى فتره البالونه دى اخطر فتره ودا اللى هيحدد نزولك انتى دلوقتى معدتك مش معدتك اللى تعرفيها انتى داوقتى هتعتبرى نفسك طفل لسه مولود الاكل لمدة اسوعين سوائل وعلى رشفات بسيطة ان قدرتى وكل رشفه والتانيه دقايق وكتبلى روشته علاج للمغص والترجيع قالى اول يومين هتتبهدلى شويه من الترجيغ والمغص بعد كدا هتبقى طبيعيه جدا بس اكلك هتفوجأى ان مع ربع كوبايه ميه حتى بتشبعى هناكل فواكه مستويه ومتقشره ولو هتسلقيها وتهرسيها .. هناكل خضار مسلوك وزبادى ولبن اول شهر بعد كدا اكلك عادى جدا بس هيكون بسيط هتلاقيه زى العينات اعرفى ان ال6 شهور مش هما حلك لان دى الفتره الذهبيه الجسم هياخد الطاقه من الدهون المتخزنه وانتى هتمشى على نظام حياه اتعودى تمشى وتنقى اكلك كويس مفتاح حياتك فى ايدك وقدرتك انتى مش بالبالون هى مجرد مساعد وتعود… وبس ومشيت وطول الطريق باه مش طايقه نفسى حاسة بقالب طوب فى معدتى وعايزة ارجع مش عارفه وتقلصات خفيفه روحت وهاتك ياترجيع ومعدتى فاضيه اشرب مايه رشفات ارجع اشرب الدوا ارجع لغايه الفجر اتصلت بيه وهاين عليا اعيط واقوله تعالى شبل البتاعه دى… قالى خدى ابر اللى كتبتهالك عند اللزوم اخدتها وبعد 10 دقايق مفيش اى حاجةة ونمت من 7 الصبح ولسه صاحيه ماما جابتلى عصير برتقال فريش… بعد ما كنت بضرب الكوبايه كلها ويمكن الشفشق كله مش عايزة اقولكم انى اخدت رشفتين.. 2 فقط ومش طايقه وحاسة انى هرجع تانى وعماله اتحمل واخدت العلاج باه ومش حاسة باى جوع.. ولا عطش … بالصدفه انا فاطرة النهاردة لظروف عندى ويمكن دا مساعدنى شويه
وهكتبلكم كل شىء والوزن اللى هنزله واى استفسار انا بالخدمة
واسفه لاطالتى عليكم
tmlly tmlly images/avatars/peak.gif فتكات حبوبة Fatakat 540031 المنصورة – egypt