السلام عليكم يا بنااات
انا بسمع من بنات كتير اووووى انهم مبيعرفوش يخسوا .. حتى مع الرجيم .. او يخسوا شويه و بعدين يثبتوا ..
عارفين المشكله فين ؟؟ فى الرمرمه … ايوه الرمرمه ..
انا خبره فى الرجيمات بقالى 6 سنين ولا حاجه .. و فعلا لاحظت انى مهما عملت رجيم و جيت على نفسى .. بس ضعفت فى يوم و كلت مانجايه مثلا .. او شربت شفطتين بيبسى .. الاقينى مخستش حاجه طول الاسبوع
حاجه تانيه كمان بتغيظنى اوى .. مفيش حاجه اسمها فاكهه ممنوعه .. لان اى فاكهه ربنا اللى خالقها سكرها بيتهضم بسهوله جداا حتى القصب .. بس الفكره فى الكميه .. يعنى مثلا هاكل مانجه يبقى حتة مانجه او مانجايه صغيره
نفسى فى البلح وماله 6 بلحات مثلا طول اليوم .. عنب لو كلتى ربع كيلو فى اليوم مبيأثرش
لكن مثلا حاجه زى البطيخ .. كنت باكل بطيخه فى اليوم و بخس , وكنت اسمع من زمايلى فى الجيم ان الدكتور بيقولهم شريحه !!
شريحة مين يا ابو شريحه !!
و تانى افتكاسه من دكاترتنا .. عدم الاكل بعد الساعه 10 او 7 او ايا كان او ان السهر بيتخن ولازم تنامى بدرى .. دى معلومه غلط جداا ..اسمعى اى دكتور اجنبى و هتلاقيه بيأكد ان دا فتى
اهم حاجه فى اليوم السعراااااااااااااااااااااات
حطى لنفسك سعرات معينه فى اليوم .. طبعا مش هنحسب بالآله الحاسبه ..
لكن مثلا انا النهارده اتغديت غذا فيه فراخ او لحمه اتعشى عشا خفيف .. اتغديت تونه او بيض اتقل شويه فى العشا .. الكلام دا برده يا جماعه عن تجربه كنت بسهر و باكل فى اى معاد بس باخد بالى من الكميات
طبعا السهر غلط والنوم بدرى مفيد للجسم .. لكن انا بتكلم عن البنات اللى متعوده عالسهر
يبقى كدا اتفقنا على حاجتين .. مفيش حاجه اسمها مفيش اكل بعد الساعه 7 . ممكن ناكل بس حاجات خفيفه .. كباية لبن او زبادى .. تمرتين او 3 .. فاكهه او فاكهايتين
وبلاش رمرمه .. هاتى دايما حلول بديله .. بمعنى .. انا خارجه مع اصحابى و هموت على حاجه مسكره .. مش لازم بيبسى . هاتى قصب حجم صغير مش هيعملك حاجه
طب قاعدين فى كافيه . اطلبى اى عصير فريش و ياريت لو ينفع سكر خفيف .. ولو مش خفيف اشربى نص الكبايه و متاكليش سكريات تانى طول اليوم
طب احنا رايحين ناكل برا .. اطلبى سيزر سالاد او استنى لليوم الفرى
نفسى فى شيبسى ..كلى كام واحده سن بايتس .. كام واحده من نفسك مش كيس لانه بيتخن
هموت على ايس كريم .. هاتى بوله واحده صغيره و كوليها وانتى نازله مشوار اى حاجه فيها حركه عشان تحرقيها
نفسك فى حتة جاتوه او اى حلويات .. .خدى حته زى علبة الكبريت .. واعملى حسابك تقللى شويه فى العشا اليوم داا
اه وعلى فكره مش لازم تشربى مشروب الاعشاب الحارقه .. هوا مفيد اه بس تأثيره مش اكتر من 6 % . مش لازم اشرب مشروب يخلينى هرجع واكره عيشتى .. عشان اخس .. الرجيم لازم تبقى عارفه تتعايشى معاه لان دا اسلوب حياه مش فتره و خلاص
وآخر نصيحه الرياضه ثم الريااااااااااااااضه ثم الريااااااااااااااااضه
انتى عارفه لو بتعملى رجيم و مثلا بتاكلى 800 سعر فى اليوم .. ساعه رياضه تنزلك منهم 200 تبقى اكنك كلتى 600 مش 800
غير كدا الرياضه بجد بتغير شكل الجسم .. هتحدد جسمك و تعملك وسط و كمان هتخليكى تخسى وانتى شكل جسمك حلو مش تخسى بترهلات
وحاولى كل فتره تزودى مدة التمرين .. عالاقل انزل امشى مره 10 دقايق مره تلت ساعه لحد ما توصلى لساعه كل يوم
والله يا بنات مستحيل حد يعمل كدا دا و ميخسش
الاوزان الكتيره لازم تتابع مع دكتور رجيم عشان تلتزم و عشان يديها نظام مختلف كل فتره .. بس اهم حاجه منيأسش .. ساعات الجسم بيعاند بيبقى لازم نصبر عليه شويه .. لو لقيتى جسمك معاندك .. زودى فى الرياضه او المشى .. اوعى تحبطى ابداااااااااااا
خلى دايما فى شنطتك فول سودانى .. او اى مكسرات ماعدا اللب .. حسيتى فجأه انك جعانه اوى و خلاص هتنهارى .. كلى 6 حبات وممكن اكتر بس متكتريش عن 12 فى اليوم
هيقفلوكى و يسدوا نفسك لان الحاجات دى فيها زيوت طبيعيه بس مفيده
أكدى على مامتك او اللى بيطبخ ان يعملك اكلك خفيف .. فراخ مسلوقه او مشويه من غير جلد .. لحمه بدون دهون .. بلاش اى حاجه مقليه طبعاااا.. واكيد بلاش يعملوا حلويات وانتى عامله رجيم
مبدأ المشاركه حلو اوووووووووووى حتى للى مش عاملين رجيم .. يعنى اجيب كيس سن بايتس و اكله مع صاحبتى .. او نشرب العصير فى الكافيه سوا .. او اطلب كريم كراميل و ناكله سوا .. دا هيخليكى تاكلى اللى انتى عايزاه بس هيحدد كمية الاكل
الاراده يا بناااااات مهمه اوى .. دايما عندك اراده انك لازم تنزلى الوزن دا .. دايما ليكى هدف اقل من وزنك ب 5 كيلو بس مثلا و لما توصليله تحطى هدف تانى
متعديش يوم من غير حركه انشالله ترقصى ولا تتنططى فى البيت
تخيلى دايما نفسك وانتى خاسه .. صدقونى الموضوع سهل .. كلها اسبوعين ولا شهر رجيم بالكتير و هتتعودوا و هيبقى دا اسلوب حيااااااااه
يارب كل البنات تخس و حتى اللى مش خاسين .. لازم تحبوا نفسكوا و تثقوا فيها .. وانا عن نفسى كتير بشوف بنات كلبوووظه و بحس انهم قمراااااااااااات و مزز
كل بنت و ليها حلاوتها .. بس مش معنى انى تخينه انى اضرب اى عبايه سودا و يبقى شكلك شبه الحاجه
البسى لبس شيك و اهتمى بنفسك … البسى فى الصيف دريلات طويله واسعه ملونه و مبهجه
وفى الشتا بالطو طويل واسع … حبى نفسك اوى لانك اول ما هتحبى نفسك هتحبى تخسى و تغيرى فيها عشان تحبيها اكتر
كدا انا خلصت يا بنااات و اسفه لو الموضوع مش مترتب .. بس انا مش خبره فى الحاجات دى
white Tulip white Tulip 465952_4.gif فتكات رائعة Fatakat 465952 المنصورة – مصر