السلام عليكم ورحمة الله وبركاته
انا عارفة نص رواد القسم نفسهم يخسو والنص التاني يتخنو
اللي عايزين بتخنو دول يطلعو برة
واللي هيخسو باذن الله يركزو معايا
ياتري بتحسي بايه وانتي مقيدة باكل معين وكمية معينة والبيت كلو بياكل حاجة تانية؟؟
احساس وحش صح؟
طب بما انه وحش تفتكري هتستمري فيه ؟؟
لو استمريتي مش هتستمري طول عمرك وهترجع ريما لعادتها القديمة وعشان كدا كلنا بنلف ف دايرة مغلقة "الا اذا كنتي مستمتعة وانتي بتفطري ربع رغيف وبيضة مسلوقة وفي دماغك ان دا هيكون فطارك طول العمر ومش متضايقة "
انا بقي اكتر حاجة اكرهها اني اتقيد بنظام اكل معين الفطار كذا والغذا كذا والعشا كذا والمشروب السحري والشوربة الحارقة وبتاع
تلات ارباع اللي بيجربو الحاجات دي مش بيخس والربع او اقل بيخس والتلات اربع بيحلمو يكونو زيهم ومبيحصلش متفهموش ليه
انا كل دا مدخلتش في المووضوع انا جاية اتكلم عن نظام ومش نظام
النظام بيقول لما تجوعي كلي .. صعبة دي ؟؟
بس كلي لقمة وخلاص هتلاقي عصافير بطنك اللي بتصوصو بطلت صوصوة
ولما تجوعي تاني كلي .. لقمة برده
وانا مش بتكلم في نظام اللقيمات ولا اعرف عنه سوي اقل القليل
انا مش جاية الزمك ب 5 لقيمات وهابي ميل
طبعا نظام ناجح وكل حاجة بس دا مش موضوعي
انا مفهومي عن حديث النبي بحسب ابن ادم لقيمات يقمن صلبه هو اللي انا بقوله مش خمس لقيمات وهابي ميل
يعني رايي فاكس للفطار والغذا والعشا
معندكيش عدد محدد ولا انواع محددة بس الكميات نوعا مامحددة وبسميها غموسة
يعني صحيتي اكيد مش جعانة محدش بيصحي ياكل اشربي حاجة وياريت من غير سكر او معلقة مثلا
"ياريت تاخدي بالك من سعرات الحاجة والواحد بفطرته بيفرق بين الخيارة و القشطة"
شوية وجوعي غمسي حتة جبنة لقمة وخلاص مشبعتيش ولسة في قررررررررصة جوع خدي التانية اول ما القرصة تروح خلااص "ودي اهم اساس للنظام اللي بتكلم فيه"
خلاص بقي عيشي يومك حسب انتي بتشتغلي ولا ست بيت ولا طالبة ولا ايه ظروفك نفرض مثلا هتنضفي شوية وبعدين القطيلك خيارة ولا حاجة
وبعدين دخلتي تعملي الغدا " غديهم ومتعمليش حسابك" عملتي فراخ خدي دبوس الفرخة لما يقرصك الجوع " سامعيني وانا بقول يقرصصصصصصصك يعني مش اي طفاسة وخلاص"
لسة جعانة معلقة رز من اللي عملتيه وخلاص
كدا مفيش قرص ان شاء الله
شوفي بقي بتكملي يومك ازاي لو تقدري ترقصي شوية قبل ما ابو العيال يجي كان بها "بقصد عموما اي نوع رياضة في اي وقت"
وهكذا المهم حافظي علي حاجتين : كلي لما تجوعي اوي " ما فوق الجوع وما دون الشبع" يعني لحد ما تروح قرصة الجوع مش لحد ما تشبعي ولا تفطسي
التانية : قللي السعرات قد ما تقدري يعني بدون سكر احسن من بسكر و مسلوق احسن من بصلصة او محمر بفيجيتار وهكذا "وانا بقول احسن مش اساسي يعني متحرميش نفسك من حاجة لانك هتعيشي حياتك كلها بالنظام دا فمش معقول تعيشي عمرك كلو متدوقيش صنف معين الا لو ارادتك حديد يعني"
دي رؤيتي المتواضعة في موضوع الاكل ولربنا يسعد الجميع
DoU DoU 525457_2.gif فتكات رائعة Fatakat 525457 CairO – EgYpT