بسم الله الرحمن الرحيم .. وبه نستعين
السلام عليكم ورحمة الله وبركاته
أزيكم يا أحلى فتووووكات
مش عارفة أبدأ الموضوع منين .. بس اللي عرفاه أني أخدت قرار أني أعمل فرحي في مسجد من فترة كبيرة
معظم صحابي وأهلي حتى أخواتي كانوا متخيلين أني بهزر وأنه صعب الحكاية دي تحصل
كمان والدتي كانت نفسها تفرح وتشوفني في الفرح والكوشة وكانت معارضة الموضوع خاااالص
حتى خطيبي كان زي ماما نفسه يعمل فرح وهيصة في قاعة وكده 
بس لما بتبقى نيتك رضا ربنا وإنك تبعدي عن الذنوب ربنا بييسرلك كل أمر عسير
على فكرة أنا مش منتقبة أنا لبسي حجاب عادي زي كل البنات بس ملتزمة في لبسي على انه يكون واسع لا يصف ولا يشف، بس الموضوع جه أني حضرت أفراح وشوفت كتير بيبقى العريس والعروسة بيبتدوا حياتهم بفرح فيه رقص ونميمة وغيبة وتأليس على العروسة وعلى العريس ومحدددددش بيرضى بأي حاجة طب شوفوا الحديث ده
قال رسول الله صلى الله عليه وسلم:
مَنِ التمسَ رِضَا اللهِ بسخَطِ الناسِ ، كفاهُ اللهُ مُؤْنَةَ الناسِ ، ومَنِ التمسَ رضا الناسِ بسَخَطِ اللهِ ، وَكَلَهُ اللهُ إلى الناسِ
الراوي: عائشة أم المؤمنين المحدث:الألباني – المصدر: صحيح الجامع – الصفحة أو الرقم: 6097
خلاصة حكم المحدث: صحيح
حقولكم الخطوات اللي أخدتها:
1- بداية أقنعت أمــــي بما أنها ماشاء الله ربنا يحفظهالي ويباركلي فيها وفي عمرها بتحفظ قرآن فقولتلها أن رضا ربنا أهم من رضا الناس وأني مش عايزة أبدأ حياتي بحاجة تغضبه وان مفيش حد من الناس حيعجبه أي حاجة وكذلك أقنعت خطيبي ربنا يبارك فيه ويحفظه.
2- بدأنا رحلة البحث عن مساجد لأشهار زواجنا وكتب الكتاب وحقولكم افضلهم كانوا كالتالي (بالإسكندرية):
أ- قاعة مسجد المواساة (الابراهيمية – شارع أبو قير): خطيبي راح شافها قال انها واسعه وكراسي محطوطة صفوف ومتقسمة جنبين وتاخد عدد كبير وسعرها كان 1200 جنيه تقريباً وكمان ممكن انك تعملي فرحك في الجنينة اللى جنب القاعة ودي بتبقى احلى كمان اوووى عشان بيتعملها ديكور اضاءة ومتقسمة لترابيزات ودي سعرها 1800 جنيه.
ب- مسجد الحديقة الدولية جنب الداون تاون: وااااسع جدا وممكن يتعمل كتب الكتاب والاشهار مختلط (نساء ورجال) والمكان نفسه جميل والسعر 200 جنيه.
ج- قاعة قباء نادي النصر (بسموحة): انا شوفت صورها وهي سعرها غالباً ما بين 250 – 700 جنيه وبصراحة معنديش معلومات مؤكدة عنها بس من الصور حستها جميلة برضه.
د-مسجد مالك الملك (بالهانوفيل – امام شارع رضوان): مسجد جميل جدا وكبير الفرح بيكون منفصل العروسة والنساء في مصلى السيدات فوق والرجال تحت فى المسجد سعره 110 جنيه وده من المساجد المشهورة بالهانوفيل وكبير وواسع وكمان بيعلقوا نور عليه
ملاحظة: مسجد على بن ابي طالب ومسجد حاتم بيعملوا في قاعة مناسبات بس صغييييرة وبيطلبوا منك ان الافراد لا تتعدى 30 فرد يعني مبقاش زي زمان بيعملوا الافراح فى المسجد نفسه
طبعا في مساجد كتييييير اوى بس بصراحة دول اللى سألت عليهم وحسيت انهم مناسبين
3- في أفكار جديدة وجميلة أعملها تفرحني يوم الفرح:
أ-نتفق مع مصور عشان يصورنا في مكان مفتوح زي الصورة دي كمثال
(الصورة انا حاولت اجيب فيها اشخاص مش باينين) وطبعاً في أفكار كتييير اوى للصور ممكن تلاقوها في صفحات المصورين على الفيس.
ب- اتفقت انا واختي نعمل ليلة حنة في البيت ويكون فيها كل صحباتي ونهيص فيها زي ما أحنا عايزين عشان كمان والدتي تحس بالفرح والهيصة بقى
جربي تطبعي صور صحابك اللى حييجوا ليلة الحنة ولو حتى طباعة عادية ابيض او اسود او حتى الوان في سايبر او ممكن تطبعيها كصور وغالبا بيكون اصغر حجم للصورة العادية بجنيه
وهاتي لوح فل كبير لو عندك لو مش عندك هاتى لوح كارتون وزينيهم بتــل وشوية اشكال بورق ملون (تقدرى تبدعي وخيالك يبدع)
وهاتى دبابيس بتاعت خرائط او الدبابيس الكبس علبة صغننه
وجهزي قلم للكتابة على الصور
وخلى كل واحدة تدخل تكتب على صورتها وتعلقها على لوح الفل/الكرتون بالدبوس الكبس وبجد حتكون فكرة جديدة جدااااااا
ج- نوضب مشروبات للمعازيم (او ممكن كمان نعمل علب عند حلواني فيها جاتوه ونواشف وبيتزا) عشان نكرم ضيوفنا وتتوزع بعد اشهار الزواج في المسجد.
4- تقرروا تسافروا بالمبلغ اللي كان خطيبك واهلك محددينه للفرح لأماكن جديدة وجميلة زي تركيا او جزر المالديف او ممكن الغردقة او مرسى علم مثلاً
عايزة أقول حاجة لكل عروسة أقدمت على القرار ده او أن عريسها هو اللي قرر القرار ده
بجد ربنا يبارك فيكي ويحفظكم ويجعل حياتكم سعيدة
احساس تاني لما تحسي انك بتعملى فرح بنية خير خلي نيتك رضا ربنا انك بتعملي فرحك عشان ترضيه،
وتجمعي أهلك ويكون في صلة رحم،
وكمان إنك متكلفيش أهلك وعريسك مبالغ طائلة لعمل فرح فى قاعة لمدة ساعتين تلاتة وتروحي بذنوب الساعات دي وان ربنا يبعد البركة عن حياتك بيها (ممكن بالاتفاق مع أهلك وعريسك تتبرعوا ولو بجزء من الفلوس اللى كنتم حتعملوا بيها الفرح في قاعة للمسجد اللى حتعملي فيه فرحك)
متخافيش حتلاقي احياناً في ناس بتستقبل خبر فرحك في المسجد أنه حاجة غريبة
بس كووووني متأكدة إن بإيمانك بالفكرة حتنشريها وحيكون ليكي ثواب في كل حد ينفذ الفكرة دي
وبجد حاجة تفرح اننا نكون مسلمين وننمي ونطور مساجدنا باننا نعمل افراحنا فيها
ياريـــــــــــت متنسوش تقييم الموضوع ودعووووة منكم ليا أن ربنا يفرحني ويفرح أهلي ويوسع ويبارك في رزقي أنا وزوجي بإذن الله ويتمم فرحي على خير
مشاركات هاااااامه
https://forums.fatakat.com/showpost.p…5&postcount=17
https://forums.fatakat.com/showpost.p…2&postcount=45
https://forums.fatakat.com/showpost.p…&postcount=158
https://forums.fatakat.com/showpost.p…&postcount=160
قلــب الملائكة قلــب الملائكة 654796_1.gif فتكات متميزة Fatakat 654796 الإسكندرية – مصر حبيبتــي