السلام عليكم و رحمة الله و بركاته
النهارده يا فتوكات أنا قاعده فاضيه شويه و قولت أكتبلكم موضوع كنت عايزه اكتبه بقالي فتره و معنديش وقت
و الموضوع ده بيهم العرايس أكتر حاجه لانهم بيشترو كل جهاز البيت مره واحده مش زي ست البيت اللي بتجدد حاجه كل فين و فين
عشان كده قررت أكتبو في قسم مستلزمات العروسه و أتمنى إنكم تستفيدو منو
الموضوع و ما فيه هو ان كل واحده رايحه تشتري جهاز كهربي بتلاقي قدامها اختيارات كتير و ماركات كتير و مبتبقاش عارفه إيه الأحسن
و ناس كتير تدخل المحل و تحتاس تقول البياع أكتر واحد في السوق و عارف عيوب كل حاجه أنا هاخد برأيه
و تروح سائله البياع أو صاحب المحل إيه رأيك آخد إيه و ترشحلي نوع إيه في الأول عشان يحسسها بالمصداقيه يقولها كلو موجود و له مميزاته و اللي تحبيه عشان يحسسها انو ملوش مصلحه
تروح تقولو بس انت برضو عارف أكتر مني و ساعدني يروح يقولها ماركة كذا دي ممتازه و يعددلها مزاياها و طبعا برضو يختم بكلمة براحتك أنا كده كده ببيع و ده عندي و ده عندي و شوفي رأيك إيه
تروح المسكينه تصدقه و تاخد الحاجه اللي هو قالها عليها مهو سبك عليها الدور انو ملوش مصلحه فحاجه و انو بس بيقول الحق
طيب بعد الرغي ده عايزه تقولي إيه يا رغاية انتي ؟؟؟؟؟
عايزه أقول غن معظم البياعين مبيبقوش بينصحونا ولا أي حاجه و ليهم مصلحه في البيعه
طب إزاي إذا كان هامش الربح في معظم الأجهزه متشابه يعني كده كسبان و كده كسبان ؟؟؟؟؟
ده اللي هو بيقنعك بيه و ده حقيقه فعلا بس في حقيقه تانيه إنتي متعرفيهاش ان الشركات و الماركات بتبقى متفقه مع كل بياع انو يروج لسلعه معينه و لو باع منها عدد معين هياخد نسبه أو مبلغ معين عشان يشجعوه يبيع ماركتهم عشان عارفين البياع أد إيه تأثيرو على المشتري و كل بياع بيبقى متفق مع شركه معينه و بيروج للسلعه بتاعتهم
طب افرضي انك مسألتيهوش على رأيه و قولتيلو عايزه ماركة كذا ممكن تلاقيه راح قايلك إشمعنه ماركة كذا أنا مستغرب في ماركة كذا أحسن منها و يبتدي يخليكي تغيري رايك و يقولك انو عايز مصلحتك و كلهم مكسبهم واحد و الشويتين دول مهو عايز يحقق التارجت
طب انتي يا فزلوكة عرفتي منين الكلام ده ؟؟؟؟؟؟
هقولكو أنا كنت زي أي واحده فيكو بروح أشتري و بتأثر برأي البياع جدا لنفس السبب ان هامش الربح واحد فهو بيقول الحقيقه
و فمره كنت رايحه اشتري غسالة أطباق
فالبياعه اللي في المحل قعدت ترشحلي ماركه و أنا كنت رايحه عشان أشتري ماركه تانيه قعدت تقولي و الله ده عرض و متخفض من تمنها أد كذا و إزاي تسيبي دي و تاخدي دي و الصراحه هي عندها حق الماركه اللي هي بترشحهالي كانت فعلا افضل بس كانت بترشحهالي باستماته فظيعه و أنا في الآخر أخدت الماركه اللي هي قالتلي عليها
و كنت فاكراها بترشحهالي بالاستماته دي عشان احنا مصريين و مغتربين زي بعض و قلبها عليا هههههههههههههه غلبانه قوي يا خال
المهم بعد فتره جوزي ساب شغلو و إشتغل في توكيل أجهزه كهربائيه و بقى عارف نظام الشغل و المبيعات و التسويق و الدعايه و الكلام ده هو ده مش شغلو هو إداري بس بحكم تواجده في الشركه عرف ان الشركات بتتفق مع البياع على مبلغ معين لو باع عدد معين من السلعه دي و كل ما يبيع أكتر يكسب أكتر و حب يجرب بنفسه و راح محل أدوات كهربائيه كبير و أنا كنت معاه
و سأل البياع عن أحسن تلاجه قاله على ماركه معينه فجوزي سأله على الماركه اللي هو شغال في التوكيل بتاعها
قعد يشتم فيها و يقول عليها تلاجه وحشه و فيها و عليها و يمجد في الماركه اللي قال عليها في الأول
فلما شفتو و هو بيعمل كده افتكرت البياعه اللي كانت هتعيط جمبي عشان اشتري غساله معينه و قولتلو يبقى كانت قابضه قالي آه طبعا
قولتلو و احنا اللي كنا فاكرين قلبها علينا
فقالي الحمد لله إنها جت على كده و كانت بترشحلنا ماركه حلوه لان لو ماركه وحشه اللي كانت دفعالها كنا اتدبسنا
و اتعلمت من يومها إني مأثقش في البياع ابدا
اسأله بس عن المواصفات و الفرق في المنتجات و اسأل اللي أعرفهم و اللي ليهم تجارب و اتوكل على الله و اشتري و البياع ده مجرد شخص بسألو في المواصفات و الأسعار مش أكتر
و أتمنى ان موضوعي يبقى مفيد بالنسبالكو و يارب كلكو تشترو أجهزه كويسه و تبقو مبسوطين بيها يارب
و أتمنى اللي الموضوع يعجبها تقيمه عشان غيرها تشوفو و تستفيد زيها
و السلام ختام
بحب فتكات قوي بحب فتكات قوي 523629_2.gif سوبر فتكات Fatakat 523629 الزقازيق – مصر
سبحان الله و بحمده