مساء الفل عليكم فتاتيكي الحلوين ..
كالعادة لازم المواضيع الحلوة تيجي في دماغي وقت الامتحانات ــ هههههههههه
المخ بيشتغل كويس أوي بس في عكس الاتجاه المطلوب .
أختكم متجوزة من عشر شهور ، وفي حاجات كتير عايزة أقولها من تجربتي لكل عروسة تاخد بالها منها .
هناخد قسم قسم في البيت وأقولكم حاجات من واقع تجربتي ، لعل واحده فيكم تنتفع بيها .
أول حاجة :
غرفة النوم :
هنبدأ بحاجة حاجة :
_ الملابس :
بلاش تجيبي كميات كبيرة جدا من الانجيري ، أنا كنت بسمع النصيحة دي كتير وكنت بطنش لها بصراحة ،
وجبت كميات كتيرة جدا فوق المية ،
بس ايه اللي حصل ، في موديلات جديدة بتطلع وبتستحرمي تشتري جديد وانتي عندك كل ده ،
طلعا جسمك ممكن يتغير وفي نفس الوقت مقاسك كمان ، زوجك ممكن يكون ليه ذوق معين وعايزة تكتري منه مثلا .
فخدي بالك من النقطة دي .
يعني مثلا 30 واحد كويس .
البراهات لما تيجي تجيبي ، هاتي من ضمنهم مقاس أكبر درجة أو اتنين ، بلاش كله نفس مقاسك ،
عشان علميا البنت لما بتتجوز هرمونات الأنوثة عندها بتزيد ، وبالتالي المسائل بتكبر شويه ،
كمان لو حملتي في بداية الجواز شيء أساسي هتحتاجي مقاس أكبر .
البانتيهات دي بقى اللي لازم منها كتير اوووي ، بجد حاجة مهمة جدا ، وكتري في الاقطان .
في حاجات كتيرة أوي قطن وشيك جدا ، وهاتي برضو من الحاجات الشفتشي التانية .
لبس البيت بقى دلعي نفسك عشان هتلبسي الحاجات اللي ما كنتيش بتعرفي تلبسيها في بيت بابا :
بيجامات شورت ، وقمصان البيت الصغننة دي جميلة اوي وانتي قاعده لوحدك في البيت بتشتغلي وأنثوية أوي .
طبعا كلنا عارفين إن لااازم بالنهار وزوجك في البيت أو أول ما يرجع من الشغل تكوني لابسه لبس خروج ما ينفعش تخرجي بيه هههههههه ،
يعني جينزات وبضيهات وجيبات قصيرة والكلام ده .
يعني الانجيري لليل فقط ، والبيجامات والأقطان بتبقى الصبح ووقت الضهر ، واللبس ده آخر النهار .
أما لبس الخروج فيعتمد على نوعية لبسك ، لو منتقبة ، محجبة ، بتلبسي إسدال ـ تونيكات ـ والكلام ده .
وزي ما قلت لك شكل جسمك ممكن يتغير شويه ، راعي الموضوع ده ، ما تجيبيش كل هدومك على مقاسك بالزبط عشان ما تندميش بعدين .
امممم في حاجة ، ممكن تكون مهمة لحد فيكم .
التسريحة والكومود ، المودرن دلوقتي مش بيبقى بيتفرش عليه مفارش زي زمان ، بيخلي شكله مش حلو خالص .
بس جات معايا كده كنت جايبة مفرشين صغيرين أوي زي كده بس على صغير ،
وكانوا على بني نفس لون الأوضة ، حطيتهم على الكومود كان شكلهم جامد بجد ، وادوا روح جميلة خالص .
في حاجة تانية كمان فكرتوني ، عارفين الشمع ده ؟؟
كنت جايبة كام شمعة اللي في الكوباية دول وكانوا بنكهات على فراولة وفانيليا ،
حطيت واحده على الكومود ده وواحده على الكومود ده ، واااو بجد ، وانا نايمة آجي أتقلب ناحيتها أشم ريحة تحفة ،
وبتبقى جميلة بقى في الليالي النص كم ههههههه > شايفاكي يا بت وانتي بتضحكي ، لما تكبري أبقى أقولك
اممممم الشوزات ، خلي بالك تجيبي حاجة مريحة لو خرجتوا اتفسحتوا ولا رحتوا ملاهي مثلا ،
ما تركزيش بس على الحاجات اللي شكلها جميل واللي بكعب والكلام ده .
المفروشات بقى :
الفوط أنا جبت كميات كتيرة أوي ، وبصراحة مالهاش لازمة ، يعني ما تكتريش أوي ، أنا عندي مرصوص كتييير في الدولاب لسا جداد .
طبعا ما تنسيش البرنس ليكي والتاني ليه ، ولو حابه برنس تاني و شكير مثلا عشان لما تغسلي الأولاني .
الملايات برضو جميلة ، يعني لو كتير حتى مش مشكلة ، كل فترة بتطلعي واحده ، بتضيف روح جميلة أوي وبتجدد النفسية ،
بس أهم حاجة حاولي تعرفي لون الأوضة ولون الحيطان ، عشان أحيانا بتبقى في ملايات صعبة أوووووي مع بعض الألوان .
أنا سبت ملايات لماما قبل ما أتجوز عشان الموضوع ده .
أتوقع كده غرفة النوم خلاص .
في جزء مهم كمان ، لعنايتك الشخصية :
عايزة أقولك اختراع جهاز الشمع ده بجد هايل جداااااا واكتر من هايل
مش بياخد وقت خاااالص في العمايل .
يعني سريع جدا ، ونضيف خالص ، ومش مؤلم تقريبا .
السويت في المناطق إياها ، في البداية هتبقى العمايل صعبة ، بعدين هتتعودي والألم هيقل ، أهم حاجة وانتي بتعملي السويت تبقى صغننه خالص .
في ملحوظة رفيعة كده في النص
عشان خاطري اوعي تعملي زيي وتتلهي في الحياة الجديدة وتنسي جسمك ووزنك ،
لازم تراقبيه ، إن شالله حتى تنزلي تتمشي كل يوم نص ساعة ،
لأنل ما خدتش بالي من نفسي وزدت كتير بجد .
ندخل بقى على المطبخ .
أولا. ما تجيبيش كذا طقم حلل ، هيبقى أوفر أوي ، لو طقم استانلس وطقم تيفال يبقى تمام أوي ، عشان ما يبقاش زحمة عندك في المطبخ على الفاضي .
في بيقولوا الألمنيوم بيبقى فيه حلل كبيرة ودي ممكن أحتاجها لو هعمل بطة مثلا أو حاجة كبيرة ،
دي متهيألي ممكن تجيبي واحده فردانيه من المحل .
كوبايات العصير ( مش الكاسات ) دي أنا احتجت منها كتير ، زوجي بيحب يشرب سوايل كتير جدا ، فالكوبايات دي على طول لازم تبقى موجودة ، وطبعا من كتر الاستخدام هتلاقي بيتكسر منها .
كمان ما تفرحيش زيي بمواعينك ، وتحطي كتير في المطبقية ، بجد هتهلكي ، طبعا أول شهر مش مشكلة عشان اللي داخل واللي طالع ممكن تحتاجي مواعين كتير وكده ،
بس بعدين رتبي وحطي على أد استخدامك عشان ما تكوميش مواعين كتير عندك ، وتيجي انتي اللي تتعبي .
آه في كمان حاجة مهمة ، وانتي بتجهزي الخزين اللي بتحطيه في تلاجتك ،
في حاجة ماما عملتهالي وبصراحة ربنا يكرمها ربنا نفعني بيها جداااااااا ،
ماما عملت لي خلطة محشي اللي هي صلصة بس من غير رز يعني ، في اكياس وحطتهالي في الفريزر ،
فرمت لي توم كمان وحطتهولي في الفريزر ، وفراولة مجمدة عشان كنا في الصيف كانت شيلاهالي ومشمش والكلام ده .
بجد كنت كل ما أطلع حاجة أدعي لها ، لييييه ؟
أنا اتجوزت قبل رمضان كده بكام يوم ، طبعا فضلت ييجي شهر كده مش بطبخ ماما مدلعاني بقى ربنا يخليهالي ههههههه والتلاجة كانت بايظة فمش عارفه أطبخ وقضينا الباقي دليفري ،
المهم في يوم كده في رمضان ، وأنا لسا عروسة بقى ومدلعة نفسي ، والتلاجة كانت اتصلحت على فكرة ،
لقيت حماتي عدت عليا من شغلها كانت جايبة حاجات لزوجي ،
طبعا كان لازم اييييييه ؟ نمسك فيها في الفطار .
وكان ساعتها العصر وانا عامله حسابي إني هجيب دليفري بقى هههههههه
دخّلت حماتي الأوضة تنام لها شويه لحد الفطار ، ودخلت أنا بقى سريع على المطبخ ،
في واحده بتيجي بخضار تحت العمارة ، طلبتها وجابت لي كوسة وبتنجان ،
وطلعت خلطة ماما على السريع ـ وورق عنب كمان ،
وعملت أجمل محشي ، وفراخ في الفرن .
وصحيت حماتي بقى عشان الفطار ،
لقت المحشي على السفرة ازبهلت ههههههههههه
وفرحت أوي بمرات ابنها اللهلوية . طبعا ما تعرفش اللي فيها .
رغيت كتير أنا عارفه ، بس حبيت أقولكم تجربة استفدت منها .
آه آخر حاجة بقى قبل ما أنسى ، أنا جبت تلاجة ال جي .
عايزة أقولكم صيانتهم وخدمة عملائهم أسوأ حاجة في الكون بجد .
المشكلة كنت مسافرة ، وما عرفتش أفتح تلاجتي أشوفها غير لما جينا نفرش ،
لما جينا نفرش نكتشف إنها مش شغالة أن أن أأأأن
كان الموتور بتاعها بايظ ولازم يتغير ،
وغيروه بعدين فعلا .
طاب والعمل ؟
نكلمهم يقولوا ما ينفعش نرجعها عشن عدى 14 يوم ،
هنبعت لكم صيانة ، طاب ابعتوا أرجوكم ، مفيييييييش
ده كان أسبوع من قبل الفرح ، وقعدت أسبوعين بعد الفرح من غير تلاجة ،
وكل يوم حد من العيلة يتصل بيهم يهزقهم ، ونتصل على حماية المستهلك وحاجات عجيبة كده ،
لغاية ما طلعت روحنا وكنا في عز الصبف ، ومن يوم الصباحية كل ما ماما تجيب لي أكل يبوظ من الحر ،
مع اني كنت بحطه في المكيف .
المهم مش عايزة أدعي عليهم ، بس عايزة أنبه عليكم ، لازم تفتحوا وتجربوا أجهزتكم الكهربائية أول ما تشتروهم ، وياريت لو يبقى عند الراجل كمان قبل ما تاخدوهم .
في بنات اتخضوا لما قلت على التلاجة
بس أنا عايزة أقول ، أهم حاجة تستخيري قبل ما تنزلي تستشيري ،
والنوع ده ناس كتيرة مدحت فيه ،
أنا بتكلم على صيانتهم وتعاملهم ، وعشان توفري عليكي المشوار جربي الحاجة قبل 14 يوم من تاريخ شراءها
محدش يقلق ويتوتر ، كل حاجة بتبقى نصيب
وممكن نجيب أحسن وأغلى حاجة ويطلع فيها لا قدر الله عيب ، كله قدر من عند ربنا ،
وكل اللي يقدره ربنا خير ، محدش يشيل هم حاجة ـ واتوكلوا على الله .
معلش افتكرت حاجة كمان .
عارفين مبرد الميه ده يا يا جماعة ؟
بجد بجد اختراع هاااااااااايل
والله حاجة جميلة بجد ، بيغنيكي عن وجع قلب الأزايز وفتح التلاجة كل شويه ، وللا الكولمن والتلج .
وغير الازايز البلاستيك غلط إنها تتملي وتستخدم أكتر من مرة .
البتاع ده بتمليه وبيقعد معاكي فترة طويلة وتاخدي منه المياه الساقعه براحتك ،
يعني ربنا نجدني بيه لما التلاجة ما كانتش شغالة بجد .
وأسعاره بدأت تنزل خالص متهيألي بتبدأ من 500 وممكن أقل كمان .
كمان معظم البنات دلوقتي بتجيب ميكرويف ،
معلومة كده على السريع ، ما تنسيش إن الميكرويف فيه خاصية إذابة المتجمد defrost
بجد مفييييييييدة جداااااا ،
لما تجي لك عزومة فجأة ، أو نسيتي تطلعي الحاجة من الفريرز بالليل .
بيفك الحاجة في ساعتها ، وربنا نفعني بيه كتيييييير جدا في عزومات مفاجئة وحاجات كده .
في حاجة مهمة جداااااا كنت هنساها
طبعا قبل الفرح ووقت التحهيزات ، أعصابك انتي وخطيبك وأهلكم كمان بتبقى مش متحملة
عيزاكي تقربي من ربنا وتكثري من ذكره ، عشان ينزل على قلبك السكينة
وحاولي أد ما تقدري ما تشديش مع خطيبك خاااااالص في الوقت ده ،
وتتحملي شويه وما تقفيش قصاده لو هو اتعصب ، عشان هو كمان اعصابه بتبقى مشدودة وتعبانه خالص .
وادعي ربنا يتمم لكم على خير .
وحاولي تبقي عاقلة وما تقفيش على الواحده سواء في تجهيزات الشقة أو الفرح، او جهازك انتي ، أو أي حاجة بتحصل حواليكي ،
عشان الدنيا ما تتعقدش ،
ولو في مشاكل لا قدر الله على القايمة أو غيره ، بلااااااش تتدخلي ، خليها بين الرجاله ، وحاولي تلطفي بس الجو وادعي ربنا كتييييييير ، هو حبيبنا واللي بيقف جنبنا والله ، وهتلاقي كل حاجة عدت على خير إن شاء الله .
وفي مواضيع كنت كتباها قبل كده عن تجربتي مع الكوافير ، ومعاملتك لخطيبك ،
يارب تفيدكم .
طبعا طولت كتييييييير جدا ، بس كان نفسي أقول الحاجات دي من زمان ،
وربنا يتمم لكل عروسة بخير ويسعد قلبها ويهنيها يارب .
التقييم انتي وذوقك طبعا هههههههه >> فيس بريء اوي وغلبان
وادعوا لي أعدي المشروع ده بتقدير كويس .
فتّكم بعافية
على فكرة أنا بشوف بنات بتفضل تقول لي ممتاز ، وبتنسى تقيم وهي خارجة .
ده كسل ده يااخواتي وللا ايه ؟؟
لحظة فرح ! لحظة فرح ! 227532_4.gif فتكات رائعة Fatakat 227532 في قلوب أحبابي – بعيد