بسم الله الرحمن الرحيم اللهم صلى على محمد وعلى ال محمد كما صليت على ابراهيم وال ابراهيم وبارك على محمد وال محمد كما باركت على ابراهيم وال ابراهيم
رمضــــــــــــــــــــــــــــــــــان كريم اخباركم ايه فى ربنا يارب تكون الهمه عاليه ويكون رمضان السنه دى نقطه تحول فى حياتنا كلنا للاحسن يارب ندخل فى الموضوع بقى كنت من يومين نزلت اشتريت شويه مفروشات كده لجهازى عقبال ما استخدمهم يارب قولو امــــــــــــــــــــــــــــــين قولت انزلكم طريقه التخزين احسن انا يا اوختشى منك ليها بقالى اربع سنين مخطوبه وكل فتره اشترى حاجه وطبعا بخزنها فى دهاليز البيت وعلشان اضمن انها مش يحصلها حاجه عملت ايه بقى فى كذا طريقه اولا تجيبى مكعبات المسك ريحتها تحفه بس عيبها بقى انها فيها زيوت لو مش لفتيها كويس بتبقع على الحاجه ولو سبتى مكعب ولا اتنين بره فى الهوا ريحته بتروح ثانيا والطريقه دى انا بموت فيها وبستخدمها كتير فى اللبس بالذات اللى هى ايه البخووووووووووووووووووووووووور اه والله البخور بيخلى ريحه الهدوم كأنك مبخراها كلها بحس ان ريحتها المدينه المنوره كده بحب ريحه العود اوى والعطور الشرقيه المهم بجيب باكو البخور ده بحوالى 3 جنيه ونص واحطلى اتنين كده وسط الهدوم بفتح الشنطه تهل عليا ريحه حلوه اوى بتملى الاوضه والله ده البخور اللى بستخدمه بجيبه من فتح الله
الطريقه الثالثه ودى بستخدمها فى المفروشات والبطاطين كده اللى هى دى بجيب صابون وابشره فى المبشره صابونه واحده ريحتها حلو واجيب شاش او اى قماش مسامه واسعه شويه ممكت تل او اورجانزا اختيارات كتير اهو علشان الكسل واقص الشاش مستطيلات واتنين المستطيل على اتنين بقى مربع واخد حبه صابون مبشور بالمعلقه واحه فى الشاش واقفله واربطه بشريطه ستان علشان يبقى شكله حلو كده لما اطلعه من الحاجه معندكيش ستان متشتريش اتصرفى باى حاجه فى البيت ولو عندك اكياس اورجانزا بتاعت السبوع ممكن تحطى فيها
الشويه المشورين دول مش نص الصابونه ده انا واخده منها قبل كده كتير
ده الشاش اللى قطعته و الشرايط اللى هربطهم بيها
ودى صوره الشويه اللى عملتهم
الطريقه الرابعه والاخيره وللامانه انا مجربتهاش بس ناويه اجربها وهى انك تشترى زيت عطرى خام وتحطيه منه كام نقطه على قطنه وتغلفيها كويس علشان مش يبقع على الحاجه انا كده خلصت ويارب الموضوع يكون عجيكم وتستفيدو بيه وان شاء الله هنوزل شويه نصايح للتخزين عموما والشرا والكلام ده بقالى اربع سنين بجهز بقيت خبور يادبور مش محتاجه غير دعوه حلوه منكم بالعتق من النار ورضا ربنا وربنا يفرح ماما وبابا بيا كل سنه وانتم طيبين
مشاركه هامه
سمسمة الفنانة سمسمة الفنانة 166446_9.gif فتكات رائعة Fatakat 166446 الاسكندرية – مصر