أزيكم يارب تكونوا بألف خير
حابه أقول حاجه بسيطه بخصوص الحلل السيراميك اللى مجننه بنات مصر
أولاً
: الحلل اللى موجوده هنا فى مصر مش سيراميك صافى فبالتالى مش هتتكسر لأنها واخده كام طبقه سيراميك من فوق مش أكتر
ثانياً: فيه أنواع كتير منه وأسعاره فى العالى وفى القليل الفكره كلها انى زيكوا بفكر كتير بخصوص الماركه اللى هشتريها عشان انا عايزه اشترى حاجه نظيفه وتعيش معايا وكمان تكون فلوسها نوعاً ما لطيفه دورت كتير والحمد لله انا روحت محلات كتير عشان اعرف اخد قرار وبقى عندى نظره فى المحلات الغاليه والرخيصة من كتر اللف
الخلاصة أن النوع الكورى نيوفلام دا هايل عشان تقيل وفالز وكوركماز التركى هايلين أسعارهم جميله ف المتناول وبدرينى ايطالى بس الفمكله ان التقفيل صينى اياً كان الماركه كلهم كويسين باختلاف ان فى نوع اتقل من التانى ونوع اغلى من التانى ودا طبيعى .
عادى لو السراميك قشر مافيش مشكله مش هيضرك ف الأكل لأن الطبقه اللى تحتيه المونيوم مش زى التيفال بيضر
سواء جبتى تركى او كورى او صينى او سنغافورى مش قضيه زى ما انا قلتلك ان الاختلاف ف السعر ف التقل ف الشكل يعنى دلوقتى نيوفلام نزلت نوع جديد من السيراميك اللى من جوه لونه كريمى ومحل تيوليب بيبيعه لأنه واخد توكيله هنا ف مصر
المهم متقلقوش وتفكروا كتير شوفى اللى ع قد امكانياتك وجبيه مادام مقتنعه بيه وبكره لما هتستخدمى هتعرفى اكتر وربنا يوفقوا يا بنات
انا عن نفسى ان شاء الله هشترى الفالز سعره بالنسبالى كويس وشكله لطيف اينعم فى احلى منه بس معنديش مشكله عشان مقتنعه بيه ..
وفى حاجه عايزه اقولها فى محلات كبيرة بتبيع الأنواع دى أغلى من السوق العادى خليكى شاطره ولفى كتير عشان تعرفى متوسط الأسعار وتشترى انتى اولى بكل قرش )
يومكوا بيضحك
rohab rohab 1121567_1.gif فتكات جديدة Fatakat 1121567 القاهره – مصر