فتوكاتى كنت عملت قبل كده موضوع عن صيدلية البيت وده لينك الجزء الاول
https://fatakat.univanet.com/#4675451
ياريت تفتحوا تقروه قبل ما تكملوا هنا
لان هنا تكملة على الكلام اللى فيه
اللينك ده هكمل فيه ان شاء الله وهزود شوية شرح للادويه اللى فى الجزء الاول
ملحوظه قبل ما ابدأ :
مش كل الادويه دى هتنطبق على الناس فالاحسن برضه تسألى دكتور او صيدلى فى الموضوع وتشوفى اللى يمشى معاكى
1- حقن كاتفلام : للالم الشديد (فقط) مش فى اى حاجه تتاخد لانها حقن مسكنه قويه جدا
يعنى مثلا لو واحده بتجيلها البيريود جامده اوى ومش بتستحمل وجعها يبقى تاخدها اول يوم بس ومره واحده مش حلوانه فى سلوانه وستوب على كده تبقى مره واحده فى الشهر كفايه اوى او مرتين اقصى حاجه
2- حقن ديبوفيت جميله جدا ومش مضره بس منكترش منها يعنى حقنه كل اسبوع ولا حاجه
دى للى شعرها بيسقط وعايزه حاجه تلحقه بسرعه هتعمل معاها مفعول باذن الله لان فيها فيتامين ب
وكمان هى حقن مقويه للجسم كله لو حاسه انك تعبانه ومش قادره تعملى حاجه الحقنه دى هتفوقك علطول
3- ملين نصار للامساك .. خدوا بالكم ده ملين قوى جدا وواحده منه كفايه اوى هو بيشتغل بعد ما تاخديه بساعتين مثلا ولا حاجه فـ مش عشان لقيتيه معملش حاجه علطول تقومى واخده واحده تانيه اوعى حبتين نصار دول يعنى دمار
ولو تعرفى نوع ملين تانى او متعوده عليه خديه عادى مفيش مشكله بس بقولكم على اللى مفعوله اكيد باذن الله
وفى حاجات تانيه طبيعيه مفعولها اكيد باذن الله زى الطماطم بس بشرط .. تاكليها صحيحه من غير ما تقطعيها سلطه يعنى يادوب تقطعيها 4 اربع وتاكلى علطول (وطبعا تشيلى البذر)
وممكن برضه كباية لبن حلوه وبتمشى البطن بس هتستنى شويه ممكن لتانى يوم
4 – بيتادين للغسيل المهبلى فى بنات قالوا انه مش حلو وان ديتول احسن
فـ هنستعمل معقم ديتول للعنايه الشخصيه ده غسول للمناطق الحساسه
– طريقة الاستعمال : هتملى البانيو مياه دافيه لحد نصه كده وتحطى غطاء ونص ديتول وتقعدى فيهم
وتكررى الموضوع ده 3 او 4 ايام عشان الجرح يلتئم وميبقاش فيه اى ميكروبات لا قدر الله
– ملحوظه : تقدرى كمان تستعمليه قبل الجواز عادى كمطهر تتشطفى بيه
دى صورته
5- بعد ما تطهرى بديتول هتنشفى المنطقه كويس اوى وتحطى كريم بيبى جونسون او اى كريم مرطب بتحبيه
6- كريم فيوسيدين مضاد للحروق لا قدر الله لو انتى بتطبخى واتحرقتى من الفرن
تجرررررررى علطول تحطى ميه ساقعه مكان الحرق وبعدين تلج وبعدين تدهنى فيوسيدين
بيهدى مكان الحرق
– ولو الحرق جامد اوى هتعملى الخطوات دى وتنزلى على اقرب مستشفى ليكى يحطولك حاجه للحرق ده عشان ميعلمش فى ايدك بعد الشر
– فيوسيدين كمان مضاد للالتهابات لو عامله سويت او مكنه وخايفه يطلع حبوب هتدهنى المنطقه بـ فيوسيدين او فيوسيدرم
6- كيناكومب لحبوب الوش او الضهر مطرح برضه ما بتشيلى الشعر
دول اللى فى اللينك القديم .. هنزود عليهم بقى :
1- كريم (بروكتو جليفينول) ده كريم للبواسير ومش معنى كده انك تكونى لا قدر الله عندك بواسير
لا يا قمر ده مطرح الامساك لو كان جامد ممكن تتعورى لا قدر الله فالكريم ده هتدهنى بيه (فتحة الشرج) هيخفف الجرح باذن الله
الطريقه : الكريم ليه بوز بلاستيك رفيع بيتركب فيه هتطلعى الكريم وتحطى البوز فى فتحة الشرج وتدخلى الكريم جواكى عشان الجرح يتعالج من جوه
متدهنيش المنطقه من بره كده الجرح مش هيخف
ومعلش انا بشرح بالتفاصيل بس عشان تعرفوا تستعلموه صح والله مش اكتر
دى صورته عشان تعرفوا شكله
انا دورت على صور ليه ملقتش فـ صورته بالموبايل .. ودى صورته بالبوز اللاستيك بعد ما اتركب فيه
2- كريم (ميبو) للحروق برضه ونفس الخطوات اللى فوق
ميه وبعدين تلج وبعدين تدهنى بالكريم .. ولو حرق جامد تنزلى المستشفى
3- جل K – Y من جونسون ده تخلى جوزك يحط منه فى اول الجواز يحط منه عشان يسهل العمليه شويه وتحسي بأخف ألم ممكن لانه كمان فيه جزء مخدر وسامحونى انا مضطره اشرح علشان بنات كتير اوى بتسأل فى الموضوع ده
(ملحوظه : ده للاستعمال الخارجى فقط) هو مش انا عارفه يعنى ايه بس يمكن انتوا تعرفوا
دى صورته عشان اللى بيتلخبطوا فيه
4 – برشام (سيتافين) للسخونيه لا قدر الله لو فى اى حاجه بتاخدى حبايه علطول هيخليكى تعرقى وتقومى تانى يوم زى الفل باذن الله
ملحوظه مهمه اوى : السخونيه والاسهال متسكتيش عليهم تاخدى علطول حاجات ولو لا قدر الله مفيش مفعول تنزلى تجرى تشوفى دكتور الاتنين دول بالذات مشكله ولو سبتيهم هيحصل مضاعفات مش كويسه لا قدر الله
على فكره انا مامتى صيدلانيه عشان كده عارفه الحاجات دى وحبيت افيدكم بيها يا قمرات
وان شاء الله محتاجيش اى حاجه من الكلام ده بس للاحتياط مش اكتر
ويستحسن لو كان مكان الصيدليه دى فى التواليت فى مكان عالى فوق الحوض مثلا عشان معظم الحاجات دى هتحتاجي تستعمليها فى التواليت
ولو مش هينفع تخصصى ليها مكان هاتى اى كرتونة شيبسى فاضيه وحطيهم فيها بس لو عندك اطفال خبيها تحت السرير
يلا قولوا ورايا يا فتوكات
اللهم صلِ وسلم وبارك على سيدنا ونبينا محمد وعلى آله وصحبه اجمعين (ثلاث)
يارب اكرمها وسهلها امرها واجمعها بخطيبها على خير عاجلا وليس اجلا
وارزقها من حيث لا تحتسب وبارك لها فى صحة والدتها
وصلَ الله على سيدنا محمد وعلى آله وصحبه وسلم
الموضوع من مجهودى وغير منقول ولا احلل نقله لاى مكان
وامانه عليكم التقييم انا طلعت عينى فى تصغير الصور عشان كل الفتوكات تستفاد
فى رعاية الله
اجمل احساس فى الكون اجمل احساس فى الكون فتكات متميزة Fatakat 1005144 الاسكندرية – مصر