بسم الله الرحمن الرحيم
ان شاء الله يا بنات هنا حنكتب يوميات الفريق الاحمر
حنبتدى بالموضوع الاول
الموضوع متجمع اهو يا فتوكات
عشان مانتوهش من بعض
و نبدأ مع بعض
من هنا
السلام عليكم يافتوكات يا عسلات
انا عامله دايت بقالى شهرين ونزلت ٢٦ كيلو ولسه فاضلى ١٥ وبدات امل وعجبتنى فكره الجروبات اللى هنا فى المدونة عشان التشجيع بس كل مافكر اشترك فى جروب الاقى نظامى انا اسهل وجاب نتيجه معايا مكنتش احلم بيها فقررت اعمل جروب ليا اقول فيه على نظامى واجمع معايا جروب نبدا مع بعض انا هدخل فى الموضوع واللى يعجبها تشترك معايا
الموضوع كله انى قعدت فتره اقرا كتييير عن ميكانيكيه تكوين الدهون فى الجسم وميكانيكيه تفكيكها وتحويلها لطاقه وفهمت كويس ازاى الجسم بيقوم بالعمليتين دول وجمعت معلومات رائعه عن كل المواد اللى بتسهل حدوثها وايه الاطعمه اللى بتحتوى على هذه المواد وبدات ادخل الاطعمه دى فى اكلى واحده واحده لحد مبدات الاحظ انى فعلا بخس اسرع بكتييييييييييير من زمان يعنى فعلا معدل الحرق فى جسمى بقى اسرع بكتير على فكره انا مهندسه كيميائيه واتمنى ميكونش ده ماثر على كلامى وتزهئو منى
هبدأ الاول بنظام الاكل وبعدين نشوف الرياضه
انا هعرفكو كل الاكلات وازاى انا دخلتها فى وجباتى وكل واحده تضيفهم زى ماتحب
اولا كل محفزات الايض (معدل حرق الدهون)
الليمون
الكيوى
الشمر
قشر القهوه
حصا البان
مريميه
الجنزبيل المطحون والطازه
البروتينات
الشاى الاخضر
الشطه والاكل الحار
الماء يسرع الايض وقلته تشعرك بالهبوط والحاجه الى السكريات
القرفه تساعد على تاييض السكريات وتضاعف معدل حرق الجسم للسكر ٢٠ضعف
بعد كده اقوى كوابح الشهيه(لسد النفس يعنى)
الجريب فروت
الشمر+الجوارانا وفعلا قفلت نفسى جدا ودى شبه معجزه
اليانسون
الزعتر وكمان مدر للبول وبيقوى الذاكره
بذره الرجله وبذره الكتان
نبات الكولا
بعد كده مكافحات تكوين النسيج الشحمى
الفلفل الحلو بالاخص الاحمر يحتوى على فيتامين سى واى وهما مضادات لتكوين النسيج الشحمى
الرمان له فعاليه قصوى فى حرق الدهون المعقده(يعنى اللى بقالها سنين طويله فى الجسم)
خل التفاح يساعد بقوه على اذابه الدهون
البقدونس يقاوم تراكم الدهون
الكرفس شرحو
الطماطم تدر البول وتكافح السلولايت والالياف اللى فيها تمتص الدهون فى الامعاء وتطردها خارج الجسم كفضلات
اللبن والزبادى خاليين الدسم يمنع انتاج الكوليسترول الضار
ميرسى لكل اللى رد على موضوعى لان ده اول موضوع ليا وياريت اللى هيشتركو معايا يكون عندهم عزيمه ويفضلو مكملين انا هكتب باقى الموضوع وبعدين نعمل جدول كل واحده تكتب فيه كل العوامل المساعده اللى فى الموضوع من اكلات لتمارين لكورسيهات وكل يوم تعلمى فى الجدول على الحاجات اللى اتعملت وفى الاخر اليوم تشوفى لو جبتى النص حتى يبقى فل وفى اخر الاسبوع هتلاقى نتيجه بجد رائعه وهتشوفو انا فى ايام مكنتش حتى بجيب النص بس فى ايام كنت بركز واجيبهم كلهم طبعا فى العيد عكيت تماما بس هكمل ونساعد بعض ان شاء الله
لو عايزه كلام علمى بحت ممكن اقولك على اليه تنفيذ كل عنصر فى الاكلات دى لمهمتو فى تفكيك الدهون او مهمتو فى نقل الدهون من الخلايا الدهنيه الى الدم لاستخدامها فى تكوين الجلوكوز لانتاج الطاقه عشان احنا نتحرك وكيفيه تسريع هذه الدوره فى الجسم بس الناس اللى هنا هيطفشو من الموضوع وانا عايزه حد يكمل معايا
بوصي ياقمر الجوارانا دي من عند العطار هي والشمر وبذره الكتان واغلب الحاجات دي في اي عطاره
ومثال لطريقه اضافتهم للاكل مع انى لسه هوضحلكم بالتفصيل ازاى ممكن اخدهم كلهم فى يوم واحد بس مثلا القرفه انتى سالتى عنها بحط منها ربع معلقه على كوبايه لبن خالى الدسم واشربها بين الوجبات لما بتطلب نطافس حبه وبتخلى طعمه حلو جدا ويوميا بضيفها مع البروتين ايا كان اللى هعمله فراخ او لحمه هى والجنزبيل والفلفل الاسود وكل اهل جوزى بيتهبلو على اكلى وبيقولو عليا زى شيفات المطاعم اكلى له طعم خاص
بوصو ياقمرات بالبلدى كده انا عرفت الاكل اللى داخل جسمى سكته ماشيه ازاى لحد مايبقى دهون ووقفنالو ناس فى السكه اللى هى مكافحات تكون الدهون وعرفت سكه الدهون اللى خارجه من الجسم لحد متطلع فى صوره طاقه ووسعنالها السكه بالحاجات اللى بتعلى الحرق فل كده
وكمان عرفنا ايه الحاجات اللى فى جسمنا بتخلينا نفكر اننا جعانين وهنديها لجسمنا فمش هنعوزناكل الا لو فعلا الجسم عايز ده ودول بقى اللى سميناهم بيسدو الشهيه
نرجع بقى للنظام بتاعى بس الاول كل اللى هتشترك معانا تحط بياناتها والهدف اللى عايزه توصلو وباذن الله هنوصل وهتشوفو ازاى الكيلوهات اللى كانت ماسكه فينا باديها واسنانها والكيلو من دول مكنش يطلع الا بطلوع الروح هيبقى سهل نزولو وهيكورو ورا بعض من غير شقى
انا هبدا طولى ١٨٠ وزنى كان ١١٥ده اول ماولدت دلوقتى انا ٨٩
الهدف الاول ٨٠
التانى يا معين يارب ٧٥
عشان ارجع زى يوم جوازى
لا طبعا يا حبيبتى اتفضلى واى حد عندو معلومه يقولها عشان كلنا نستفيد من بعض بس انا كنت كتبت فوق انو لسه فى كورسيهات وكنت هتكلم عن موضوع التخسيس الموضعى ده بالتفاصيل بس انتو مصبرتوش طبعا ربنا يكرمك ردك رائع ومفيد بس انا بعملو بطريقه اظرف حبه انا بستخدم فعلا زيوت من دى وهى ممتازه بس بحطها ازاى بقى
بجيب الزيوت وادلكها كويس على عندى انا الكروش طبعا والف الورق النايلون اللى بيغلفو بيه الجبن واللانشون ده وبعدين البس الكورسيه واخليه طول اليوم عادى جدا ولبسى من فوق فى منتهى الشياكه وجوزى ميعرفش البلاوى اللى جوه
طبعا هتسالو عن الكورسيه ونوعو
اقولك ياستى انا جبت كورسيه بتاع كارينا عشان البسو تحت لبس الخروج فعجبنى جدا ولا مبين بطن وانتى قاعده ولا كسر فى الضهر مكان البرا وبيلم جامد قلت اجيب واحد كمان للبيت فجبت نوع تقليد اسمو روتانا عشان ارخص طلع احلى من كارينا ووسطو وبطنى بقو ولا هند رستم من كتر الزيوت دى مع ضغط الكورسيه ونكمل بكره بس يا ريت اصحى الاقى ناس كتير سجلو بياناتهم عشان نبدا مع بعض
يلا نكمل يابنانيت واعذرونى على التاخير بس عندى كوكى مطلع عينى
نيجى بقى للجزء بتاع الرياضه الاول هنصلح حبه مفاهيم عند الناس اولا قصه الجسم اللى مش بيبدا يحرق دهون غير بعد نص ساعه من التمارين ده كلام يضحك وملوش اى اساس علمى الجسم بيحرق سعرات حتى لو معملناش اى مجهود ازاى بقى
اقولكو ازاى السعر هو الطاقه اللازمه لرفع درجه حراره الماء درجه واحده مئويه واحنا جسمنا بيتكون من ٧٠٪ ماء ودرجه حراره الجسم لازم تكون ٣٧ وطبعا درجه حراره الجو اقل مننا فالجسم بيعوز سعرات عشان يحافظ على درجه حرارته وبيعوز سعرات عشان القلب يدق والرئه تتنفس يعنى حتى واحنا نايمين بنحرق سعرات يبقى دلوقتى مفيش حاج اسمها لازم نلعب نص ساعه احنا نلعب كل مانقدر وعلى قد مانقدر انشالله نلعب عشر دقايق بس ده انا بقولو عشان الاوزان الكبيره اوى واللى عمرها ملعبت رياضه مينفعش تبدا جامد عشان ميتعبوش ويزهئو ويبطلو لعب خالص انما الاوزان المعقوله هنبدا اول يوم ٢٠دقيقه وكل يوم نزود حبه لحد مانوصل لساعه وارجع افكركو مفيش حاجه اجبارى كل واحده تعمل قد ماتقدر ممكن تعمل على مرتين فى اليوم المهم نشاطنا يزيد
بعد كده نيجى لانواع الرياضه نوعين رياضه الهدف منها التخسيس عامه ورياضه لشد مناطق معينه من الجسم ولبناء كتله عضليه انا هذكر امثله لكل نوع وكل واحده تعمل اللى تشوف انو اهم بالنسبه ليها المهم هتعمل اد ايه الاول تمارين التخسيس وهى اى حركات بتسخن الجسم وتخلينا نعرق لوعندنا مشايه يبقى خير لو فى اوربتراك بردو رائع لانو بيخسس وبيشد الجسم بردو وده اللى عندى لو مفيش اى اجهزه ممكن نرقص بجد ده ملوش حل رقص ١٠دقايق بمشى نص ساعه وجربو وادعولى اقفلى على نفسك الاوضه وحطى سماعات الموبايل فى ودانك او شغلى على الكمبيوتر حبه اغانى واقعدى اتنططى ومش هتحسى بالوقت ولو على مشايه او اوربتراك ياريت يكونو قدام التليفزيون عشان متحسيش بالوقت
بعد كده نيجى لتمارين شد مناطق معينه
انا بالنسبه ليا اهم حاجه البطن لانى ولدت قيصرى من اربع شهور بس الحمد لله خلاص بطنى بقت زى مكنت بنوته بس لسه مكمله
انا هوصفلكو تمارين البطن انهارده لانى داخله من الموبايل وبكره هنزلكو صور متحركه لكل التمارين المهمه لشد البطن والوسط والهانش والارداف
اهم تمارين للبطن ٣ حاجات
الاول شفط البطن قد مانقدر واحنا بنطبخ وقبل ماننام واحنا على السرير واحنا بنغسل المواعين كل مانفتكر وده طبعا بيقوى العضله الرئيسيه فى البطن
تانى تمرين اننا ننام على الارض على ضهرنا ونرفع رجلينا ونعمل بدال يعنى نحرك رجلينا كاننا راكبين عجله وبردو نعمل قد ما نقدر بس كل يومين نزود شويه
التالت بردو ننام على الضهر ونرفع رجلينا مع بعضهم زاويه ٤٥ ونثبتها ثوانى وننزلها وهكذا ده ملوش حل فى شد البطن وهتلاحظو نتيجتو من اول اسبوع
طبعا اكيد قريتو عن لبس الكورسيه على الزيوت المنحفه اللى كتبتها فى رد سابق سامحونى كان نفسى اخلى الموضوع مجمع كلو ورا بعضو بس ما شاء الله دخل ناس كتيره اشتركو والردود كترت فالموضوع ضاع من بعضو
دلوقتى بقى انتو فهمتو عامه الموضوع ماشى ازاى انا بقى هكتبلكم نظامى اللى انا ماشيه عليه وهقول ايه اللى فيه اجبارى والباقى كل واحده ومزاجها وطاقتها وطبعا اهلاااااااااا بكل اللى عايزين يشتركو انشالله ١٠٠ واهلاااااا كبيررررررره موووووووووووت بسوزى روح قلبى اختى الصغنونه بس هى فى السعوديه ووحشتنى موت ويارب تسمع الكلام المره دى وتكمل معايا وتخس وترجع قمرايه زى لما كانت بنوته
النظام اول حاجه هنعمل جدول فى صفحه كبيره بعرض الصفحه من هنقسمه بالطول ٣٥ عمود اول عمود نكتب عليه التاريخ وتانى واحد الوزن تالت واحد مقاس الوسط وده هناخده بمازوره وبعد كده عندنا ٢٥ عمود هنكتب فيهم كل الاطعمه اللى ذكرتها فى اول صفحه وبعدين السبع عمدان اللى فاضلين للتمارين اللى هنزلهلكو بكره هنكتب على عمود بطن واللى بعده وسط واللى بعده ارداف وبعده هانش وبعده ضهر وبعده صدر واخر واحد لتمارين التخسيس العامه اللى قلناها قبل كده الرقص او المشايه او الاوربتراك وكل يوم نكتب التاريخ فى اول خانه ونعلم علامه صح تحت كل حاجه عملناها اليوم ده وفى الاخر اليوم لازم على الاقل نكون جبنا نصهم وطبعا فى خانات اجبارى كل يوم زى اخر خانه بتاعه تمارين التخسيس العامه وخانه خل التفاح وخانه المياه وهحددلكو باقى الخانات الاجبارى والوزن ناخدو كل كام يوم وهتشوفو بنفسوكو كل ماهتزودو علامات الصح فى الجدول كل مالوزن هينزل معاكو اسرع والجدول كمان هنزلهولكو بكره عشان اللى مفهمش يعملو ازاى وهنبدا من بكره بعد الانتخابات متخلص فل
بصى يا جميل انا لسه هوضح كل حاجه بالتفصيل بس عموما الشمر والجوارانا بنجبهم من العطار وليهم طريقتين انا ساعات بحطهم على الزبادى وساعات بحطهم فى السلطه وساعات برشهم على التورلى اللى بعملو فى الفرن المهم انى مبقاش حاسه اوى بطعمهم ولسه هقولكم على افكار كتير نضيف بيها الحاجات دى فى اكلنا بحيث نقدر نوصل اننا ممكن ناخدهم كلهم فى يوم واحد ومنتخنقش من اكل الريجيم
بصي ياجميلانا مش برضع طبيعى اصلا بس اغلب الاطعمه دى امنه جدا للمرضعات والحوامل وكمان مفيدين جدا وكلهم فيتامينات واغلبهم مضادات اكسده و بكره لما انزل الجدول هعلم على كل الحاجات الامنه للحوامل والمرضعات وكل شويه هكتبلكم فوايد كل حاجه فيهم لان فيهم حاجات بتقلل الكوليسترول وحاجات للسكر وحاجات مضاده لانتشار الخلايا السرطانيه وياريت نفضل نستخدمها فى اكلنا طول العمر وتبقى من عاداتنا الغذائيه عشان صحتنا تفضل كويسه
بوصى يا قمر موضوع الوقت ده فى ايدك نزلى الجدول وكل ماهتزودى علامات الصح فى الجدول كل ماهتسرعى نزول الكيلوهات وبالنسبه للبطن انا هقولك بالضبط انا عملت فيها ايه ومش ممكن هتكون بطنك قد بطن واحده لسه والده قيصرى اولا التمارين اللى قلت عليها للبطن وكمان كنت بعملها يوم ويوم وساعات مرتين فى الاسبوع بس اللى كنت مواظبه عليه هو موضوع لبس الكورسيه ده وهشرحو تانى كنت بحدهن زين الجنزبيل وزيت الشطه والف بطنى بالورق النايلون اللى بيلفو بيه الاكل والبس الكورسيه بتاع كارينا فوقهم واعيش يومى عادى جدا جدا والبس هدومى ومحدش بيعرف اللى انا عملاه تحت الهدوم وطبعا دى حاجه مش محتاجه مجهود خالص ولا بتتعب اصلا وفى حزام للبطن حلو ب١٥ جنيه فى التوحيد والنور ممكن بردو تلبسيه على الكيس بدل الكورسيه وطبعا مع نظام الريجيم بتاعنا والرياضه هتلاقى اكتر حاجه بتخس فيكى هى البطن بسبب الزيوت الحاره دى و بعد شهر مش هتلاقى بطنك خالص ومن غير تعب
بوصى يا جميل بالنسبه للكورسيه طبعا انا جبت الكامل اللى زى المايوه عشان يلم الضهر والوسط لان الشورت مش هيلم الوسط وبالنسبه للاكل طبعععا بدون سمنه اطلاقا بس بعملو فى الفرن وبضيف التوابل عليه بتديلو طعم ممتاز وعرفكو ازاى وهنزل امثله بس معلش اصبرو عليا كل يوم هنزل حبه لانى ورايا نونو وباخد كورسات ومش بقدر ادخل نت اكتر من ساعتين فى اليوم وبالنسبه للمشروبات انا مش باخد اى مشروب غير الشاى الاخضر واليانسون كل واحد مره فى اليوم وبس باقى الاعشاب بضيفها للاكل زى السلاطه او الشوربه بحيث محسش بطعمها فزهق واسيبها خالص لانى مش بحب اغصب نفسى على حاجه عشان مكرهش الرجيم لان المشوار طويل فلازم اخليه خفيف على قلبنا وانا مش بحب اشرب مشاريب لاعشاب غريبه ويا عالم طعمها هيكون ايه
يا حبيبتى طبعا نقبلك على عينا وراسنا وانت تامرى وغلبينا على كيفك
هو بالنسبه للزيوت دى عندنا بتتباع عند العطارين ولو انتو مش عندكو انا ابعتهملك هديه لاغلى اخوات لينا وممكن كمان اعرفلك طريقه عمل زيت الشطه وتعمليه بنفسك فى البيت او اجيبلك بدائل ليهم لو معرفتش ابعتهملك اى خدمه ابعتيلى على الخاص وانا تحت امرك فى اى وقت
شوفو يا بنات فى هنا معلومه مهمه لازم نعرفها موضوع ناخد اعشاب قبل الاكل ولا بعدو وكل واحد يدينا وصفه ويقعد يقول على خطوات وتعليمات كانو بيفتح عكا بيفكرونى باحمد زكى لما كان عامل دجال وقالو استحمى والبس الحجاب ونط ولما نط مات قالك اوباااا لبسو من غير مايستحمى
ده كلام فارغ ولا تفرق اخدو قبل ولابعد ولا حتى ده فى يوم وده فى يوم انا بتكلم عن اعشاب هتعلى معدل الحرق لجسمى عامه ملهاش دعوه باكله معينه المهم انى لما اعمل تمارين بدل ماكنت هفقد مثلا ١٠٠سعر اخلى جسمى بيحرق اسرع فافقد ٢٠٠ملهوش دعوه بقى انا كنت واخد الحاجه دى قبل ماكل ولا بعدو الحاجه اللى هتعلى الحرق هتعليه
ربنا يكرمك يارب انا كنت عايزه اعلق لسه على الموضوع ده بس مش لاحقه ارد على الكل فعلا السكر الدايت ده مصيببببببببه لان فى نوع رخيص اللى بيحتوى على ماده الاسبرتام دى مليون فى الميه بتسبب سرطانات وبتدمر فى المخ وطبعا كل الشركات اللى بتنتج مشروبات دايت او بسكويت دايت بتسترخص وتستعمل النوع ده لان النوع الامن اللى من الفواكه الطبيعيه غالى جدا واحنا لسه بنتكلم عن الاكل الصحى فرجاء نخلى عندنا عزيمه ونبعد عن الحاجات دى اصلا حتى المشروبات الغازيه اللى مش دايت مضره جدا جدا وطبعا كلكو حافظين اضرارها خلينا نحب شكلنا اكتر من بطننا انا عمرى ماتخنت قبل الحمل لانى كنت فرحانه بجسمى جدا كنت ابص لاى حاجه بتتخن ومضره ونفسى تروحلهاو اقول شكلى اهم عندى من بطنى الاقينى سيبتها ومبسوطه فكرى نفسك دايما بحاجه تفرحك اكتر من الاكله وانت تسيبيها يعنى لو شفتى اكل مغرى تخيلى نفسك وانتى فى قمه رشاقتك وشكلك عاجبك اوى وعاجب جوزك وكل اللى حواليكى معجبين بيكى هتحسى بسعاده جواكى وفرحه اكبر من اللى هتديهالك الاكله دى هتلاقى نفسك سبتيها وانت مبسوطه يلا بقى نرسم فى خيالنا شكلنا واحنا زى هيفاء ونركز معاه حبه ومننساهوش عشان عزيميتنا تعلى
حبيبتى الا بذكر الله تطمئن القلوب ليه نفسيتك تتعب ومن لزم الاستغفار جعل الله له من هم فرجا ومن كل ضيقا مخرجا متزعليش نفسك ونصيحه عشان ضهرك اشربى لبن كتير بس خالى الدسم وابعدى تماما عن المشروبات الغازيه بتهدم فى العضم
حبايبى انا اسفه والله غصب عنى انا لسه جايه من بره والله كل ده مستنين نتيجه الانتخابات ويا دوب غيرت للبيبى ودخلتلكو حبايبى اللى شايفين اسمى تحت انا كنت بقرا الصفح اللى فاتتنى اصلكو كتبتو صفح كتييير اوى ماشاء الله
انا هرد على الحاجات المهمه اوى بس دلوقتى لانى مش شايفه قدامى واوعدكو من بكره هتلاقونى معاكو على طول اون لاين
اهم حاجه الاخت الحامل ربنا يكرمك تصبرى عليا حبه على ماشوف لكو ايه الحاجات الامنه على الحوامل واعرفكو بس اللى انا متاكده منو ان القرفه دى مصيبه واللى بيتاخر عليها الطلق فى الشهر التاسع بيدوهالها عشان الرحم ينشط وتولد فالله يخليكى انا مكنتش عامله حسابى انو ممكن حوامل يدخلو معانا فاتكلمت عامه ونفسى موضوعى يساعد ناس بجد مش يعمل مشكله لحد
تعليق كمان على معلومه اتكتبت عن خل التفاح انو بيضيع صبغه الجلد ويخلى الجروح متلمش ده للاستخدام الموضعى يعنى لما نحطو على الجلد ممكن فعلا يسبب عدم التام الجروح وعشان كده انا مكتبتوش مع الزيوت للتنحيف رغم انو بيجيب نتيجه حلوه
انما احنا هنستخدمو فى الاكل وكده هناخد فوايدو وبس وموضوع انو يجيب قرحه ده لو خدناه على معده فاضيه انما احنا هنضيفه للسلطه او طبق الفول او الشوربه وكده مش هيضرنا ابدا
صحيح انا صورت الجدول بتاعى وجبت صور متحركه للتمارين اللى كتبنها فى الجدول بس عندى ممنوع انزل صور مش فاهمه ليه يمكن عشان بدخل من الموب انا هبعتهوملك فى ايميل ونزليهم انتى دلوقتى اوك
موف×موف موف×موف images/avatars/whiteflower.jpg سوبر فتكات Fatakat 257184 الاسكندرية – مصر