انا عايزة احكي لكم تجربتي يمكن تكون فيها ولو نظرة امل لاي واحدة فيكم
انا حاسة بكل واحدة فيكم وعارفة معانتها انا اعدت سنة ونص بعد الجواز من غير خلفة ومكانش عندي انا اي مشكلة كنت مستعدة للحمل
عارفة انها مش مدة كبيرة بالنسبة لكتير منكم بس لما تعيشي المها لوحدك وكل كلمة تجرحك وتدبحك
بتتألمي بيها لوحدك يبقا كأنهم 20 سنة كنت بدبح كل يوم من غير ما افضفض لحد
غير رب العالمين كانوا الناس بتستمد قوتها مني وانا من جوايا متحطمة وكنت بأوح
انا وجوزي كنا زمايل في الجامعة واتجوزنا علي حب ويوم فرحنا كنا هنموت من الفرحة شهرين والفرحة اتسرقت لما اكتشفنا ان في مشاكل
واعدنا سنة ونص بنخبي ان في مشكلة والدكتور يوم وقفة العيد قال مش هيحصل حمل طبيعي ابداً
ويوم العيد كنت بموت ودمعتي علي المخدة وكان كل املي يبقي عندي بيبي واجيب له لبس العيد
لحد ما جيه اليوم اللي البريود اتأخرت فيه وانا كنت متأكده ان مفيش حمل والمفاجأة ان يطلع فيه شرطتين واخيراً انا حامل
كنت مش مصدقة وعمالة اجري وجوزي اعد يهدي فيا انا كنت حاسة ان بطني عمرها ما هتشيل بيبي ولا هبقا ام
وفي الشهر التالت لقيت دم بينزل وانا واقفة حسيت ان كل حاجة في عمري راحت اني حلم عمري بيروح وانا مش عارفة اعمل له حاجة
وربنا ستر بعد ما اعدت 16 يوم ينزل مني بقع دم وكل يوم اقول البيبي هينزل
وفي الشهر الخامس وانا وجوزي رايحين نعرف نوع الجنين وفرحانين نفاجأ بالدكتور بيقول عاوز ثلاثي الابعاد
عشان شاكك في حاجة في البيبي وانا اللي طالع عليا اقوله يعني خلاص مش هيكمل معايا واعدت احمد ربنا وقلت يا رب انا مستعدة لكل اللي تديه لي دي هديتك وانا مش هزعل
ونزلت من عنده رحت لدكتور تاني وتالت قالوا لي البيبي زي الفل وكمان هي بنوتة ومفيهاش حاجة
اتصلت بيه عشان اقوله بهدلني وزعق لي وقال لي لازم اشوف الاشاعة ان شاكك ان ربنا يحفظنا فيه كيس في المخ
يعني تشوه حاولت ابقي قوية بس خلاص كنت بنهار
كنت هموت واعدت 3ايام من غير اكل ولا شرب
وبنتي حبيبتي اللي بتمناها بترفص في بطني ومش عارفة اوصل لها اكل ورحت عملت الاشاعة طلعت بنتي زي الفل
وفي السادس قالوا لي المية قليلة
قلت لهم دي هدية ربنا ليا وانا عارفة ان ربنا مش هيهاديني بحاجة وحشة
لحد ما ولدت وفقت من البنج واللي طالع عليا اقولهم بنتي كويسة متضحكوش عليا
وفقت وشفت هدية ربنا الحمد لله رب العالمين بنتي جيهان ربنا يخليها لي زي الفل وربنا ملا لي بيها دنيتي واهي مطلعة عيني
انا حبيت اقولكم علي حكايتي يمكن تستفادوا منها
ال كل المشتاقات انا بحبكم وحاسة بيكم لاني جربت احساسكم والله كل يوم بدعي لكم
وربنا يجعل حملكم اهون من حملي
انا بس عيزاكم تعرفوا ان ربنا لما بيريد شيء مفيش حاجة هتمنعها عنكم
خلي في يقين مع الله ولما تضيق بيكم وتتعبوا اعرفوا انها خلاص قربت
في حفظ الله
مونيتا55 مونيتا55 488753_1.gif فتكات ست الكل Fatakat 488753 الجيزة – مصر