ازيكو يا فتوكات …انا اول مره هكتب ف القسم ده انا بحب الاكل الهندي اوي واللي جربه هيعرف هو حلو اد ايه و طعمه قريب من اكلنا يعني صلص و رز و عك هههههههههههههه ان شاء الله لو شفت تشجيع هنزلكم اكلات هنديه انا بعملها بس قلت النهارده جس نبض أول حاجه الخبز الهندي لأنه بيتاكل جنب كل الاكل تقريباً طبعاً عندهم انواع كتيره زي الباراتا و الشباتي بس النان هو اشهر واطعم حاجه عندهم انا سافرت الهند كتيير و مناطق مختلفه ف الهند ف جربت اكلهم علي اصوله يعني نيجي للنان بتاعنا هم بيعملوه ب 3 أنواع في الساده او بالزبده او بالزبده و التوم يلا بقي كفايه رغي
المقادير:
4 كوبايات دقيق
4 معالق زبده
2 معالق كبار زبادي
2 معلقه صغيره خميره جافه
1 كوب حليب دافي
1ملعقه صغيره ملح
1 ملعقه صغيره سكر
ولو عاوزينه بالتوم يبقي نجيب كمان 3 او 4 فصوص توم مهروسين ناعم
أولاً:
هندوب السكر مع الخميره ف الحليب و نسيبهم ربع ساعه او لحد متشوفوها بدأت تطلع رغاوي
بعدين نجيب الدقيق مع الملح وننخله و نحطه ف الحله او ف الحاجه اللي هنعجن فيها
نعمل حفره ف الدقيق و نضيف الزبده (معلقتين بس)و الزبادي وكوبايه الخميره اللي سبناها قبل كده
اقعدي بقي اعجني بأيدك زي الشطوره ولو حسيتي انه محتاجه زوديها شويه لبن او ميه دافيه صغيرين
بعدين نغطيها بفوطه نضيفه و نسيبها ف مكان دافي عشان تخمر
بعد متخمر و يضاعف حجمها هنجيب العجينه نقسمها كور صغيره و نسيبها برده ترتاح شويه
بعدين نيجي علي سطح ناعم ونرشه بالدقيق و نحط ف ايدينا و ع النشابه شويه دقيق و نبتدي نفرد و نعمله علي شكل بيضاوي
نكون مسخنين الفرن علي اعلي درجه قبلها بشويه كده و بعدين تبدأي ترصي الخبز ف الصواني و تدخليه الفرن و توطي بس مش ع الاخر و بياخد بس حوالي 3 او5 دقايق بعدين نطلعه قبل مايستوي ع الاخر ندهنه بالزبده الباقيه و انا بكون عامله طبق صغير في زده مع توم مهروس و بدهن كام رغيف برده يعني يبقي عندك نوع بالتوم و نوع بالزبده وندخله الفرن كمان دقيقه واحده مش اكتر وبس نطلعه و كلي احلي عيش هندي
مش عاوزه منكم اي حاجه غير دعوه حلوه ربنا ربنا يرضي عليه مواضيع هذا القسم برعاية
Cherry blossom Cherry blossom images/avatars/dice.gif فتكات هايلة Fatakat 72409 القاهره – مصر