السلام عليكم ورحمه الله وبركاته
رمضان كريم علينا وعليكم
والله العظيم ده عن تجربه
انا كنت بسم الله ماشاء الله 103 كيلو ودلوقتى 75 تخيلو … وده من غير ما اتابع عند اى دكتور ومن غير ما اخد اى ادويه
اقولكم عملت ايه
انا كنت باكل كل حاجه بس بقلل من اكلى يعنى ايه ؟يعنى كنت بقوم جعانه ده فى بدايه الرجيم ومع الاستمرار كنت بحس انى شبعت بسرعه
فى الفطار كنت بفطر اى حاجه موجوده فول او طعميه او بيض او بطاطس …. سندوتش واحد بس فاهمين واحد بس من اى نوع والسندوتش ده عبارة عن نصف رغيف بلدى مع كوب لبن ساده بنصف ملعقه سكر وبعد الفطار بساعتين كده هتجوعى طبعا خدى اى ثمرة فاكهه ويستحسن تفاحه يعنى فيتامين وحديد كمان ده علشان مدوخيش يا قمر وانتى بتعملى الرجيم وخدى بالك كمان اللبن علشان بردو مادوخيش
فى الغداء طبق سلطه محترم تبدئى به وهو عبارة عن طمطمايه وسط وخيارة كده حلوة كترى بقى من الخس والجرجير والبقدونس فاهمين بقدونس كتييييير لانه حلو اوى فى اذابه الدهون مع قطعه لحمه او ربع فرخه مع اى صنف خضار بالملعقه واخدين بالكوا بالمعلقه وطبعا ماما كانت بتسبكلنا الخضار فعادى انتى هتكليه بالمعلقه من غير عيش ولا ارز ولا مكرونه وده علشان متحرميش جسم من حاجه وهقولكم فى الاخر ليه او ممكن سمكايه وسط مقليه كمان شوفتوا بقى مش حرماكوا من حاجه ازاى
بعد الغداء بساعتين ثلاثه كده هتجوعى هتعملى ايه بردو هتكلى تفاحه تانى
فى العشاء بقى مفاجاه مافيش عشاء غير كوب لبن ساده بنصف معلقه سكر او كوب زبادى عادى بنصف ملعقه سكر ومش شرط يكون زبادى لايت
ده بالنسبه للاكل اما بقى بالنسبه للمشربات فعليكى بالقرفه بالجنزبيل بدون سكر ويستحسن ان يبقى قبل الغداء مرة وبالليل مرة وكمان فى عصير الليمون وعبارة عن عصرة نصف ليمونه على كوب ماء من الثلاجه وبدون سكر
بالنسبه للحلويات ممنوعه تماما فى بدايه الرجيم
بعد الرجيم بقى بشهرين كده ممكن تاخدى قطعه بسيطه جدااااااااااااااااا من اى صنف حلويات
طبعا طبعا طبعا لازم تمشى حتى لو ربع ساعه فى اليوم
ممكن تتمشى فالسوق بس لازم يكون فى حركه
وان شاء الله هتخسوا بس لازم يكون فى اراده
انا عن نفسى خسيت كل ده فى حوالى 7 شهور
متتخضوش قوى كده طبعا الفترة طويله بس معلش ده لانك مش حارمه جسمك من حاجه
والمفاجاه بقى انك مش هترجعى تانى للوزن اللى انتى كنتى فيه
وده لانك محرمتيش نفسك من حاجه
انا دلوقتى ممكن اتعشى فى يوم من الايام وده مش كل يوم
ولما بحس انى تخنت كيلو كده ولا حاجه امنع العشاء لمده اسبوع
واكتفى بكوب لبن
وممكن كمان اكل ارز او مكرونه او عيش بس بيبفى بسيط جدااااااااااااا وده علشان احافظ على جسمى يعنى نصف رغيف مثلا فى الغداء اوطبق ارز او مكرونه بتاع الاطفال يعنى زى ماتكونى هتاكلى طفل شوفى انتى بفى هتحطيله قد ايه
شوفوا بقى الحكايه سهله ازاى يعنى هتاكلى كل حاجه بس قليله
وهتخسى يا قمر واللى عندها اى استفسار تسال وانا هجاوب
وربنا يكرمكوا كلكم ويكرمنى معاكو
ممكن تقيموا بقى الموضوع علشان يتثبت والكل يستفيد
اه نسيت اقولكم على حاجه اهم حاجه خلال الرجيم المياه
يعنى اشربوا مايه كتيييييييييييييييير ويستحسن قبل الاكل
علشان تحسوا بالشبع بسرعه
حيوية ونشاط حيوية ونشاط images/flowersavatars/avatar0012.jpg فتكات هايلة Fatakat 549374 القاهرة – مصر