وصفتي انهارده وصفه صعيديه 100%
مش كتير يعرفوها وكتير هايستغربوها
حماتي ربنا يجازيها كل خير هي اللي دايما بتعملها وعلمتهالي
وبقيت بجد مدمناها وباعملها في الاعياد وفي غير الاعياد لسهولتها وكمان اكيييييييييييد لطعامتها
بجد انصحكم تجربوها
يهمني قوي انكم تتعرفوا علي الاكله الجميله دي من تراثنا المصري الاصيل
واوعدكم هاجيبلكم وصفات حلوه كتير من حماتي الصعيديه
هي صعيديه اه بس دلوعه يعني 
يلا نبتدي
اولا الاكله دي اسمها فطير بسخينه
مش عارفه ايه علاقه الفطير بالسخينه بس اكيد علاقه شرعيه
يعني
وهي عباره عن فته رقاق باللحمه والشوربه بس الشوربه هنا مختلفه شويه بتببقي اقرب لكباب الحله بس الصوص اخف بكتير
المقادير غير محدده لكن انا عامه هاشتغل علي كيلو لحمه وهاحاول اقول مقادير تقريبيه
مبدئيا كيلو اللحمه هاياخد كيلو بصل حوالي 5 بصلات كبار البصل الكتير مهم قوي في الوصفه وهو اللي بيعمل الصوص الجميييييييييييل اللي هانشوفه بعد شويه
نقطع البصل تقطيع عادي مش كبير ومش صغير
نشوح البصل في خمس معالق سمن كبار لكل بصله معلقه سمنه كبيره
بعد شويه نضيف معلقه توم مفروم ونكمل تشويح
نقطع اللحمه مكعبات صغيره علي قد القطمه
نضيف اللحمه ونكمل تشويح لحد مالونها يبقي بني
نحط ورقه لاورا ومعلقه قرفه ومعلقه ملح ومعلقه فلفل اسمر
نزود ميه ونقفل الحله وياريت لو حله ضغط
نتابع سوا اللحمه ولو احتاجت ميه نزود لحد ماتستوي خاااااااااااالص
طبعا الصوص في النهايه رهييييييييييييب ويشبه كتير صوص الديمي جلاس وصوص البيكاتا
نجهز الرقاق
يفضل الرقاق يكون طري بيبقي احلي ومش بيبوش بسرعه زي الرقاق الناشف
وعلي فكره بقي متوفر دلوقي كتييييييييير عند بتوع الرقاق والفطاطريه
لكن لو مافيش رقاق طري طبعا ينفع نستخدم الرقاق الناشف
نرص الرقاق الطري فوق بعضه ونقطعه 8 او اكتر وبعدين نقطع بالعرض
هايدينناا مربعات زي كده
نحطه في صينيه ونسقيه باللحمه والصوص بتاعها واااااااااااااااااااااااااااااو بجد تهببببببببببببل
انا هنا عملت صينيتين واحده بالرقاق الطري والتانيه بالرقاق الناشف
وطبعا الاتنين اتنسوف نسف وقطعنا تاني رقاق وكملناااااااااااااااااااااااااا
اسفه بقي كنت عند حماتي ومش مظبطه تزيين الاطباق وطريقه التقديم
ده بجانب ان كلهم كانوا واقفين فوق راسي وانا باصور
هههههههههههههه
وكل واحد من العيال عاوز يتصور جنب الطبق 
فاكرين الاعلان بتاع اتصور جنبه والنبي يااااااااااااابا
فقلت اريحهم واخدلهم صوره جماعيه
اما عن اقتراحات التقديم
بصراحه مش محتاج حاجه جنبه خااااااااااااااالص 
مواضيع هذا القسم برعاية
نوسه الملحوسه نوسه الملحوسه فتكات غالية قوي Fatakat 269320 التجمع الخامس – مصر