(اللهم إنى أعوذ بك من نفس لا تشبع)
حبايب قلبى جروبى الجميل
هنا بجد لقينا أحلى صحبة مش مسأله دايت ولا حاجه
أحب بداية أشكر الجميلتين تفاؤل و أهداب على مجهودهم الرائع الفترة اللى فاتت
بس احنا مرينا بظروف قاسيه وخمول وبقينا معرضين للتشتت وعشان كده
كان لازم حد شرير زيى يمسك الجروب .. ويارب نوصل لأهدافنا
نظام الدايت اللى ماشين عليه هو الهرم الغذائى وعاملين ميكس معا الصيام العكسى
وده النظام ( الهرم الغذائى الاسبوع التانى )
الأفطار:
شاي أو نيسكافيه بلبن خاليالدسم + ا ملعقة مربي دايت + شريحة لانشون او مثلث جبنة نستو دايت+2 توستسن
الغداء:
اليوم الأول:
تونه + سلطه + رغيف سن او 2 توست
اليوم الثاني:
1/4 فرخة مسلوقة او مشوية +خضار بأي كمية + سلطة
ملحوظه الخضار اللى باى كميه ده لالالالالالالالالالازم يبقا نى فى نى
مفيش واحده تعملى مسبك وتقولى كلت باى كميه
مفيش بسله ولا بطاطس …عشان خاطرى
عندك كوسه ..فاصوليا .. اى حاجه
اليوم الثالث:
2 سمكه مشويه +رغيف سن + سلطة
عاوزه تاكلى جمبرى او كاليمارى مفيش مشكله
ربع كيلو مشوى وبسسسسسسسسس
اليوم الرابع:
1/4 فرخة مسلوقة او مشوية + 10 أصابع محشي + سلطة
اليوم الخامس:
8 ملاعق مسقعة دايت + رغيف سن + سلطة
اليوم السادس:
3 بيضة اومليت مع الخضار + سلطة + رغيف سن
اليوم السابع:
6 ملاعق فول بملعقة زيت زيتون صغيرة + سلطة + رغيفسن
العشاء:
3مغرف شوربة خضار او بيضة مسلوقة + 2توستسن
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ
ملاحظاااااااااااااات
الرياضه ….( 300 دقيقه قسميهم براحتك المهم كل يوم تتشقلبى فى البيت )
الميه …….( اشربى ميه كتير عشان خاطرنا )
ليكى مره واحده بس فى الاسبوع قطعه حلويات بحجم علبه الكبريت
او بوله ايس كريم … أو كوبايه بيبسى ..كوبايه مش ازازه ليتر
اليوم اللى مش هتقدر تلتزمى بيه باللى مكتوب فى الغدا … ممكن تبدليه بتونه بس
اى تبديل عشوائى مش هينفع
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـت
يجماعه الالتزام الالتزام الالتزام
انا مدلاعاكوا الاسبوع ده
لو بس كلتى الحجات اللى مكتوبه ومزودتيش هنخس ان شاء الله
واللى مش هتلتزم اسمحولى هعتبرها بتحطبنى على اخر الاسبوع مش هينفع تبقا معانا
وده للمصلحه العامه
وربنا معانا
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ
انتى …. ايوه انتى ….. انتى موزه بس محتاجه تنفضى الدهون اللى مخبياكى
انتى …من جواكى بنت شقيه وجميله
بس الشقاوة والدلع عمرهم ما بينفعوا مع واحدة تخينه
المهم …( شويه RULES كده عشان نبقا مع بعض )
1- مش عاوزين عك نهائى ومع احترامى للجميع اللى هتعك وعلى اخر الاسبوع مش هتخس هتحط اللوجو اللى فى اخر الموضوع فى توقيعها لمده اسبوع
2- الملتزمه طبعا فى اتنين لوجو لاكتر اتنين خسوا فى الاسبوع
3- ارجوكى بلاش احباط وامشى على الدايت بما يرضى الله
4- هتغيبى اسبوع وتيجى تقولى معاكوا هنسلم عليكى ونعملك شاى ونقدملك كيك
ونعتذرلك مش هينفع تبقى معانا …لانك طبعا معندكيش عزيمه
الا للى كان عندهم ظروف قهريه
ملاحظات بالنسبه للدايت
1- الالتزام بشرب من 8 الى 12 كوب ماء باليوم
2- السكر ليك معلقتين بس فى اليوم وممكن تستخدمى سكر دايت
3- ياريت نلتزم بالدايت ونقلل من الدهون والنشويات 4- الالتزام بالرياضه لمده نص ساعه فى اليوم
5- لو جوعت بين الوجبات ممكن تاكلى خضار او فاكهه ما عدا الممنوع منها
6- اخر معاد للعشا اقصى حاجه الساعه 9 بعد كده ممنوع
اسماء البنات المشتركين معنا
تفاؤل تفاؤل (ام زياد) الوزن قبل 86 الوزن الحالى 82 2- سمسم الصغير (مها )الوزن قبل 107.5 الحالى 93 3-نوستى1(نسرين ) الوزن قبل 85 الوزن الحالى 77
4-املى رضا الله (نهى ) الوزن قبل 80 الحالى 70
5-الثلاثه يحبونها (حنان)الوزن قبل 83 الحالى 74.5
6- اهداب الحب (ام ملك )الوزن قبل 80 الحالى 75
7- halagaarar (هاله)الوزن قبل 134 الحالى 128
8-knt2016 (كوكون ) الوزن قبل 89الوزن 83
9-farida2016(حنان)الوزن قبل73 الحالى 69
10-princessalaa(الاء)الوزن قبل 85 الحالى 79.5
11-مونى اللذيذه الوزن قبل 115 الوزن الحالى 104,5
12-شروق الدعوه (نور) الوزن قبل 85الوزن الحالى 77
13- راندا الوزن 69 ونص
14 -روان الوزن 69
15- بسمه الوزن قبل 71الوزن الحالى 69
16- ام جنه كانت 108 وبقت 99 17- مروه وزنها الحالى 115
الميزان الجمعه والسبت الجايين
ياريت شروق الدعوه ونسرين يحطوهم فى توقيعاتهم عشان التشجيع
لانهم اكتر اتنين خسوا الاسبوع ده
كمان احنا هنعمل هديه للمركز التانيه وهى هتحصل على لقب اميرة الجروب وهيكون ليها ده وهتحطها برضوه فى التوقيع بتاعها
بالنسبه بقى للى هتعك ومش هتخس ومش هتحقق اى خساره فى الوزن هيكون ليها الهديه ده وملتزمه تحطها فى التوقيع بتعها لمده اسبوع علشان تحرم تعك تانى وكمان هتحصل على لقب بكبوظة الجرووووب
farida2016 farida2016 سوبر فتكات Fatakat 628640 مدينه الاطفال – مع حبيبه قلبى وعمرى فريده