ازيكم ياامهاااات المستقبل باذن الله يارب انا جمعت كل اسئلتكو لاني كنت عامله موضوع تجربتي الناجحه ف الحقن المجهري وبقيت ام محمد والله تعبت اوي لحد ماكتبت وركزت لان ابني بيعيط كتير وسهرت اكتبه عشان افيد بيه اخواتي والاسئله دي اللي هرد عليها من موضوعي لان الحمد لله ربنا انعم عليا بابني بعد تعب نفسيا وماديا ومعنويا وهحاول ااقسم لكو كل جزء :
يارب يفيدكو وتدعولي اخاوي ابني
نبدا بالاسئله الشائعه جداالعمليه اتكلفت كااام كاه كله بعد اد ايه جواز عملتي العمليه عملتي تلقيح صناعي قبلها ولا لا وليه ماعملتيش الاجنه كانت فريش عند الزرع ولا مجمده ولما جمدتي زرعتي بعد اد ايه
سبب انك عملتي العمليه تاثير المنشطات عليكي ايه المضاعفات اللي ممكن تحصل من العمليه
وامتى تحصل حالة الحيوانات المنويه عند التلقيح طريقة اخذ العينه عادي ولا بالابره
ايه كانت تحاليل اللي عملتيها اللي طلبها الدكتور منك وايه احسن مكان نحلل فيه السائل المنوي
لما اعمل سحب البويضات هحس بايه مؤلم ولا لا بنج كلي ولا نصفي ف السحب
هيحصل دم بعد العمليه ولا لا كام بويضه سحبت مني
ايه نصائح اللي قالها الدكتور قبل الزرع كام بويضه اتلقحت وكام بويضه لم تلقح هل جمدتي كتير لعمل زرع مره اخرى لحد امتى صلاحية المجمد ايه الفرق بين الزرع ف اليوم الثالث او الزرع ف الخامس
كام واحد زرعتيهم وكام واحد ثبتو
حسيتي بايه ف العمليه مع زرع الاجنه وايه اللي حصل فيه بنج كلي ولا نصفي ف الزرع
الاجنه كانت من الدرجه الكام ولما فكوها بقيت من الدرجه الكام نمتي ف المستشفى ولا روحتي ف يومها قعدتي اد ايه بعد العمليه على ضهرك
اختارتي نوع الجنين ولا لا هل ضعف الحيوانات المنويه ينتج عنه طفل مشوه لا قدر الله
امتى عملتي تحليل الحمل بعد اد ايه وقت االانتظار للتحليل ايه الاعراض اللي اعرف بيها اني حامل التحليل المنزلي بيبين ولا لا هل وارد ان الدوره تتاخر عن ميعادها
اعرف ازاي ان فيه حمل ايه الاكل اللي بيثبت الاجنه ايه الممنوع من الاكل اتحرك ازاي ايه الممنوع ف الحركه انام على ضهري طول اليوم ولا عااادي في فترة الانتظار جوزك عمل ايه وايه تجربته ف علاج الحركه ايه نوع العلاج اللي جوزك اخده اعشاب ولا ايه ميزه علاج العشاب قبل الحقن المجهري
ايه الادويه اللي بتتاخد بعد ما الحمد لله حصل حمل
عملتي ربط ولا لا اسباب ربط الرحم
الحمل واحد ولا توام
ايه اكتر حاجه لازم اخد بالي منها ف الشهور واحذر جدا منها ايه الادويه اللي لغاها الدكتور بعد الشهر الرابع من الحمل
بسم الله بداناو2العملية اتكلفت كام مش هقدر احسب بالظبط لان بجد مصاريفها كتير وده ليه تعالو نحسبها
لو لحد الحمل بس ممكن تكون14000 تقريبا انا حاسبه كله
يعني بالتجميد والعلاج والمتابعه وادويه التثبيت
دا ف الاول بتلاقي عادي تكلفتها اوك لكن بعد ماتدخلي ف الجد بتصرفي طبعا
يعني التجميد بياخد حوالي الفين
يعني برضه علاج تنشيط انا اخدت ااقل جرعه 3 بودره ف اليوم ممكن تاخدي اكتر 8 او اكتر دا غير المتابعه لحد العمليه
ولو ان شاء الله حصل حمل حقن تثبيت +لبوس تثبيت العلبه كانت ساعتي 125اضربيهم في 3 مرات ف الشهر الواحد +وحقن السيوله مش فاكره بس كانت غاليه يوميا +برشام تثبيت+ برشام سيوله
ولو هيعمل ربط ب 2024
والتحاليل بتدخل ف 400 للمره الواحده
دا غير بس الفيتامينات والكالسيوم ب 100كل شهر بعد الحمل ان شاء الله لحد الحمل بتدخلي ف 23000 مثلا
لكن انتي وحالتك الصحيه بقى يعني لو منظار اشعه كده يعني
عملتها بعد سنتين جواز
اجابة 3 و54لا ماعملتش تلقيح صناعي قبلها وليه لان نسبة نجاح الحقن اكتر بكتير من التلقيح ف ليه مااعمل الحقن
الاجنه مجمده من اليوم الخامس ليه
لان انا حصلي مضاعفات ادت لاني لازم اجمد
6 و7 و8و9و10
سبب اني عملت الحقن المجهري هو ان جوزي عنده حركة الجيوانات المنويه صفر وضعفها ده مستحيل يحصل معاه حمل طبيعي
اه اخد علاج لمدة 8 شهور ومحصلش حاجه وحالة الضعف دي برضه بتقلل نسبة نجاح عملية الحقن
اما المنشطات اخدت 3 بودره دي اقل نسبة ف اليوم
تاثير المنشطات الموضوع اني استجبت استجابه كبيره للمنشطات والاستجابه الكبيره دي بسبب
انه عندي تكيس بسيط ف المبيض يكاد لا يذكر والتكيس ده او المبيض المتكيس ده ليه رد فعل مع المنشط يا اما مايطلعش بويضات نهائي يايطلع كتير جدا ويحصل فرط تنشيط
وانا حصلي فرط تنشيط ولما حصل كده اتهيج المبيض من الحقنه التفجيريه اللي ادت لحدوث نشع ميه ف اوردة المبيض نتج عنه ميه كتير ع الرحم او استسقاء
والميه دي بتادي الى ضيق شديد ف النفس ومكروب للكليه تعمل سخونه وده اللي حصلي ورحت لدكتور كلى واخدت علاج
بصراحه الدكتور بتاعي دكتور محمد حسين طلبه ده هو اللي قالي بلاش نزرع ليه
لان لو زرعت دلوقتي هيحصل ان الميه دي مش هتنشف ليه لا دي هتزيد جدا لو حصل زرع ليه برضه
لان المبيض المتكيس ده حساس من الحقنه التفجيريه اللي هي فيها حرمون حمل ونشعت كده مابالك لو كان فيها الحمل نفسه انتظرت 3 شهور لحد لما نشفت وزرعت
ملحوظه الجزء ده نادر مابيحصل لحد عشان ماخوفكوش لكن انا بشرحه عشان فيه دكاتره بتغلط وتزرع وفيه ميه وده تحذير
اجابة 11 و12 وو14 13
حالة الحيوانات المنويه هي ضعيفه جدا والحركه الاولى صفر والتانيه والتالته صفر
اخذو العينه من جوزي عن طريق ادخال ابره للخصيه واخذ العينه ليه
عشان انا جوزي كان قلقان وماعرفش يجيبها عادي
التحاليل اللي طلبها الدكتور هي اهم حاجه عندي الهرمونات
احسن مكان لعمل تحليل السائل المنوي لان كتير معامل مش بتطلع النتيجه صح هو مستشفى ادم للخصوبه ليه لان عندهم اجهزه على اعلى مستوى
اجابة 15 و16 17و 18و 20 23 و24و 27و25 و28
ندخل ف عملية سحب البويضات
العمليه سهله لناس كتير الا انا كانت مؤلمه لاني طلعت بويضات كتير لاني وانا خارجه من الافاقه كانت ستات كتير بيضحكو وبيتساهرو وهما خارجين اما انا ماشاء الله صويت وبصرخ من الالم اوك
العمليه بنج كلي بتتبنجي وهما بيعملو اللازم وطبعا صايمه اه نزل دم بسيط خالص وعدد البويضات كانو تقريبا 30
اتلقح منهم 22 كل يوم كان بيموت اجنه وصلو لحد 4 بس لليوم الخامس هما دول اللي صمدو
كانو من الدرجه الاولى ولما اتفكو بقو من التانيه ومات واحد فضل 3 بس لحد يوم الزرع المجمد صلاحيته لحد 10 سنين
زرعت ف اليوم الخامس ليه وليه مش ف التالت الاغلب الخامس افضل لان لو الاجنه ماصمدتش للخامس كده كده مش هتصمد وهي مزروعه الافضل الخامس لكن حسب الدكتور برضه
ندخل على عملية الزرع اجابة 29 30و 31
بتشربي ميه كتير نصيحه مني ماتشربيش قبل ماتروحي لا اشربي وانتي هناك ليه لا لانك لما تشربي قبلها مثانتك هتتملي ع الاخر وهما هيرفضو يدخلوكي حمام عشان المثانه الممتلئه بتوضح مكان الصح اللي هيزرع فيه الدكتور
ف اشربي قبل ماتلبسي هدوم العمليه وواحده واحده وصلي قبلها ركعتين قضاء حاجه
العمليه بدووووون بنج خالص وهي سهله بس مش سهله اوي لانك هتكوني لازم مزنوقه واي ضغط كده هتحسي انك خلاااص
ههههههه هتعمليها
هتقعدي بزنقتك دي ساعتين تاني لان العمليه مابتاخدش ربع ساعه وانتي ف حجره الافاقه اه باااتي افضل لك من انك تركبي عربيه والموال ده انا بيت ليله
لا مااخترتش نوع الجنين رغم انه ف ايدي بس انا سبتها على الله وربنا رزقني واختارلي
تعبت من الكتاااابه يالا دعواتكو ليا اخاوي محمد
اجابة 32 و33 و34و 35 و36 و37و 38 و39 و40
الحيوانات النويه الضعيفه لاينتج عنها طفل مشوه لانها لاتصلح ان تكون اصلا اجنه
عملت تحليل الحمل بعد 15 يوم من الزرع ليه عشان يكون تاثير الحقنه التفجريه اللي فيها هرمون الحمل راح
تحليل المنزلي اللي هو البيبي تشيك ممكن تعمليه بعد مايمر ميعاد الدوره وانا عن تجربتي ظهر خط خفيف اوي شبه مش ظاهر
الاعراض اللي حاستها بعد الزره بايام هو شد ف البطن ومغص خفيف ولما اتصلت بدكتوري قالي مافيش اي اعراض تجزم بوجود حمل ف الفتره دي الا تحليل الدم وانا ماعملتوش رقمي عملته عادي
اهم اكل هو الخضراوات السوائل الكتير خلي ازايز الميه جمبك واشربي وعصاير ممنوع الشطه القرفه اكمون والتوابل ممنوووع كلي لحوم كتير البروتين مهم اسبوعين الانتظار دول بيمرو ع الواحده كانه سنين ها حمل ولا لا ها حاسه بايه يااارب يكون حمل بلاش تضعفي خلي عندك ثقه ف الله هو اللي بايده كل حاجه
واطبي ع الاستغفار وسورة مريم ياااه لها تاثير كبير لاني كنت اقراها وابكي عند اية رب هب لي من لدنك ذرية طيبه واية وكانت امراتي عاقرا
الحركه بشويش والرقده مش كتير
ندخل على جوزي جوزي اخد علاج كتير بس اللي جاب نتيجه هما الحجامه كل شهر
الرايب وحبة البركه والعسل والبلح السعودي خصوصا مره الصبح ومره بالليل مفيش طلع نخل لان العدد كويس
عملها عند دكتور ف رمسيس ممتاااااز لو عاوزين اسمه
عنيا المهم دلوقتي الحركه 25% الحمد لله بس انا لسه ماخاوتش محمد ادعولي اخاويه
ميزه ان جوزك ياخد اعشاب قبل الحقن ان جودة الحيوانات هتكون اكبر والحجامه بتنضف الجسم ولازم دكتور كبير مش اي حاجه هو اللي يعملها
انا ماعملتش ربط رحم حملت ف واحد ودي ميزه لان التوام ف حمل الحقن صعب شويه يثبت
لااااازم تاخدي بالك من الالتهابات بتبهدل الدنيا ياريت تعالجيها قبل العمليه ولو ف الحمل احذري بتفتح كيس الميه بتاع الجنين
لو كملتي الحمل على خير لحد الرابع الدكتور ممكن يلغي المثبت
انا تعبت لحد ماخلصت موضوعي وده موضوع من اسئلتي لدكتوري يارب اكون افدتكم وانا قلت اعمله لاني ماكنتش بعرف اسال حد ومفيش عير قليل اللي حملت من الحقن وجات هنا تقول تجربتها يارب تحصلوني وتجيبو احلى بيبيهات وربنا يرزقكم جميعا اميييين
طالبه منكو تدعولي اخاوي محمد ابني يارب بحمل طبيعي ده مش بعيد عن ربنا
طبعا مش محتاجه اقولكو قيمو عشان يارب يثبت ويفيد كل امهات المستقبل امييين
يااداره طالبه ان الموضوع يثبت كويس عشان ده مهم وانا اكتر واحده جربت ان الكلمه ممكن تطمن اي واحده او تفيدها
ماتنسوش التقييم عشان الموضوع يثبت
ماتنسوش التقييم عشان الموضوع يثبت
شكلكو هتنسو كده مش عشاني عشان غيرنا يستفيد والله
نونا توتي نونا توتي 757275_1.gif فتكات هايلة Fatakat 757275 الجيزه – مصر