اخباركم ايه يا فتوكات
يا رب تكونوا كلكم بخير
حبيت اشارك معاكم
بشوية اطباق منوعة من الخضروات
و تقريبا ممكن تدخلى كل أنواع الخضروات اللى عندك فى الاطباق دى
و المكونات لمعظم الاطباق هي
جزر
فلفل اخضر اصفر احمر و ممكن حامي
بصل
ثوم
طماطم
زيتون
دى الاساسيات تقريبا
و كل طبق هنزل معاه المكونات
ياااارب تعجبكم
و تقيموا و تردوا
بدل ما الواد ده يعمل معاكم نفس الحكاية
الطبق الأول
أرز بالخضار
المقادير
كوب أرز
شعرية
فلفل اخضر
فلفل احمر
فلفل اصفر
كوسة
بسلة
فاصوليا خضرا
بطاطس
جزر
كله مقطع مكعبات بنفس حجم البسلة يفضل
ماء مقدار تسوية الارز العادى بتاعك
و معاه مرقة لحم فاين فودز
ملح
فلفل اسمر
هنبدا اول حاجة بتشويح الخضار كله مع بعض
مع شوية ملح بسيط و فلفل اسود
فى مقدار من الزبدة او السمنة حسب رغبتك
مع التقليب لمدة 4 او 5 دقايق بالكتير
بعد كده باخد سمنة الخضار ده
و ببدا احمر فيها الشعرية
و انا مجهزة مقدار كوب ماء مع زيادة بسيطة اوى
بعد ما الشعرية تحمر بزود المايا
و بضيف فيها باقى مقدار الملح
و فلفل اسود ومكعب مرقة لحم فاين فودز
وممكن تستبدلي الماء و المرقة بشوربة لحمه او فراخ
يعنى حسب ما تفضلى للرز بتاعك
و بعد ما تغلى المايا تنزلى الرز و تسيبيه يستوى بطريقتك
المعتادة
و قبل ما يستوى تماما يعنى فى اخر 7 دقايق تقريبا
تضيفى عليه الخضار المشوح
و تقلبى كويس و تغطى و تسيبى الرز يكمل سواه
و بألف هنا و شفاااااا
الطبق الثاني
فراخ بالخضار
المكونات
فراخ مخلية مقطعة مكعبات
فلفل اخضر احمر اصفر و حامى
طماطم مقطعة
بصل
ثوم
ملح فلفل اسود و شطة اذا عاوزاها نار يا حبيبى نار
هنبدا فى الطبق ده بتشويح الفراخ فى
مقدار من السمنة الزبدة او الزيت حسب رغبتك
و نزودها بعد التشويح شوية ماء و ملح و فلفل اسود و شطة
و نغطيها لحد ما تقرب تستوى
و الماء يتشرب تماما
بعد كده بنحط معاها البصل المقطع
ونقلب لحد ما يصفر شوية
و بعده الثوم و الفلفل بألوانه
و نبدا فى التقليب و التشويح
و قبل ما تطفى النار ب3 دقايق بالكتير هتحطى الطماطم و تقلبي
مش عاوزينها تبقى صلصة اوى
عاوزين قطع الطماطم يكون لها أثر
وممكن استبدال الفراخ فى الطبق ده بلحمة مقطعة مكعبات صغيرة
او سدق
او بسطرمة
و ممكن تضيفيها للمكرونة بدل الصلصة الحمراء المعتاة لنا
هتلاقى طعم المكرونة تحفة بس ممكن تزودى عليها
فى الطبق نفسه مش على النار
زيتون اسود مفروم و رشة جبنة تركى مفرومة
مش عاوزة اقولك على الطعم
الطبق الثالث
تونة بالخضار
المكونات
تونة قطع و يفضل من الحامية
بصل مبشور
توم مفروم
زيتون مفروم
فلفل اخضر احمر اصفر و حامى
جزر
ملح فلفل اسود كمون و لمون و شطة حمرا
من الاطباق اللى بحبها جدا جدا
و بتدى طعم جديد و حلو للتونة
هتقطعى المكونات كلها قطع صغيرة او مبشورة
و تضيفيها على التونة
و تخلطيها
و تتبليها بالملح و الفلفل الاسود و الكمون و الليمون و الشطة
و محدش ينااااادى عليا
الا لما يدووووق
و بردو نفس المكونات دى
تقدرى تستخدميها
مع الجبنة البيضاء
انا بستخدمها مع الفيتا لايت
و بيبقى طعمها تحفة
بس من غير الليمون طبعا
الطبق الرابع
سلطة الخضار
المكونات
بطاطس مسلوقة مكعبات
كوسة مسلوقة مكعبات
بسلة مسلوقة
فاصوليا خضراء مسلوقة مقطعة
فاصوليا بيضاء مسلوقة
لوبيا مسلوقة
حمص شام مسلوق
جزر مبشور ني
فلفل اخضر احمر اصفر و حامي ني
توم مفروم
للصوص
بصل
توم
مسطردة
مايونيز
كاتشاب
زعتر مطحون
ملح
فلفل اسود
كمون
سكر
شطة
خل
ليمون
زيت
كل ده بمقادير متساوية حسب الكمية اللى تحبيها
و تضربيها فى الخلاط لحد ما يبان لها صاحب
حاولى بقدر الامكان ان الخضار مش يكون مسلوق اوى
بيكون طعمه احلى بس البقوليات طبعا خلى سواها كامل
بالنسبة للفلفل بألوانه مع الجزر خليهم بحالتهم بدون سوا
و تقدرى تضيفى الصوص على السلاطة دى او تأكليها بتتبيلة
عادية من ملح و فلفل و شطة و زيت
بس طعم الصوص تحفة
و كمان ممكن تضيفى للسلطة دى مكرونة عقل صغيرة
بالنسبة لى لما بعملها بعتبرها وجبة مش بقدر اكل حاجة
جنبها و ساعتها امى بتعملى كده
انا كده خلصت يا بنات
و عارفة ان اللى قدمته لكم مش اختراع يعنى
بس بصراحة
حبيت اقولكم ان ممكن نخترع اطباق كتير جدااا
مع الوان جميلة
و طعم تحفة بصراحة
يارب يكون الموضوع عجبكم
و الا افكركم
بالاستاذ
مش هوصيكم
دعوة حلوة و تقييم سكر
مواضيع هذا القسم برعاية
العمة دودودو العمة دودودو 678700_3.gif سوبر فتكات Fatakat 678700 اسكندرية يا جمالها – مصر ام الدنيا