حبايبى الفتوكات الغالين اخباركم ايه وحشتونى
انا بصراحه من زمان نفسى اعمل تورته
بس ولادى مش بيكلوها نهائى اعمل ايه وهما بيحبوا
المعجنات اكتر من اى حاجه اقعد كده نفسى فى التورته
قلت ابدا لازم اعمل تورته حتى لو كانت حادقه ايه المشكله يعنى
عملتها وطلعت ايه موصفلكوش والله حلاوتها مطبطليش اكل فيها
وعملتلها عجينه مخصوص كمان مش توست جاهز ولا حاجه
طلعت تحفه نشوف كده ونخش على المقادير على طووووول
نصلى على الحبيب النبى الاول ونقول بسم الله
شوفتوا الجمال والحلاوه
المقادير
4كوب دقيق يعنى حوالى نصف كيلوا
كوب ماء دافئ
باكوا لبن بودره او 4 معالق
ربع كوب زيت ذره
معلقه صغيره ملح
معلقه صغيره سكر
نصف معلقه بيكنج بودر
باكوا خميره فوريه
للحشو والتزيين
خليط من الجبنه الفيتا والجبن الكاسات الكريمى
سوسيس محمر ومقطع شرائح
فلفل الوان مقطع
خيار مقطع
بقدونس او خس مقطع رفيع
لانشون مقطع
طبعا التزين والحشو حسب الرغبه وممكن تبدلى
الجبنه الكاسات الكريمى بالزبادى او اللبنه
الغرض من انى اخلطها بالحبنه العاديه انها متكونش حادقه
وتتفرد بسهوله على التورته انتى بدلى الحشوات زى ما يعجبك
ميزه التورته دى ان حشواتها وطرق تزينها اختيارى بس انا كتبت
الحاجات اللى استخدمتها
الطريقه
نخلط جميع المكونات مع بعض ونعجن
بالماء لغايه ماتتكون عجينه صالحه للفرد
وممكن تحتاجى معلقتين ماء زياده مفيش مشكله
نسيبها تستريح حوالى نصف ساعه وبعدين نبتدى تشتغل
ندهن صنيه بالزيت ونرشها بالدقيق ونقسم العجينه تلات قطع
نفرد كل قطعه مدوره على قد الصنيه بتاعتنا ونحطهم فوق بعض
فى الصنيه ومنضغطش عليهم خالص علشان هما دول هيبقوا طبقات التورته بتاعتنا
بعد مانفردها فى الصنيه نسيبها تخمر حوالى ساعه مهم
اوى الخطوه دى ومنضغطش عليها خالص ونخبزها فى فرن على 200
لمده نصف ساعه ولما تخرج نسيبها تهدى حوالى ربع ساعه وبعدين نبتدى
نفصل القطع التلاته بتوعنا بالسكينه زى طريقه التورته العاديه بالظبط
ونحط اول قاعده فى طبق التقديم ونفرد خليط الجبنه وعليه الفلفل الالوان
او الخس زى ماتحبى والسوسيس ونحط القاعده التانيه ونفرد الجبنه والحشو
بنفس الطريقه وبعدين نغطى التورته كلها بالجبنه والجوانب كمان زى الصور كده
وعلى فكره خليط الحبنه بالطريقه دى مش حادق خالص كانت مظبوطه جدا
كنت مقطعه اللانشون بقطاعه سمايل
والخيار بالقطاعه القلوب وابتدى زوقى بقه باى طريقه
تعجبك طبعا وباى مكونات
ودى النتيجه النهائيه بالهنا والشفا
شوفوا من جوه جميله ازاى كأنها تورته بالكريمه
والله وكلناها بالشوكه وكانت فظيعه روعه بجد
شوفوا من الجنب
انا كده خلصت الحمد لله بجد ياجماعه لازم تجربوها
جميله جدا احلى من احلى تورته مسكره
وعلى فكره متحاولوش تغيروا فى مقادير العجينه
علشان هى بالمقادير دى هتطلع طريه جدا ان شاء الله
وانتى ممكن تستخدمى التوست الجاهز بس انا حسيت ان
العجينه فى البيت احسن بكتير طبعا
اوعوواااا تنسوووووا التقيييييييم
والطبق ده لحبيبه قلبى اللى هتقييم
تطبيق احد العضوات
تورته حادقه بس ايه توووحفه (تطبيق)
https://fatakat.univanet.com/#5525579
مواضيع هذا القسم برعاية
سيسو زيزو سيسو زيزو 822446_8.gif فتكات غالية قوي Fatakat 822446 المنصوره – مصر