صباح الفل على عيونكم يا احلى و اغلى و اعز الفتوكات
الاول انا عاوزة احكيلكم انا عملت ايه ؟
فاكرين الملجآ اللى يوم اليتيم عملتلهم كب كيك و مارشميلو و رحتلهم قضيت اليوم معاهم
انا رحت ليهم تانى و كنت واخدالهم معايا صلصال و قعدت معاهم نلعب و نعمل اشكال بالصلصال و كان يوم بجد يجنن
و انا باقول للبنات الصغيرة من فضلكم يا قمرات الاجازة جت و بقيتم فاضيين ممكن تاخدوا من وقتكم كام ساعة و تروحوا لاخواتكم فى الملاجئ و تقضوا وقت سعيد معاهم و تجيبولهم معاكم اى حاجة من عندكم او من مصروفكم تشاركوهم فيها و تحتسبوا الوقت اللى بتقضوه ده عند ربنا
انا بقى عاوزة اوريكم الاشكال الحلوووووة اوووووى اللى عملناها سوا انا و هما
يارب تكون الاشكال دى شجعتكم تروحوا و تقضوا وقت حلو معاهم
نيجى بقى للوصفة بتاعتى
النهاردة ان شاء الله انا جيبالكم طريقة جديدة اووووى و حلوة اوووى للبطاطس و كمان سريعة و ممكن تعملى جنبها لحمة او فراخ او كفتة و ممكن تكتفى بيها لو حطيتى فيها سوسيس او فراخ او لحمة مفرومة او حتى كفتة
لانها بيتزا البطاطس اللى ممكن تحشيها اى حاجة عندك مش لازم زى ماانا عاملة
يلا بقى نشوف شكلها الاول و كفاية رغى
مقاديرها
بطاطس شرايح حسب الكمية اللى عاوزة تعمليها لعيلتك
فلفل رومى شرايح [ ممكن مقلى و ممكن نى ]
3 معالق كبيرة صلصة بيتزا
زيتون اسود مخرط صغير
تشكيلة جبن [ انا استعملت كيس مخلوط فيه الشيدر مع الجودة مع الموتزاريلا / و رومى مبشورة ]
سوسيس حلقات رفيعة
زعتر / معلقة بقسماط مطحون
اول حاجة بنقطع البطاطس رفيع علشان تستوى و علشان نعرف نرصها ادوار
بنقلى البطاطس نص قلية او نسلقها نص سلقة للى عاوز يقلل الدهون [ بس ممكن فى السلق تتكسر منا ]
بنجيب طينية فرن او قالب بايركس و ندهنه زيت و نرشه بالبقسماط المطحون
نفرد عليه طبقة بطاطس و نغطى بيها القاع كويس جدا
نرش شوية ملح و فلفل اسود و زعتر
و نفرد معلقة صلصة بيتزا نغطى بيها البطاطس و نضيف الزيتون و الفلفل الرومى المقطع رفيع و سوسيس و نرش الجبن
و نرص بعد كده طبقة بطاطس تانية ونكرر تانى صلصة البيتزا و الملح و الفلفل و الزعتر و الفلفل الرومى و السوسيس و الزيتون و نرش الجبنة
و ممكن نكتفى بكده و ممكن نعمل طبقةتالتة بس لما تكون رفيعة بتبقى احسن و بتبقى زى البيتزا بجد
نرش معلقتين زيت على الوش و شوية زعتر و نغطى الصينية بفويل كويس و ندخلها الفرن الساخن و نسيبها حوالى 1/3 ساعة و نكشف وشها و نشوف استوت البطاطس و طريت ولا لسه [ لانها نص قلية ] و نحمر وشها يالشواية
و نقدمها كده بالف هنا و شفا يااااارب
و انا عملت جنبها ستيك بتلو يالفلفل الاسود و قدمتهم مع سلطة خضراء و صوص الزبادى بتاعى
و ده الاستيك بالفلفل الاسود [ شرايح لحمة استيك بتلو متبلة بميه بصل و ملح و فلفل اسود مجروش و متشوحة فى معلقة زبدة لحد ما تحمر من الجنبين و معاها بصلة شرايح و فصين توم مخرطين و نزود ميه لحد ما يستوى
شوفوا الطبقات باينة ازى و شكلها زى البيتزا
يارب تكون البيتزا بتاعتى عجبتكم و تجربوها و مش حاوصيكم على الدعوة الحلوة بتاعة كل مرة
و اللى حاتدعى حاحليلها بقها بالكب كيك ده
اخت جوز بنتى ولدت و عملنالها انا و بنوتى الكب كيك الروز ده علشان جابت بنوتة زى القمر عقبالكم كلكم يا حبيباتى
اسيبكم بقى فى رعاية الله و تصبحوا على خير و هنا و سعادة يا حبيباتى مواضيع هذا القسم برعاية
شاي ساده شاي ساده 849519_1.gif فتكات ست الكل Fatakat 849519 القاهرة – مصر