السلام عليكم ورحمة الله وبركاته
حابة أقدم هدية وأفيدكم زى ما دايما بتفيدونى
أنا كنت حوالى 78 كيلو وطولى 157 سم تقريبا
وعملت رجيمات كتير وخسيت بالفعل لحد ما وصلت
لوزن 62 كيلو بس المشكلة الأزلية عدم التثبيت والمحافظة على الوزن
لأنى كنت ماشية لوحدى أو مع رجيمات من دكاترة على النت واليوتيوب
ودخلت فى فترة أكتئاب محترمة علشان ساعتها لقيت كل اللى عملته
بيروح وبرجع أتخن تانى وحسيت ان اللى زينا مش مكتوب ليهم يأكلوا الحاجة
اللى نفسهم فيها طول العمر وزدت تانى لحد ما وصلت لوزن 69 كيلو
فى فترة قصيرة جدا ومبقاش عندى ارادة أعمل رجيم تانى لأنى كنت خلاص عرفت اللى فيها
وان المشكلة مش فى نزول الوزن المشكلة فى التثبيت وأنى أقدر أعيش حياتى طبيعية بعد كده
لحد ما ربنا هدانى لصفحة على الفيس محترمة جدا والأدمن بتاعها شخص كان وزنه
حوالى 122 كيلو وخس وثبت لوزن 86 كيلو وبقاله حوالى 8 شهور مثبت وعايش حياته طبيعى
وبيآكل كل اللى نفسه فيه
قولولى لو مسموح أحط لينك الصفحة دى فى الموضوع على العام .. يبقى تمام
لو مش مسموح يبقى اللى عايزة لينك الصفحة هبعته على الخاص
واللى مش عاملة أكونت على الفيس أو صعب تدخل تقولى علشان أكتبلها الأسبوع الأول
والمسموحات والممنوعات والنصايح
والله يا بنات رجيم سهل جدا ومليان أختيارات ومفيش ولا دوخة ولا حرمان واللى بيخس فيه
مش أقل من 2 كيلو فى الأسبوع والأروع من كده طريقة التثبيت التحفة
قيمى علشان الموضوع يتثبت وتفكى كرب كل حد محناج يخس ويخلص من الهم ده
ويا رب نخس كلنا بصحة وعافية
ف رعاية الله يا قمرات
النظام لكل اللى طلبوه وده الاسبوع الأول
الورقة الأولى مدتها 7 أيام متواصلة
الافطار
4 معالق فول بدون سمن أو زيت وربع رغيف بلدى
أو بيضة مسلوقة وربع رغيف
أو قطعتين قريش وسلطة وربع رغيف بلدى
أو 2 ثمرة فاكهة
أو كوب زبادى ( وطبعا بديل الربع رغيف واحد عيش سن ناشف أو 2 توست أسمر رجيم )
الغداء
(4 بنود )(نشويات وبروتين وخضار وفاكهة )
النشويات أختارى بند واحد فقط
ربع بلدى
3معالق رز أو مكرونة مطبوخة بشكل عادى
9 معالق رز أو مكرونة مسلوقة بدون زيت أو سمن
2 توست أسمر
رغيف سن ناشف
البروتين أختارى بند واحد فقط
نصف فرخة مشوية أو مسلوقة أو فرن بدون زيت أو سمن
2 لخم أحمر جاموسى أو بقرى مسلوق أو مشوى أو فن بدون زيت أو سمن
3 سمكة مشوية أو سنجارى بدون زيت أو سمن ( بلطى أو بورى )
2 بيضة مسلوقة
2 قطعة جبن قريش
طاجن جمبرى أو سبيط مرة واحدة أسبوعيا بحد أقصى نص كيلو بدون زيت أو سمن
سوسيس مشوى أو مسلوق بدون سمن أو زيت
نصف كيلو كفته مشوية فى المنزل من اللحم الاحمر الصافى بدون زيت أو سمن
علبة تونة مصفاه من الزيت ومغسولة بالخل
الخضار ممكن تختارى كل البنود التالية
سلطة خضراء
خضار نى ف نى أو مسلوق أو سوتيه أو فرن بدون زيت أو سمن بأى كمية
(كوسة وسبانخ من غير رز طبعا وفاصوليا خضرا)
ولو عندك خضار مسبك ليكى منه أربع معالق فقط
الفاكهة ثمرة واحدة وتكون بعد الأكل بساعتين ومن المسموحات
(تفاح أو كمثرى أو برتقال أو يوسفى أو جوافة من غير البذر علشان الامساك أو كيوى )
العشاء
جبن قريش وربع رغيف وسلطة خضراء
أو 2 ثمرة فاكهة
أو كوب زبادى
النصايح
مرضى القلب والسكر والضغط والانيميا لازم يستشير دكتور قبل ما يبدأ الرجيم
معدل النزول فى الأسبوع 2 كيلو الا ربع وممكن طبعا يكون أزيد وكل جسم حسب الحرق والالتزام بالتعليمات
أول أسبوعين ورا بعد بدون فرى يعنى اللى هتبدأ الرحلة دى تعمل حسابها تأكل كل حاجة نفسها فيها
علشان متضعفش فى الوسط وبعد كدا ليكى كل 6 أيام يوم فرى
الاسبوع الأول مدته 7 أيام والاسبوع التانى مدته 7 أيام متواصلين علشان الحرق بيكون عالى وممكن تخسى فى أول أسبوعين 8 كيلو زى ما حصل مع صاحب الرجيم لو جسمك مستجيب
والاسابيع الباقية لو كملتى بتبقى 6 أيام والسابع فرى
معلقة العسل تساوى معلقة السكر العادى يعنى لو بتأخدى معلقة عسل على الريق
يبقى ليكى معلقة سكر واحدة بس ولو بتأخدى 3 تمرات على الريق أو فى أيام الصيام يبقى متأخديش سكر خالص
لأن ال3 تمرات بديل لمعلقتين العسل المسموحة باليوم
الالتزام بالنظام الغذائى يعنى لا نقلل ولا نزود
الرياضة من بداية الاسبوع التالت طبعا مفيش دلع أكتر من كده
الرياضة بعد كده 3 مرات أسبوعيا لمدة نص ساعة مشى بهرولة ويا ريت لو نزود
يوم الفرى مسموح بكل حاجة فى الدنيا وتركزى على النشويات والسكريات ومتعمليش مجهود
وتخلصى أكل قبل النوم بساعتين على الأقل
ممنوع أكل نوعين بروتين فى وجبة واحدة
لأن الجسم هيهضم نوع ويسيب التانى
مسموح بالخضراوات الورقية كسناك بين الوجبات بأى كمية وهى القتة والخيار والجرجير والخس
النسكافية مسموح بحد أقصى 2 كوب والنوع المسموح البلاك ويا ريت ويبقى أحسن لو أستغنينا عنه
علشان بيعمل ثبات للوزن والأنواع الممنوعة زى الكوفى ميكس والنسكافيه 3 ف 1 يعنى أى حاجة فيها مبيضات
ليكى يوميا كوب لبن خالى الدسم فى أى وقت
اللى بترضع ليها 3 أكواب خالى الدسم
ثمرة الفاكهة فى الأسبوع الأول بعد الغداء بساعتين ومن الأنواع المسموحة
شوربة الخضار بأى وقت بين الوجبات ولو هتحطى جزر للشوربة بحد أقصى جزرتين
ممنوع الماجى والشوربة الفورية والملح يبقى خفيف فى الأكل والسلطة
لو عايزة تسقى الأكل بتاعك بالشوربة يبقى تجيبى قطعة الفراخ أو اللحمة بتاعتك
وتغسليها وتشفيها من الدهون وتشيلى الجلد وتسلقيها بميه وبهارات وكده
بقى عندك شوربة لحمة أو فراخ نضيفة بدون دهون ممكن تستخدميها فى الوجبات
بديل الربع رغيف ( رغيف سن أو 2 نوست أسمر رجيم )
مسموح بالجريب فروت على الريق ومسموح بعصير الليمون بين الوجبات بأى كمية
ثمرة الفاكهة ممكن نبدلها بكوب عصير فريش وممكن نشرب بدلها عصير بيور من غير سكر
لا يمكن استبدال الفاكهة بالخضراوات بين الوجبات
شرب 2 ليتر ميه باليوم ولو زيادة يكون أفضل
الرمان من الفاكهة المسموحة بس من تجارب الأعضاء لقيناه بيعمل امساك فنقلل منه
لو معندكيش بروتين فى البيت غير بيض وهتأكليه فطار وغداء يبقى ليكى فى الوجبتين
2 بيضة فقط
الباذنجان المشوى بين الوجبات بيكون متبل من غير طحينة طبعا
مسموح ب3 بيبسى أو سفن دايت فى الأسبوع ولو أستغنيتى عنهم يكون أفضل
ممكن نستغنى عن وجبة العشاء وممنوع الاستغناء عن وجبة الافطار
ممنوع تبديل الوجبات
ممنوع الحلويات والمياه الغازية واللبان العادى لكن السمارة مسموح وممنوع اللب والسودانى والمكسرات والبطاطا والفينو والبطاطس المحمرة والشيبسى والمولنو والكرواسون وكل حاجة ليها علاقة بالدقيق الأبيض واللانشون والبسطرمة والجبنة الرومى والنستو والبلح والتين والشمام والمانجو والعنب والقصب والافوكادو والقلقاس والبسلة والبنجر واللوبيا والفاصوليا البيضة والترمس والحمص والمخلل والوز والبط والحمام والزبادو حتى لو لا يت والكلاوى والكبد والقوانص وكفتة وكباب الشارع
ومسموح بميه حمص الشام والديك الرومى والأرانب وكفتة البيت والشاى والقهوة واليانسون والكركديه والشاى الأخضر
Temple Temple 599289_11.gif فتكات رائعة Fatakat 599289 الجيزة – مصر