مكرونة بصوص البولونيز وفراخ بصوص الديمى جلاس من مطبخ ردينى
السلام عليكم ورحمة الله وبركاته سبحان الله بحمده عدد خلقه ورضا نفسه ومداد كلماته وزنة عرشه إزيكم يا أحلى صحبة فى أحلى مدونة
كل سنه وكلكن بخير بمناسبة المولد النبوى الشريف
النهاردة حبيت أعمل المكرونة والفراخ بشكل جديد بدل المكرونة بالصلصة والفراخ البانيه قعدت ألف شوية عاليوتيوب لحد أما استقريت على وصفات مختلفة نسبيا وقلت اللى ياكل لوحده …………………. ليه حبايبى الفتوكات ما يشتركوش معايا حتى ممكن يدونى أفكار جديدة ممكن أستفيد منها بعد كدة رحت متشملله وجبت الكاميرا وشغلت التصوير عشان تكونوا معايا خطوة بخطوة
بس ليا رجاء صغير قبل ما ابتدى أرجوكم ما تبخلوش عليا بالردود والتقييمات بصراحةهو دة اللى بيشجع كاتبة الموضوع إنها تعمل موضوعات جديدة لإن الموضوع بياخد وفت كبير عشان يتعمل ما بين كتابة وتصوير وتنزيل الصور….إلخ ….إلخ ….إلخ
بسم الله ونخش على الطبق الأول
الطبق الأول :فراخ بصوص الديمى جلاس : المكونات
نصف كيلو صدور فراخ
بهارات فراخ أو البهارات اللى تحبيها لتتبيل الفراخ(أنا استخدمت بهارات سبيسى للشيش طاووق)
ربع كيلو مشروم فريش
جزرتان مبشورتان
بصله مفرومة ناعما
عبوة صوص الديمى جلاس ودة بيكون على شكل مسحوق
عبوة صغيرة كريمة طبخ جهينة 200 مللى
الطريقة: قطعت الفراخ تبلت الفراخ بالملح والفلفل وبهارات أنا دايما باستخدم تتبيلة (سبيسى شيش طاووق )مع الفراخ
ونزلت بالفراخ على الشوايه تاخد صدمة وتعمل تششششششششششششوبعدين مش مهم تستوى عالآخر المهم تاخد لون حلو
وبعدين شوحت البصله المفرومة مع حتة زبدة صغيرة وشوية زيت لحد أما اصفرت شويه
وبعدين حطيت المشروم والجزر المبشور
شوحتهم شويه وبعدين ضفت الفراخ
ممكن لو الفراخ ماستوتش ممكن أضيف شويه ميه صغيرين واوطى النار وأغطى الحلة وبعدين دوبت معلقة كبيرة من بودرة الديمى جلاس فى حبة مية صغيرين
وضفتهم على الفراخ وسيبتها تغلى شويه لحد أما القوام تقل شوية
وضفت الكريمة تدريجيا و اديتها غلوة وطفيت النار وخلاص
الديمى جلاس مملح عشان كدة أنا ضبطت الملح فى الآخر خالص
ملحوظة: لو ماكانش عندى صوص الديمى جلاس كنت حاضيف معلقة نشا كبيرة للكريمة وأقلبها كويس وبعدين باضيفها على الفراخ
بس إحنا كلناها بالطريقة دى:
الطبق الثانى :مكرونة بصوص البولونيز :
المكونات: ربع كيلو لحمة مفرومة ناعما جزرتان مبشورتان بصله مفرومة ناعما أربع فصوص توم مفروم كرفس أفرنجى أنا ماكانش عندى فاستخدمت الكرفس البلدى تلات معالق صلصة كوباية لبن مكعب مرقة
الطريقة: فى البداية شوحت البصله المفرومة مع حتة زبدة صغيرة وشوية زيت لحد أما اصفرت شويه وبعدين حطيت الجزر والكرفس وشوحتهم شوية
وعلى فكرة الكرفس الأفرنجى هو اللى كان مذكور قى الوصفة الأصلية أنا استخدمت حزمة كرفس بلدى
و بعدين ضفت اللحمة المفرومة
وقلبت كويس جدا جدا لحد أما اللحمة فرولت وما بقاش فيها أى تكتلات
وبعدين ضفت التوم
حطيت الملح والفلفل ضفت الصلصة ومكعب المرقة وشويه ميه صغيرين وكان فيه حبة جزر زيادة ضفتهم كمان
وطيت النار وسبتها تتسبك شويه وبعدين ضفت اللبن
وغطيت الحلة ووطيت النار وسبتها مع نفسها شويه حوالى تلت ساعة كدة لما القوام تخن شويه كنت أنا فى الوقت دة منهمكة فى سلق المكرونة وبعد ما المكرونة اتصفت من مية السلق ضفت معلقتين زيت ذرة للمكرونة عشان ماتكلبشش فى بعضها فى الوقت دة صلصة البولونيز بقت جاهزة ودة كان شكلها
ضفتها عالمكرونة وقدمتها بالشكل دة
كده الموضوع بحمد الله خلص يا رب تكونوا استفدتم من الموضوع
حاستنى مشاركاتكم واقتراحاتكم وأسئلتكم وتقييماتكم
وقبل كل دة حاستنى دعاءكم ليا بصلاح الأحوال وراحة البال
واوعوا تنسوا التقييم مواضيع هذا القسم برعاية
ردينى ردينى 107140_3.gif فتكات ست الكل Fatakat 107140 الرماية – مصر