ازيكم يا قمرات
النهارده حاعمل شاورما اللحم والفراخ وعيش الشاورما (الكريب) وكمان التومية
اولا :شاورما اللحم
نقطع اللحمه شرايح رفيعة وطويلة واللحمه تفضل انها تكون بتلو علشان تستوى بسرعة
نحط فى المقلاية شوية زيت وعلى نار عالية نشوح اللحمه
بدون اى اضافات خالص
اللحمه مش حتاخد وقت
اول ما تستوى حننزل عليها بمعلقتين خل
نحط الملح والفلفل وبهار لحمه
وبعدين نحط البصل والفلفل الالوان ولو بتحبى طماطم حطىها
تسيبى البصل والفلفل يستوى شوية مع اللحمه
وتطفى عليه وكده شاورما اللحمه تبقى جاهزة
ولا اسهل ولا اطعم منها
بنجهز الساندوتش بنحط طحينة
انا هنا عملت فى عيش شامى عادى
لكن شاورما الفراخ عملتها فى عيش الشاورما
واللحمه واى اضافات تحبيها مستردة او مايونيز زى ما تحبى
تحطى الساندوتش فى الطاسة علشان نبصمه بلغة الشيفات
ثانيا شاورما الفراخ
صدور دجاج مخلية او اوراك حسب الرغبة
لتتبيلة شاورما الفراخ
زبادى _ توم
ليمون_خل
زعتر وملح وفلفل
زيت _مسطردة
تقطع الفراخ شرايح طويلة ورفيعة
نخلط كل المكونات ونحط فيها الفراخ والافضل يبقى من بالليل ونحطها فى التلاجة
الفراخ طبعا بتحتاج انها تتبل لكن اللحمه لأ
نحط زيت فى المقلاية ونسوى الفراخ وطبعا مش حتاخد معانا وقت 10 دقايق بالكتير وتكون مستوية
ثالثا: الكريب
كوب دقيق
كوب ونصف ماء
رشة ملح
معلقة زيت
نضرب كل المكونات مع بعض ونغطيه وندخله الثلاجة لمدة ساعتين على الاقل
نمسح المقلاية التيفال بمنديل فيه زيت على خفيف ونحط الكريب ولما يحمر نقلبه على الوش التانى
وبين كل واحدة والتانية ندهن المقلاية بالمنديل
لما نخلص الكريب ويبرد نلفه فى فوطة نظيفة لحد ما نستخدمه
دى التومية عملتها فى البيت سهلة جدا
بياض بيضة
رشة ملح
معلقة خل
فص توم مدقوق ناعم
زيت حسب ما التومية تحتاج
نحط البياض فى الخلاط ويكون ناشف والبيض طازة
نضرب كاننا حنعمل مارينج ونحط عليه الملح والخل
ولما البيض يعلى معانا ضيفى من فتحة الخلاط سرسوب زيت صغير كده زى المايونيز بالضبط
لغاية ما تلاقى الخليط تقل وسمكه بقى كويس
وده شكلها
ونعمل السندوتشات
نحط التومية والفراخ وعليها خيار مخلل (دى برضه عملته فى يوم واحد وتانى يوم كان اتخلل)
بطاطس محمرة لو تحبى
وتلفيه وبرضه تحطيه فى طاسة او على الشواية وتقدميه
تابعونى المشاركة الجاية ومتنسوووووش التقييم
مواضيع هذا القسم برعاية
فتاة المهمات الصعبة فتاة المهمات الصعبة 190913_14.gif Fatakat 190913 الرياض – السعودية