معلومات هامه عن الغوريه وسوق غزه -للعروس 2024.

ازيكوا عاملين ايه

عايزه أقولكوا كام حاجه عرفتها لما لفيت فى الغورية وسوق غزه …

أولاً: الغوريه عباره عن شارع طويل بس مش اوى بيبع مفروشات ولبس بيتى للعرايس صيفى او شتوى وانا شايفه انه السائد هناك المفروشات يعنى هو مكان الواحد ينزل عشان يشترى من هناك مفروشاته هو والأزهر والحته اللى حوالين الغوريه

ثانياً: انا نزلت سوق غزه اكتر من مره وهو تقريباً
13 ممر تمام .هناك ممر واحد صغير للمفروشات تقريباً محلين او تلاته فى الممر وباقى الممرات لبس ولانجيرهات

اللى انا عايزه اقوله وياريت تركزوا معايا عشان انا عاملة على المصلحه العامه لينا كلنا

1: لازم تفاصلوا عشان الغوريه وسوق غزه بيعلوا فى السعر عشان عارفين ان الناس مبتقولش لأ فى جهاز العروسه وبتشترى بسعر غالى عشان كل واحده تتباهى بأنها جابت بيجامه غاليه فكدا تعتبر جابت حاجه نضيفه

والله العظيم دا اكبر غلط الغالى تمنه فيه مش دايماً المقولة ديه صح

2: لما نزلت امبارح الغوريه عشان كنت عايزه اجيب بيجامات هوت شورتس ليا فى جهازى لاقيت الأسعار فى رينج 110 لحد 130 السعر غالى على بيجامه هوت شورت وخصوصاُ التركى

الحمد لله انا لفيت كتير وانا دايما ً بلف قبل ما اشترى الحاجه عشان اختار احسن سعر وافهم فى الانواع لاقيت ان المحلات بتغلى جدا فى البيجامات الصيفى والشتوى ..

والغوريه مش مكان حلو للدرجه انى اشترى منه لبس هو مفروشات اكتر منه لبس ما اشتريتش حاجه امبارح من هناك

3: سوق غزه كبير وفى محلات كتير ولو معجبكيش محل فى غيره بالنسبالى سزق غزه يكسب عن الغوريه بمراحل وبردوا نفاصل فيه كويس

ملاحظات ::

1 : اوعى تشترى من النت اى بيجامه بيعلوا جامد فى الأسعار عشان يكسبوا كل البيجامات اللى موجوده فى النت موجوده بره فى سوق غزه والغوريه بلاش ارجوكوا

2: زمان لما كنا بنفاصل وسيب الحاجه ونمشى البياع كان ينده علينا دلوقتى مبقاش يحصل دا كتير يعنى عادى ممكن تفاصلى وتسبيه وميندهش عليكى متفتكريش ان كلمته واحده لأ هو عارف ان فيه غيرك هيجى ياخد البيجامه بنفس التمن اللى هو قاله عشان بدل ما يكسب 20 يكسب 40 وللأسف انحنا اللى ادانا الفرصه للبياعين يعملوا كدا عشان بنموت ع الحاجات بتاعتهم كأنها مافيش غيرها .

3: البيجامه ديه انا شوفتها امبارح فى المحلات ب 130 و120 وكنا بنفاصل فيها ل90 كدا مثلاً وهو مرديش سبتها ومشيت ما اهتمتش عادى لو روحت مكان تاى هيرضى يديهالى عادى الدنيا موقفتش مشيت شويا قدام لاقيتها فى محل 160 والله العظيم والراجل بيقولى دا سعر جمله ومش بنفاصل ومصدق نفسه جداً فاكرنى هبله .. المهم لاقيت واحده جنبى واخده حوالى 10 بيجامات مختلفين عشان هى عروسه وببص ف الفاتوره لاقيت انه مضحوك عليها ف الأسعار وهى فاكره انها فاصلت لأنه بيعرض البيجامه مثلاً
ب 160 وانتى تفاصلى لحد 130 وهتبقى فرحانه وهو هيوافق لكن هو دا ممكن يكون تمنها بره 130 لكن هو معلى عشان لما تفاصلى توصلى لتمنها اللى بره .. بجد نصابيت عينى عينك بس انا عشان لفيت ففهمت اللعبه ماشيه ازاى

خلاصة لفى ودورانى امبارح نزلت وسط البلد فى محل هناك اسمه لانجيرى ابتسام اشتريت منه بيجامه قطت هوت شورت كانت ب 110 نازل عليها سيل وصلت ل 55 جنيه واشتريت من جويا اللى فى وسط البلد

معلشى عشان طولت عليكوا بس انا بحب اما اعرف حاجه افيد البنات عشان الجهاز مش حاجه سهله ومحتاج فلوس كتير فبلاش نحط فلوسنا فى حاجه متستاهلش وبالمناسبه عشان الفصال وكدا

انا جايبه بيجامه 3 قطع من سوق غزه قبل رمضان بيوم كانت البيجامكه ب170 جنيه هى بيجامه سبورت رمادى حلو اوى نزلتها مع الراجل لحد 120 جنيه وعى 3 قطع مش اتنين وتركى مكتوب عليها made in turkey عادى جدا خلى قلبك جامد وفاصلى وربنا يوفقنا كلنا ان شاء الله

rohab koky rohab koky 1193665_1.gif فتكات جديدة Fatakat 1193665 القليوبية – مصر

سبحان الله و بحمده