السلام عليكم يابنات
انا قولت اكتب تقرير بسيط كده عن الاطفال ذوي الاحتياجات الخاصه :
اولا :كتيير مننا مابيعرفوش في الموضوع ده اللي هو* قياس العمر العقلي *
عشان تعرفوا الطفل اللي عندك سنه الحقيقي ايه بالنسبه فقط لذوي الاحتياجات الخاصه فقط نعمل :كمثال طفل عنده 13 سنه
العمر العقلي = هانضرب 13 في نسبه ذكاؤه اللي هو 65 ونقسمه على 100 لو حسبتيها هايطلع عمره العقلي 9 سنوات تقريبا
نمسك بقى النقطه دي ايه معناها هانقول على نفس المثال ده ان الطفل اللي عنده 13 سنه وده عمر زمني هابسطه اكتر يعني جسمه يدي 13 سنه بس نيجي لعمره العقلي هانلاقيه انه بيتصرف تصرفات الطفل ذو ال8 سنوات ، عكس الطفل العادي الي هو مثلا عنده 8 سنين اللي هو من المفترض بيتصرف تصرفات الطفل الي عنده 8 سنوات ،وده مهم جدا انك تعرفيه عشان بناء على معرفه العمر العقلي هاتتقدري تحددي الواجبات المناسبه ليه لا اقل منه ولا اكتر .
**اهم حاجه في نظري الارشاد الاسري لازم تحضري جلسات اولياء الامور في المدارس دي بيقولوا نصايح كويسه هاتسمعي حاجات وتساؤلات هاتبقى مهمه بالنسبه ليكي اكتر من طفلك لانك طول ماانت مرتاحه نفسيا وكل اللي في البيت من اخوات للطفل والاب ده هاتخلي بيئته اللي عايش فيها كويسه هاتخليه مستعد اكتر للتعليم ،لكن لو كل يوم في مشاكل نفسيه وماديه كمان صدقيني توقعي انه هايبقى للاسوء وهايفضل في النازل لغايه ماتجيله حاله نفسيه بدل مايكون عنده تخلف عقلي هاتوصليه لمرض عقلي ولا هايسمع لحد بعد كده ،لازم نفسيه البيت تبقى كويسه المصاريف كتيره على الواحد وكان الله في العون بس مانقعدش نصرف وفي الاخر في ثانيه نضيع مجهود كبير اتعمل ،بلاش دايما تحسسي طفلك انه مابيفهمش كلهم بياخدوا وقت في الفهم وممكن لو تشوفي المدرس بيشرح ازاي في المدرسه هاتلاقي لم بيشرح درس واحد فقط ممكن يشرحوا بعده طرق ووسائل كتيره عشان يثبت ويفتكره لانهم بينسوا معظمهم بسرعه ،فمتيأسيش ولا تتعصبي واحده واحده تعلميه عن طريق الصور عن طريق الرسم كذا طريقه تخطر في بالك لغااااايه ماتلاقيه فهم وهم اكتر حاجه بيحبوها بجد ويتمتعوا بيها التعليم عن طريق اللعب ده حتى الاطفال العاديين بيتعملوا بالشكل ده.
*******المدة أو فتره الدراسه في المدارس الفكرية:
اولا نبذه بسيطه عن هذه المدارس هناك بعض اولياء الامور يعتبرون دخول اولادهم نظير للشؤم اويخجلون بما أراد الله لهم ،ولا يعرفون انهم بذلك يقتلون ماتبقى لهم من امكانيات وقدرات يمكنهم ان يستغلوها افضل استغلال بل يمكن بالتعليم او التدريب ان يصلوا الى مرحله لا يتوقعونها تماما ،وهناك اهالي لا يعرفون مدى اهميه هذه المدارس،من وجود اساليب وبرامج تعليميه جيده ووسائل مهمه جدا تسهل على كل من الطالب او اهل الطفل في استيعاب دروسه ومهامه ،وايضا وجود كوادر من المعلمين والمعلمات المعدين جيدا لّذلك .
الفتره بقى نبتدي من اول :1. حضانات الاطفال من اول 4 سنوات توفر خدمات ماقبل التاهيل لتربية حواس الطفل واكسابه المهارات والخبرات المرتبطه بالحياه اليوميه ومايحتاج اليه من خلال مرحله النمو في سن ماقبل المدرسه .
2.الحلقه الابتدائيه من مرحله التعليم الاساسي :وتكون درجه نسبة ذكائهم للقبول في هذه المدارس (التربيه الفكريه) من 75:50 من سن 8:6 سنوات ، مدة الدراسة 8 سنوات اول سنتين دراسة تمهيديه (تهيئه) ، باقي السنوات وهم 6 سنوات مدة الحلقه الابتدائيه تتضمن مواد ثقافيه وعلميه بسيطة ومناسبة.
3.مرحلة التاهيل المهني ويتعلمون فيها حرف او مهن تناسب امكانياتهم وقدراتهم لايجاد عمل مناسب لهم .
وبردو من الهم ان نتعرف على الاعاقه العقليه (انا شخصيا بحب اقول عليهم اصحاب الاراده لكن ده مسمى علمي ) ان ليها 3 اقسام وهم :
1.القابلين للتعلم : درجة الذكاء من 75:50 (متوسط الذكاء) ولهم مناهج خاصه علميه وثقافيه مناسبه لهم
2.القابلين للتدريب :درجة الذكاء من 50:30 (ضعيف ) ندربهم على كيفيه الاعتماد على النفس بقدر المستطاع لو مكنش كليا يبقى جزئيا عالاقل ،ازاي ياكل نفسه ازاي يشرب ، يلبس نفسه يدخلالحمام لوحده وهكذا
3.الاعتماديون : شديدوا التخلف ،ودوله بيعتمدوا بشكل كبير جدا على الراعي له
**اخيرا كل ام كل اب كل اخت كل اخ لاااازم يبقى في تعاون كبير مابنا كلنا لا مسؤليه اب ولا مسؤليه ام لوحدها ،والهدف من الوسائل والبرامج دي، ده كل العلماء والمهتمين بالشريحه دي قالوا ان اهم حاجه ان الطفل يكون كويس اجتماعيا بيحب الناس بيحب يشاركهم ، سلوكه تتحسن يبطل يشتم يبطل يضرب ، يستطيع ان يستقل بنفسه كليا او عالاقل جزئيا ،بدل ماكل همنا ازاااااي نحشي دماغه بحاجات ومزاكره عشان نسبة ذكاؤه تبقى احسن لازم نفهم ان في حالات ميؤس منها من ناحيه الذكاء فقط لكن ماينفعش نهمله في قدرات وامكانيات تانيه ممكن تفيده ويبقى عالاقل عايش كانسان يقدر يتحمل مسؤليه نفسه ولو حصل ده هايبقى سعيد ومبسوط كمان ومتقبل نفسه
المعلومات دي جابياها من كتب ومقالات ومجهود شخصي ياريت ااقل حاجه الموضوع يتثبت والكل يستفاد منه لان في ناس لغايه دلوقتي مابتعرفش الخدمات اللي ممكن تقدمها المدارس دي وكل فتره لم اتعلم حاجه واحس انها هاتفدكم هاقولكم عليها في رعايه الله
*((lovely moon))* *((lovely moon))* 517162_2.gif فتكات رائعة Fatakat 517162 القاهرة – مصر