السلام عليكم يا احلي فتوكات انهاردة جايبالكم طريقة المسقعة باللحمة المفرومة طريقة سهلة جدا وبسيط انا بعملهاع طول وبتعجب جوزي جداعشان كدة بقولهالكو وانا واثقة ف نفسي اصلة مبيعجبوش حاجةالمهم ندخل ع المقادير ع طول ويارب تعجبكو
المقادير
طبعا بتنجان هتجيبي مثلا 3 ثمرات -فص ثوم صغير
بصل -فلفل اخضر -طماطم -واكيد لحمة مفرومة-كوباية عصير طماطم ومتصفيهوش بس كدة
الطريقة
اول حاجة هنبدا بالبتنجان نقشرة ونغسلة كويس وبعدين نقطعة حسب ما تحبي انا قطعتة مكعبات قسمت البتنجانة اربع اجزاءوبعدين قطعتها مكعبات طيب ماشي خلصتي تقطيع حطي علية رشة ملح وعدل ع المقلاية طبعا ف الاثناء دي هتقطعي الطماطم والفلفل والبصل كل حاجة ف طبق لوحدها قطعي الفلفل شرايح سميكة شوية زي بتاعة البيتزا كدة بس تخنيها والطماطم قطعيها مكعبات اما البصل هتجيبي البصلةووتقسميها اربع اجزاء وتقطعيها طرنشات رفيعة علشان تستوي معاكي بسرعة
كل دة والبتنجان ع النار بيتقلي وخدي بالك انك بتديلة لون بس مش بتحمريةودة شكلة
طيب خلاص خلصتي قلي البتنجان ع طول عدل ع اية؟؟؟؟؟؟؟؟؟؟
ع الرخامة لمي بقي الحاجات اللي طالعة من المكونات زي القشر والحاجات دي ورتبي المطبخ حواليكي الاكل يخلص بسرعة وتشتغلي وانتي نفسك مفتوحة
كدة خلاص رتبنا المطبخ ندخل بقي ع اللي بعدة ع طول ف نفس المقلاية هتحطي الفلفل الاخضر والبصل مع بعض
هتسيبيهم لحد ما الفلفل يبدا يصفر ويدبل كدة واهم حاجة انك تطلعي البصل وهو مستوي او ع الاقل نص سوي اهم حاجة متحمريهمش اديهم لون بس طيب خلصتي الخطوة دي ادخلي ع اللي بعدة هتجيبي حلة وحطي كل اللي ف المقلاية جواها بالزيت وتجيبي فص ثوم مهروس وتقلبي معاهم يبقي احنا دلوقتي ف الحلة الزيت والفلفل الاخضر والبصل والثوم ع طول ندخل معاهم بالطماطم المتقطعة
طيب كدة خلاص حطينا الطماطم نستني لما الطماطم تدوب وتنزل المية اللي فيها ع طول انزلي بكوباية عصير الطماطم ولو المكونات كانت لسة مستوتش زودي كوباية كمان بس واحدة احسن علشان متبقاش حامية طيب لما تحسي ان عصير الطماطم بدا ف التسبيك حطي بقي توابلك انا مبحطش غير الملح علشان تبقي خفيفة ع القلب وبعد كدة بقي حطي علية البتنجان وسيبية يكمل سوي معاهم
طبعا الصورة مش واضحة اوي علشان الحلة ع النار والبخار مش موضح الصورة بس ياريت يكون شرحي واضح
طيب كدة خلصنا المسقعة ندخل بقي ع اللحمة المفرومة هتقطعي بصل صغير وتحطية ف زيت ف المقلاية ولما البصلة تصفر تحطي اللحمة والتوابل ملح-فلفل لحد متستوي تطلعيها تصفيها من الزيت وحطيها ف حلة المسقعة وتسيبيهم بس لمدة 5 دقايق وقدميها بجد طعمة جدا جدا وسهلة بردة
طيب معلش بقي شوية ملاحظات ع الماشي
1-اول متطلعي البتنجان حطية ع مناديل بتشرب الزيت لانة بيمص الزيت بطريقة فظيعة فكدة بيبقي صحي اكتر
2-وانتي حاطة الفلفل الاخضر والبصل رشي عليهم شوية ملح وهما ف المقلاية
3-لازم تخدي بالك جدا من البصل انة استوي لانة لو كان نص سوي وباقي المكونات استوت مش بيديكي الطعم اللي انتي عايزاة
4-متحطيش بهاراتك ع اللحمة غير لما تستوي خالص ولونها يغمق لان الملح والفلفل بيغمقو لونها من غير متكون خدت السوي المظبوط
5- خدي بالك ان محطتيش الزيت غير مع البصل والفلفل الاخضر بس وصفيتي اللحمة والبتنجان علشان الاكل يبقي صحي وميبقاش مليان زيوت
6- اخر حاجة بقي اني بقدم المسقعة من غير محطها ف الفرن ف ناس بتحطها ف الفرت تاخد وش تحمير بس انا بحس انها بعد كدة لو ف اي وقت كلتيها طعمها بيغير اما لو كانت ف الحلة بتفضل زي ماهي.
بس كدة انا خلصت يارب الطريقة تعجبكم وتجربوها
وياريت لو دعوة منكو ربنا يتمملي حملي ع خير ومتنسوش التقيم لو الموضوع عجبكو لاني تعبت جدا ف كتابتة وظهري وجعني اي اي اي
سلام يا قمرات
مواضيع هذا القسم برعاية
حسن حبيبي حسن حبيبي فتكات رائعة Fatakat 384674 دمياط – مصر